Dövlət və idmanın vəhdəti

Bakı:

24 °C

88 %

2 m/s

Əlaqə

AZ RU EN

Ana səhifə / YAP xəbərləri / Dövlət və idmanın vəhdəti

Dövlət və idmanın vəhdəti

01.05.2026 [14:52]

Aprelin 30-da dövlət başçısı Albaniyanın paytaxtı Tiranada keçirilmiş Avropa çempionatında komanda hesabında çempion olan yunan-Roma və sərbəst güləşçiləri, eləcə də qadın güləşi üzrə medal qazanan idmançıları və onların məşqçilərini qəbul etdi. Bu görüş Azərbaycan idmanının qazandığı möhtəşəm uğurun ən yüksək səviyyədə qiymətləndirilməsi idi.

Prezident İlham Əliyev çıxışında qeyd etdi ki, komanda hesabında Avropa çempionu olmaq böyük nailiyyətdir və bu qələbə Azərbaycan güləş məktəbinin gücünü bir daha təsdiqləyir. Onun sözlərinə görə, müasir dövrdə güləş üzrə rəqabət daha da sərtləşib, lakin Azərbaycan idmançıları peşəkarlıq və iradə nümayiş etdirərək rəqiblərinə qalib gəlməyi bacarıblar.

Görüşdə dövlət başçısı xüsusi vurğuladı ki, güləş Azərbaycanda qədim və zəngin ənənələrə malik idman növüdür. Bu ənənələr bu gün də uğurla davam etdirilir və yeni nəsil güləşçilər əvvəlkilərin yolunu layiqincə davam etdirir. O qeyd etdi ki, həm təcrübəli idmançıların, həm də gənc güləşçilərin uğurları ölkədə düzgün qurulmuş seleksiya və məşq sisteminin nəticəsidir.

Bu yanaşma təsadüfi deyil. Son illərdə Azərbaycanda idman infrastrukturu genişlənib, bölgələrdə Olimpiya İdman kompleksləri yaradılıb və gənclərin idmana cəlbi sistemli xarakter alıb. Prezidentin də vurğuladığı kimi, nəsillər dəyişsə də, Azərbaycan idmanının uğurları dəyişmir. Görüşdə səslənən fikirlərdən biri də idmanın cəmiyyət üçün mənəvi əhəmiyyəti ilə bağlı idi. Prezident qeyd etdi ki, beynəlxalq arenada Azərbaycan bayrağı qaldırılanda bütün xalq böyük qürur hissi keçirir. Bu qələbələr gənc nəslin vətənpərvərlik ruhunda tərbiyəsində mühüm rol oynayır. Eyni zamanda, dövlət başçısı bəzi beynəlxalq yarışlarda Azərbaycan idmançılarına qarşı ədalətsiz münasibətlərin də mövcud olduğunu qeyd edərək vurğuladı ki, buna baxmayaraq, idmançılarımız öz gücləri və əzmləri ilə bütün maneələri aşmağı bacarırlar.

Görüş zamanı idmançılar da çıxış edərək qazandıqları uğurlarda dövlətin diqqət və qayğısının mühüm rol oynadığını bildirdilər. Avropa çempionları Prezidentə təşəkkür edərək qeyd etdilər ki, bu dəstək onları daha böyük qələbələrə ruhlandırır. Bu dialoq dövlət və idmançı arasında qarşılıqlı etimadın, həmrəyliyin və məqsəd birliyinin bariz nümunəsi idi.

Prezident İlham Əliyevin bu qəbulu bir daha göstərdi ki, Azərbaycanda idman sahəsi strateji istiqamət kimi inkişaf edir. Qazanılan uğurlar təsadüfi deyil, uzun illərin planlı siyasətinin, zəhmətin və milli ruhun nəticəsidir. Bu gün Azərbaycan güləşi yalnız Avropada deyil, dünya miqyasında söz sahibi olan bir məktəbə çevrilib. Tiranada qazanılan qələbə isə bu yolun davamlı olduğunu bir daha sübut etdi.

YAP Samux rayon təşkilatının sədr müavini Sevinc Xəlilova

Paylaş:

Baxılıb: 803 dəfə