Azərbaycan Ordusu dövlətimizin gücü və qürur mənbəyidir

Bakı:

25 °C

73 %

1 m/s

Əlaqə

AZ RU EN

Ana səhifə / YAP xəbərləri / Azərbaycan Ordusu dövlətimizin gücü və qürur mənbəyidir

Azərbaycan Ordusu dövlətimizin gücü və qürur mənbəyidir

25.06.2026 [14:32]

Azərbaycan Respublikasının Silahlı Qüvvələri ölkəmizin müstəqilliyinin, suverenliyinin və ərazi bütövlüyünün etibarlı təminatçısıdır. Dövlətimizin həyata keçirdiyi uğurlu siyasət nəticəsində Azərbaycan Ordusu bu gün regionun ən güclü hərbi qüvvələrindən birinə çevrilmiş, döyüş qabiliyyəti, peşəkarlığı və müasir texniki imkanları ilə beynəlxalq səviyyədə böyük nüfuz qazanmışdır. Ordumuzun əldə etdiyi uğurların əsasında isə Cənab Prezident, Müzəffər Ali Baş Komandan İlham Əliyevin rəhbərliyi ilə həyata keçirilən məqsədyönlü və ardıcıl ordu quruculuğu siyasəti dayanır.

Ulu Öndər Heydər Əliyev tərəfindən əsası qoyulan milli ordu quruculuğu strategiyası Prezident İlham Əliyev tərəfindən uğurla davam etdirilmiş və yeni mərhələyə yüksəldilmişdir. Son illər ərzində Silahlı Qüvvələrimizin maddi-texniki bazası əhəmiyyətli dərəcədə möhkəmləndirilmiş, ən müasir silah və hərbi texnikalar alınaraq ordumuzun arsenalına daxil edilmişdir. Hərbi hissələrin yenidən qurulması, hərbçilərin sosial müdafiəsinin gücləndirilməsi, peşəkar kadr hazırlığının təkmilləşdirilməsi istiqamətində mühüm addımlar atılmışdır.

Prezident İlham Əliyev Azərbaycan Ordusu haqqında danışarkən qeyd etmişdir: “Biz elə bir güclü ordu yaratmışıq ki, istənilən vəzifəni icra edə bilərik. Ordumuzun müasir texnika ilə təchizatı, müntəzəm olaraq keçirilmiş təlimlər, ordumuzun döyüş potensialının gücləndirilməsi, hərbi sənayenin yaradılması və idxaldan müəyyən dərəcədə asılılığın azaldılması – bütün bunlar məqsədyönlü şəkildə aparılan siyasətin tərkib hissəsidir.” Bu fikirlər ölkəmizdə ordu quruculuğunun hansı səviyyədə aparıldığını və əldə olunan nailiyyətlərin təsadüfi olmadığını aydın şəkildə göstərir.

Azərbaycan Ordusunun qüdrəti və peşəkarlığı müxtəlif beynəlxalq hərbi təlimlərdə və əməliyyatlarda dəfələrlə öz təsdiqini tapmışdır. Ordumuzun döyüş hazırlığının daim yüksək səviyyədə saxlanılması məqsədilə mütəmadi təlimlər keçirilir, şəxsi heyətin peşəkar hazırlığı artırılır, müasir döyüş üsulları tətbiq olunur. Bunun nəticəsində Silahlı Qüvvələrimiz istənilən tapşırığı yerinə yetirməyə qadir güclü bir hərbi qüvvəyə çevrilmişdir.

Azərbaycan xalqının qəhrəmanlıq tarixinə qızıl hərflərlə yazılan 44 günlük Vətən müharibəsi isə ordumuzun gücünü bütün dünyaya nümayiş etdirdi. Müzəffər Ali Baş Komandan İlham Əliyevin rəhbərliyi altında Azərbaycan Ordusu tarixi Zəfər qazanaraq ölkəmizin ərazi bütövlüyünü bərpa etdi. Bu böyük Qələbə xalqımızın birliyinin, əsgər və zabitlərimizin şücaətinin, dövlətimizin siyasi iradəsinin və güclü ordu quruculuğu siyasətinin nəticəsi idi.

Bu gün Azərbaycan xalqı Silahlı Qüvvələr Gününü xüsusi qürur hissi ilə qeyd edir. Prezident İlham Əliyevin vurğuladığı kimi, “Biz Silahlı Qüvvələr Gününü artıq müzəffər ordu kimi, qalib xalq kimi qeyd edirik.” Bu ifadə xalqımızın qazandığı tarixi Zəfərin və Azərbaycan Ordusunun şanlı yolunun ən dolğun təsviridir.

Müasir dövrdə Azərbaycan Ordusu yalnız ölkəmizin təhlükəsizliyinin təminatçısı deyil, həm də dövlətimizin qüdrətinin, siyasi nüfuzunun və beynəlxalq mövqeyinin mühüm göstəricilərindən biridir. Prezident İlham Əliyevin qeyd etdiyi kimi, “Azərbaycan Ordusu dünyanın ən güclü orduları sırasındadır.” Həqiqətən də, son illərdə əldə olunan uğurlar, qazanılan qələbələr və ordumuzun inkişaf göstəriciləri bu fikrin reallığa əsaslandığını sübut edir.

Azərbaycan Ordusu xalqımızın qürur mənbəyi, dövlətimizin etibarlı dayağıdır. Prezident İlham Əliyevin rəhbərliyi ilə həyata keçirilən uğurlu ordu quruculuğu siyasəti nəticəsində Silahlı Qüvvələrimiz hər keçən gün daha da güclənir, ölkəmizin milli maraqlarının və təhlükəsizliyinin keşiyində ayıq-sayıq dayanır. Güclü dövlətin güclü ordusu olur və bu gün Azərbaycan Ordusu müstəqil Azərbaycanın ən böyük nailiyyətlərindən biri kimi tariximizin şərəfli səhifələrində öz layiqli yerini tutur.

Qeyd etmək istərdim ki, Azərbaycan Ordusunun əldə etdiyi bütün uğurlar hər bir Azərbaycan vətəndaşında olduğu kimi, biz təhsil işçilərində də böyük qürur hissi yaradır. Gənc nəslin vətənpərvərlik ruhunda tərbiyə olunması, dövlətimizə, xalqımıza və ordumuza sevgi ilə böyüməsi hər birimizin qarşısında duran mühüm vəzifələrdəndir. Əminik ki, Müzəffər Ali Baş Komandan cənab İlham Əliyevin rəhbərliyi ilə Azərbaycan Ordusu bundan sonra da yeni nailiyyətlər qazanacaq, dövlətimizin təhlükəsizliyini və suverenliyini etibarlı şəkildə qoruyacaqdır. Güclü ordumuzla fəxr edir, bütün hərbi qulluqçularımıza möhkəm cansağlığı, şərəfli xidmətlərində uğurlar arzulayırıq.

Səriyyə Əhmədova

Naxçıvan şəhər 10 saylı körpələr evi-uşaq bağçasının müdiri, YAP Naxçıvan şəhər təşkilatının ƏPT sədri

Paylaş:

Baxılıb: 437 dəfə