Dəyişən dünya, Bakı və enerji

Bakı:

11 °C

71 %

7 m/s

Əlaqə

AZ RU EN

Ana səhifə / Siyasət / Dəyişən dünya, Bakı və enerji

Dəyişən dünya, Bakı və enerji

11.08.2012 [14:39]

Bu, bir həqiqətdir ki, Azərbaycanda Prezident İlham Əliyevin rəhbərliyi ilə həyata keçirilən islahatlar və əldə edilən uğurlar ölkəmizin dinamik iqtisadi inkişaf tendensiyası ilə dünya iqtisadiyyatında ön plana çıxmasını şərtləndirib. Məhz bunun qanunauyğun nəticəsidir ki, hazırda ölkəmizdə hər bir sahədə sürətli tərəqqi və dinamik inkişaf müşahidə edilməkdədir. Onu da qeyd edək ki, Azərbaycanın əldə etdiyi bu uğurlar, artıq ölkəmizə səfər edən xarici dövlətlərin təmsilçiləri tərəfindən də xüsusi olaraq vurğulanır. Onlardan biri də, Şimali Kipr Türk Cümhuriyyətinin (ŞKTC) Cümhuriyyətçi Türk Partiyasının Lefkoşa millət vəkili Sibel Siberdir. İyunun sonunda Bakıda keçirilən Krans Montana Forumunda iştirak edən Sibel Siber vətəninə qayıtdıqdan sonra ölkəmizdəki inkişafdan bəhs edən məqalə yazıb. Oxucularımız üçün maraq kəsb edəcəyini nəzərə alaraq, iyulun 6-da ŞKTC-nin “Yenidüzən” qəzetində dərc edilmiş həmin məqalənin kiçik ixtisarla Azərbaycan türkcəsinə tərcüməsini təqdim edirik.
Keçdiyimiz günlərdə Azərbaycanın paytaxtı Bakıda təşkil edilən “Dəyişən dünya və enerji” başlıqlı paneldə Prezident İlham Əliyev dünyanın müxtəlif bölgələrindən gələn minə yaxın iştirakçıya Bakını anladarkən bu tarixi şəhərin çirkli bir neft şəhəri olmadığını söylədi.
Bakı, sadəcə bir neft şəhəri olaraq anılarsa şübhəsiz ki, o zaman Qafqazın və Xəzər sahillərinin bu ən böyük şəhərinə qarşı böyük bir haqsızlıq edilmiş olar. Görəsən, gün batdıqdan sonra bu qədər işıl-işıl parıldayan bir başqa yer varmı?
Bakıya bir axşam vaxtı təpədən baxınca “İşıqlar şəhəri Bakı” deməkdən özünüzü saxlaya bilməzsiniz. İşıq şüalarının Xəzər dənizindəki əksi isə şəhərə ayrı bir gözəllik qatır... Və eyni parlaqlıq sanki gənclərin gözlərinə də yansıyıb.
Azərbaycan gənclərin baxışlarında tərifi mümkün olmayan bir istilik və ümidlə qarışıq bir coşqu var. “Şəhərimiz çox yaxşıdır, amma daha da yaxşı olacaq!” deyən kimidir, o baxışlar... Sənət və mədəniyyət həyatlarının bir parçasıdır... Bakı şairləri, bəstəkarları, opera sənətçiləri, rəqqasları ilə bir sənət və mədəniyyət şəhəridir.
“Müstəqilliyimizi qazandığımız zaman o dövrdə müstəqilliyini qazanan ölkələr arasında ən kasıbı biz idik” deyir, çıxışında, Azərbaycanın dövlət başçısı İlham Əliyev. Beş il öncəki Bakı ilə indiki Bakının çox fərqli olduğunu söyləyir. Sabitliyin təmin olunduğunu və dünyanın ən etibarlı ölkələrindən biri halına gəldiklərini qürurla vurğulayır. Gürcüstanın dövlət başçısı isə paneldəki çıxışına “Tez-tez Bakıya gəlirəm və hər səfərimdə inanılmaz bir fərqlilik, bir inkişaf və gözəllik görürəm”, - deyə başlayır.
Heç şübhəsiz, neft və qazın gətirdiyi zənginliyin bu sürətli inkişafdakı payı danılmazdır; lakin bu uğuru sırf maliyyə imkanına bağlamaq da haqsızlıq olar. “Yaxşı bir iqtisadi sistem yaratmaq arzusundayıq. çünki biz sırf neftə əsaslanan bir iqtisadiyyat istəmirik. Neft qiymətlərindəki qalxma və enməyə bağlı olan bir iqtisadiyyatın zəif və qeyri-sabit olacağını bilirik”, - deyə Prezident İlham Əliyev çıxışını davam etdirir.
Geniş küçələr, yaşıl parklar, estetik memarlıq və şəhərin formasına uyğun yeni inşaatlar modern şəhərçilik anlayışından xəbər verir. Amma bu zaman şəhər sakinlərinə göstərilən sayğının da önəmi böyükdür. Adətən, Bakı maddi gücün şəhərçilik qaydaları ilə birləşdiyi zaman necə gözəl bir şəhərin yaradıla biləcəyinə nümunə təşkil edr. Heydər Əliyev Mərkəzi isə dünyada məşhur iraqlı Zaha Hadidin bir əsəridir. Tədbirə ev sahibliyi edən bu görkəmli bina şəhərə xüsusi bir ab-hava verir.
Qədim şəhər ayrı bir gözəllikdir. “İçərişəhər” deyirlər azərilər... Bizim Lefkoşamızın “Surlar İçi” kimi İçərişəhər də daş divarlarla əhatə olunub. İçərişəhərin qapıları var və şəhərə ordan girirlər...
Sarı daş memarlığı, qədim binaları, dar küçələri, daşlı yolları heç də bizlərə yabançı deyil... Lefkoşadakı Böyük Xanın bənzəri olan bir çox kiçik xan görürük. “Karvansara” deyilir, bu qədim tikililərə. Ortadakı boş sahələr restoran kimi fəaliyyət göstərir. Böyük bir çətirlə də üstü örtülüb. Bu şəkildə bütün hava şərtlərində xidmət göstərə bilməsi nəzərə alınıb. UNESCO ilə əməkdaşlıq nəticəsində təşkil edilən “Qadın hüquqları və İnsan hüquqları” başlıqlı panelə dəvət olan qadın qonaqlarını xanım Mehriban Əliyeva bu tarixi və mədəni məkanda qəbul edir.
ölkəmizdən uzaq bir ölkədə öz dilimizlə danışaraq anlaşa bilmək fərqli və gözəl bir duyğudur... Xüsusilə Azərbaycan dilinin Kipr türk dili ilə bənzərliyindən təsirlənməmək mümkün deyil. Hardasa unutduğumuz bir çox sözləri onların gündəlik danışıqlarında eşitmək fərqli duyğulara qərq edir bizi. Ailə, Qadın və Uşaq Problemləri üzrə Dövlət Komitəsinin sədri Hicran Hüseynova ortaq duyğularımızı “Bizim kökümüz birdir”- deyə dəyərləndirir.
Dağlıq Qarabağın işğal altında olması, bir milyon azərbaycanlının məcburi köçkün və qaçqın həyatı yaşaması Azərbaycan xalqının ən böyük yarası və üsyanı. “Toraqlarımızın 20 faizi işğal altındadır və təəssüflər olsun ki, bütün dünya da buna seyrçi mövqedən yanaşır” deyərək etirazını dilə gətirir Prezident İlham Əliyev. Birləşmiş Millətlər Təşkilatının Təhlükəsizlik Şurasının qətnamələrinin dərhal yerinə yetirilməsini istəyir.
Dəyişən dünya və qloballaşma ilə birlikdə ölkələr arasındakı əlaqələr və problemlər də fərqli bir mənzərə yaradır. Bir tərəfdən enerjiyə olan ehtiyac artarkən, digər tərəfdən, enerji mənbələrinin yetərsizliyi insanlıq üçün böyük bir təhlükə təşkil etməkdədir... Mövcud enerji mənbələri də nə yazıq ki, toplumların səadətinə və sülhə xidmət etmək əvəzinə, bir çox hallarda gərginliyə və müharibəyə səbəb olmaqdadır.
“Enerji siyasi təzyiq və güc vasitəsi olaraq istifadə edilməməlidir...” deyən Azərbaycanın dövlət başçısının səsi salonda geniş əks-səda doğurur... Bu sözlərin dərin mənası bir daha beyinlərimizdə və ürəklərimizdə öz yerini alır, gözəl şəhər Bakıya “xoşca qal” deyərkən...
06.07.2012
“Yenidüzən” qəzeti
Sibel Siber

Paylaş:

Baxılıb: 943 dəfə