Moldovalı ombudsmana təzyiqlər və beynəlxalq birliyin sükutu

Bakı:

23 °C

57 %

5 m/s

Əlaqə

AZ RU EN

Ana səhifə / Siyasət / Moldovalı ombudsmana təzyiqlər və beynəlxalq birliyin sükutu

Moldovalı ombudsmana təzyiqlər və beynəlxalq birliyin sükutu

11.07.2013 [14:06]

Aureliya Qriqoriunun çıxışı təkcə Ermənistanın işğalçı siyasətini deyil, həm də özünü ədalət carçısı, insan haqlarının müdafiəçisi, məzlumların himayəçisi kimi göstərməyə çalışan beynəlxalq təşkilatların, bəzi dövlətlərin, hüquq müdafiəçilərinin qeyri-səmimiliyini ifşa etdi
Məlum olduğu kimi, bir neçə gün bundan əvvəl, Moldova parlamentinin insan haqları üzrə vəkili - Ombudsman Aureliya Qriqoriu Ermənistan Konstitusiya Məhkəməsinin İrəvanda keçirdiyi beynəlxalq konfransdakı çıxışında Ermənistanın Azərbaycan torpaqlarının 20 faizini işğal etməsini və Xocalıda azərbaycanlılara qarşı soyqırımı törətməsini qeyd edib, Ermənistanın cinayətkar əməllərini əks etdirən faktları və statistik rəqəmləri səsləndirib. Ermənistan parlamentindəki sözügedən çıxışında moldovalı ombudsman Ermənistanın törətdiyi bu cinayətlərin insan haqlarının pozulmasının bariz nümunəsi olduğunu vurğulayıb.
Qeyd edək ki, A.Qriqoriunun tarixi həqiqətlərə söykənən çıxışından sonra baş verənlər ermənilərin vəhşi təbiətinin xarakterik cəhətlərini nümayiş etdirdi. Belə ki, çıxışının ardından moldovalı ombudsman ölümlə təhdid olundu, onun Moldovadan olan nümayəndə heyəti ilə birlikdə ölkəsinə qayıtmasına icazə verilmədi, bunun üçün dediyi sözlərdən imtina etməsi, üzr istəməsi tələb olundu. Lakin A.Qriqoriu bu tələblərə tabe olmayıb, Rumıniya və Gürcüstanın Ermənistandakı səfirliklərinin köməyi ilə onun Ermənistandan çıxması və ölkəsinə qayıtması mümkün olub. Ermənilərin moldovalı qonağın söylədiyi sözlərə görə onu ölümlə hədələməsi, Ermənistanın rəsmi strukturlarının onun ölkədən vaxtında getməsinə şərait yaratmaması, ombudsmanın təhdid və təzyiqlərə məruz qalması Ermənistanda azad sözə dözümsüzlüyün, eyni zamanda, erməni vəhşiliyinin çox cüzi bir hissəsinin özünü bir daha dünya qarşısında göstərməsi idi.
Ermənistanda və Azərbaycanda insan hüquqlarına münasibətdə köklü fərqi göstərmək üçün bir məqamı xatırladaq ki, Əkrəm Naibovun Azərbaycan xalqını açıq-aşkar təhqir edən, tarixi hadisələri saxtalaşdıran romanı onun Azərbaycan xalqına, yaşadığı ölkəyə olan ölçüyəgəlməz xəyanətinin məhsulu idi. Buna baxmayaraq, Azərbaycanda heç kim onu öldürməklə hədələmədi. Müxalifət partiyalarının rəhbərlərindən birinin yazıçının fiziki cəzalandırılmasına çağırışından sonra isə respublika hüquq-mühafizə orqanlarında çağırış edən şəxsə qarşı cinayət işi açıldı. Bu, o deməkdir ki, Ə.Naibovun xəyanətkar əməli haqlı olaraq, Azərbaycan ictimaiyyətinin qınağı ilə üzləşdi, lakin ictimai qəzəb heç də yazıçının hüquq və azadlıqlarının pozulmasına gətirib çıxarmadı. Ermənistanda isə qeyd olunduğu kimi, bu vəziyyətin tamamilə əksi müşahidə olundu.
Ermənistandakı hadisə, həmçinin, başqa bir məqamı - beynəlxalq ictimaiyyətin Azərbaycanda və Ermənistandakı hadisələrə münasibətdə qeyri-səmimliyini, ikili yanaşmasını bir daha üzə çıxardı. Xatırladaq ki, Ə.Naibovun qərəzli əsəri ortaya çıxandan sonra bir sıra beynəlxalq qurumlar, Avropa strukturlarının bəzi nümayəndələri yazıçını dəstəkləyən bəyanatlar yaymışdılar. Bu məsələyə ABŞ Dövlət Departamentinin sözçüsü səviyyəsində də münasibət bildirilmişdi. Lakin tarixi həqiqətləri içərisinə heç bir etnik, dini nifrət və təhqir elementləri qatmadan, olduğu kimi ifadə edən, söz azadlığından mənəvi, etik çərçivələrdə yararlanan bir hüquq müdafiəçisi Ermənistanda hüquqlarının pozulmasına, hətta həyati təhlükəyə məruz qaldı. Görəsən, bir vaxtlar Ə.Naibovu müdafiə edən QHT-lər, beynəlxalq təşkilatlar, ayrı-ayrı dövlətlərin rəsmiləri indi nə üçün A.Qriqoriunun söz və ifadə azadlığına dəstəklərini ortaya qoymurlar? Görəsən, “Freedom House”u, “Human Rights Watch”u insan haqlarının, söz azadlığının müdafiəsindəki prinsipial mövqelərindən yayındıran səbəb nədir? Almaniyalı hüquq müdafiəçiləri Kristofer Ştrasser və Markus Löninq insan haqlarının bu aşkar pozuntusuna, üstəlik, bir diplomata qarşı olan təzyiqlərə, hədələrə necə sükutla yanaşırlar?
Əlbəttə ki, Moldova parlamentinin insan haqları üzrə vəkili A.Qriqoriuya qarşı Ermənistanda rəsmi səviyyədə yönələn təzyiqlərə münasibətdə hökm sürən səssizlik bu ölkənin özbaşınalıqlarına beynəlxalq ictimaiyyətin ənənəvi mövqeyindən o qədər də seçilmir. Ermənistanın Azərbaycan ərazilərinin bir hissəsini 20 ildən artıq bir müddətdə işğal altında saxlamasına da eynilə göz yumulur. A.Qriqoriunun Ermənistan parlamentində səsləndirdiyi faktlar Ermənistana açıq və gizli surətdə havadarlıq edən qüvvələrin görmək istəmədiyi həqiqətlərdir.
Beləliklə, moldovalı ombudsmanın İrəvandakı cəsarətli çıxışı təkcə Ermənistanın işğalçı və soyqırımı siyasətinin ifşası deyil. Bu, həm də özünü ədalət carçısı, insan haqlarının müdafiəçisi, məzlumların himayəçisi kimi göstərməyə çalışan beynəlxalq təşkilatların, bəzi dövlətlərin, hüquq müdafiəçilərinin qeyri-səmimiliyini bir daha ortaya qoydu.
Hülya MƏMMƏDLİ

Paylaş:

Baxılıb: 1159 dəfə