Modelyer Mətanət Bayramova: “Geyimlərimizlə yanaşı, milli incəsənətimizi də tanıdırıq”

Bakı:

29 °C

48 %

5 m/s

Əlaqə

AZ RU EN

Ana səhifə / Müsahibə / Modelyer Mətanət Bayramova: “Geyimlərimizlə yanaşı, milli incəsənətimizi də tanıdırıq”

Modelyer Mətanət Bayramova: “Geyimlərimizlə yanaşı, milli incəsənətimizi də tanıdırıq”

19.06.2025 [12:12]

Müasir Azərbaycan moda sənayesində özünəməxsus dəst-xətti ilə seçilən, klassik üslubu ilə yeniliyi ustalıqla birləşdirən modelyer Mətanət Bayramova illərdir ki, zərifliyi və estetikanı təşviq edir, tanıdır. Onun hazırladığı kolleksiyalar sadəcə geyimləri deyil, eyni zamanda milli mədəniyyətimizi özündə əks etdirir. Müsahibəmizdə onun yaradıcılıq yoluna, qarşıya qoyduğu məqsədlərə, Azərbaycan dəbinin gələcəyi ilə bağlı baxışlarına və bu sahədə gənc istedadlara verdiyi tövsiyələrə toxunacağıq.

- Mətanət xanım, ilk öncə özünüzü təqdim edərdiniz.

- İlk təhsilim modelyer konstruktur olub. Sonradan müxtəlif stilistika və digər kurslara gedərək müxtəlif sahələrdə özümü inkişaf etdirmişəm. Modelyer elə bir sənətdir ki, daim inkişaf istəyir və öz üzərində işləməlisən.

- Geyim sahəsində biznes qurmaq ideyası necə yarandı?

- Gözümü sənətkar ailəsində açmışam, anam dərzi, atam isə rəssam olub, bu sənətə istər-istəməz mən də yiyələnmişəm. Dizaynerliyə həvəsim olub və hər zaman fərqlənmək istəmişəm. Dəst-xəttim isə müəyyən təcrübədən sonra yaranmağa başladı.

- Onda belə çıxır ki, valideynləriniz bu sahə ilə məşğul olmasaydı, siz başqa sahəyə yiyələnərdiz?

- Düşünürəm ki, başqa bir sahəyə gedə bilməzdim, çünki sənəti sevmək böyük eşq tələb edir. Mənə elə gəlir ki, valideynlərim eyni sənətdə olmasa belə, mən yenə bu sahəyə yiyələnəcəkdim. Öz sənətimə böyük sevgi duyuram.

- İlk kolleksiyanız necə yarandı?

- İlk kolleksiyam “Autumn mood”, ikincisi “Sılk Way”, üçüncü “Milli Kino” “collection”, dördüncüsü isə “Şəbi Hicran” “collection” olub. Birinci kolleksiyada heç bir milli kolorit yox idi. Sadəcə, gözəl əl işlərinə fikir verilirdi. Bu kolleksiyada daha çox kəlağayılarla işləməyə başladım. Sonra milli kino kolleksiyasını yaratdıq. Milli filmləri sevdiyim kimi, milli musiqiləri də çox sevirəm. Milli kino kolleksiyasında ilk olaraq Üzeyir Hacıbəylinin musiqilərinə müraciət etməyim də məhz bu səsbəbdən oldu.

- Siz həm də gənclərlə çalışırsınız..

- Bəli, gənclərlə daha çox işləyirəm. Həm də onlara dəstək oluram. İş zamanı özüm də yeniliklərlə rastlaşıram, seyr etdiyim mənzərə budur ki, gənclərimiz milli filmlərdən çox uzaqdır. Milli kino kolleksiyasını yaratmaqla həm gəncləri marifləndirməyi, həm ürəyimdəki milli kino sevgisini ortaya çıxartmağı, eyni zamanda, heç bir yerdə olmayan bir kolleksiyanı yaradacağımı düşünürdüm. Onu da qeyd edim ki, kolleksiyamızdakı geyimlərin hər biri təkdir və eksklüzvdir. Bir məqamı da qeyd edim ki, dizaynerlərimizdən milli film mövzusunda işləyən yoxdur.

- Yerli dizaynerlərdən və ya markalardan kimləri izləyirsiniz?

- Azərbaycanda bu sahədə çalışan istedadlı gənclər çoxdur. Dizaynerlərimiz kifayət qədər var, lakin ad çəkmək istəmirəm. Xarici markalardan isə kumirim Şaneldir.

- Niyə məhz Şanel?

- Kolleksiyalarımda bir eleqantlıq tərzi var. Hər zaman dəst-xətti olaraq həm milli koloritliyi, həm də eleqantlığı qoruyub saxlayıram. Şaneldə də eleqantlıq olduğu üçün özümü ona yaxın görürəm.

- Geyimləri xarici ölkələrdə nümayiş etdirə bilirsinizmi?

- Hər bir dizayner dünyada moda həftələrində nələr baş verdiyindən məlumatlı olmalıdır. Xarici ölkələrdə moda həftələrinə yalnız Qazaxıstanda qatılmışam. Hal-hazırda bir çox ölkələrdən təkliflər alırıq və bunların üzərində işləyirik. Qeyd edim ki milli kino kolleksiyamız onların diqqətini cəlb edib və özləri bizə müraciət ediblər. Həmin ölkələrdən gələn sahibkarlar ölkəmizdə keçirilən moda həftələrində iştirak edirlər və bizim onlarla müəyyən əməkdaşlıqlarımız olur.

- Geyimlərinizdə əsasən hansı auditoriya yer alır?

- Gənclər gəlir, geyimlərə baxır, lakin alıcılıq hədəfimiz ən çox turistlərdir. Vaqif Mustafazadəyə həsr olunmuş bir geyimimiz var idi. Bu geyim satışa qoyulandan 3 gündən sonra Rusiyalı turist tərəfindən alındı.

- Gənclərdə alıcılıq qabiliyətinin zəif olmaması qiymətlərlə bağlı ola bilərmi?

- Bəli, geyimlərin hər birinin üstündə böyük əmək var və qiymətlər ona uyğun qoyulur. Geyimlərimizin heç biri təkrar deyil, üzərində böyük zəhmət, əl işi olduğu üçün maddi dəyəri də artır.

- Qiymətlər təxminən nə qədərdir?

- Ən ucuz geyimin qiyməti 500 manat, digər geyimlərin qiymətləri daha yüksəkdir. Geyimləri kolleksiya olaraq yaradanda qiyməti düşünmürəm, sadəcə, yaradıcılıqla məşğul oluram, qiymət sonra yaranır.

- Sənət adamları ilə əməkdaşlıq edirsiniz?

- Bəli, bəzi müğənnilərlə əməkdaşlıq edirik. Elə müğənni var ki, onda artıq dəst-xətt yaratmışıq. Həmin dəst-xətti sənətlə birləşdilərək gözəl bir obrazı ortaya qoyuruq. Məsləhət görərdim ki, klassik sənətlə məşğul olan sənət adamları modelyerlərlə işləsinlər.

- Brendinizi cəmiyyətdə hansı formalarda tanıdırsız?

- Moda həftələrində və tədbirlərdə iştirak edirik, lakin orada öz hədəf kütləmiz olur. Yaxınlarda baş tutan milli brendlərin pərakəndə zirvəsi forumunda iştrak etməyimizin əsas məqsədi brendimizi tanıtmaq idi. Düşünürəm ki, daha geniş forumlarda iştirak etməklə daha böyük kütlə qarşısına çıxa bilirik.

- Forumlarda geyimlərinizi nümayiş etdirmək üçün bir çox modelləri cəlb etmişdimiz, gəncləri hansı kriteriya əsasında seçirsiniz?

- Modellərlə işləyəndə çalışıram gənclərə dəstək olum. Modellərimiz iki qrupa bölünür: Peşəkar modellər və könüllü modellər. Könüllülər arasında bədən kriteriyaları heç də modellərə uyğun olmayan gənclər olur. Belə olduğu halda geyimlər həmin gənclərin üzərində reallığa daha uyğun görünür. Könüllü modellərlə işləmək xeyli vaxt aparan işdir. Həmin gənclərlə məşğul olan xüsusi xoreoqrafımız var ki, geyimlərin nümayişində bizə böyük dəstək olur.

- Sizcə, qadın sahibkarlar üçün ən böyük çağırış nədir?

- İlk növbədə istəyərdim ki, ölkəmizdə qadın sahibkarlar həmrəy, bir-birinə dəstək olsunlar. Belə olduğu halda moda həftələrində ölkəmizi layiqincə təmsil edə bilərik.

Havar Şəfiyeva

Paylaş:

Baxılıb: 970 dəfə