Azərbaycan təmsilçisi BMT-nin Qlobal Geoməkan İnformasiyasının İdarəolunması üzrə Ekspertlər Komitəsinin üçüncü sessiyasında təqdimatla çıxış edib

Bakı:

15 °C

77 %

8 m/s

AZ RU EN

Ana səhifə / Siyasət / Azərbaycan təmsilçisi BMT-nin Qlobal Geoməkan İnformasiyasının İdarəolunması üzrə Ekspertlər Komitəsinin üçüncü sessiyasında təqdimatla çıxış edib

Azərbaycan təmsilçisi BMT-nin Qlobal Geoməkan İnformasiyasının İdarəolunması üzrə Ekspertlər Komitəsinin üçüncü sessiyasında təqdimatla çıxış edib

26.07.2013 [09:21]

Böyük Britaniyada keçirilən Kembric konfransında ölkəmizi təmsil edən Azərbaycan Respublikası Dövlət Torpaq və Xəritəçəkmə Komitəsinin sədri, akademik Qərib Məmmədov BMT-nin Qlobal Geoməkan İnformasiyasının İdarəolunması üzrə Ekspertlər Komitəsinin üçüncü sessiyasında təqdimatla çıxış edib.
Qərib Məmmədov bildirib ki, müasir Azərbaycan müstəqilliyinin bərpasının 21 illik tarixində mürəkkəb və eyni zamanda şərəfli yol keçib. Sosial-iqtisadi sahədə ölkənin nailiyyətləri “Fitch Ratings”, “Moody”, “Standard & Poors” kimi beynəlxalq reytinq agentliklərinin hesabatlarında öz əksini tapıb. Dünya Bankı və Beynəlxalq Maliyyə Korporasiyasının hesabatlarında da Azərbaycanın mövqeyi yüksəlib və MDB ölkələri arasında aparıcı yer tutub. Dünya İqtisadi Forumunun Qlobal Rəqabətlilik Hesabatında isə region ölkələri arasında aparıcı mövqeyə malik olub. Bununla yanaşı, 2010-cu ildə insan inkişafı üzrə BMT-nin İnkişaf Proqramının hesabatına görə, Azərbaycan “orta insan inkişafı”ndan “yüksək insan inkişafı”na malik olan ölkələr qrupuna daxil olub. XXI əsrin ilk onilliyində ölkəmizin informasiya və kommunikasiya texnologiyaları sürətlə inkişaf edib və dünya ölkələrinin sosial-iqtisadi həyatına təsir edən qloballaşma prosesindən kənarda qalmayıb.
Azərbaycanın inkişaf strategiyasına toxunan Q.Məmmədov, Prezident İlham Əliyevin Sərəncamı ilə hazırlanan “Azərbaycan 2020: gələcəyə baxış” İnkişaf Konsepsiyasından bəhs edib, ölkəmizin bütün sahələrdə əldə etdiyi nailiyyətlərdən və gələcək planlardan danışıb.
Ölkəmizdə geoməkan informasiyalarının idarəedilməsi sahəsindəki yeniliklərdən və uğurlardan bəhs edən Q.Məmmədov, Azərbaycanda xəritəçəkmə və analiz sahələrində istifadə olunan müasir texnologiyalar haqqında məlumat verib.
Peyk sənayesindəki uğurlarımızdan danışan komitə sədri, bildirib ki, Azərbaycan bir neçə ay bundan əvvəl süni peyki olan ölkələr sırasına daxil olub.
Qeyd edilib ki, Azərbaycanın vahid elektron kartoqrafiya bazası mövcuddur. Ölkənin inkişaf strategiyasında bu sahə mühüm əhəmiyyət kəsb edir. İnformasiya cəmiyyətinə keçid, səmərəli və şəffaf dövlət idarəçiliyini həyata keçirməyə imkan verən elektron idarəetmə sisteminə çox böyük maraq var. Dövlət orqanlarında elektron xidmətlərin genişləndirilməsi və ölkədə “Elektron hökumət”in formalaşdırılması istiqamətində əldə olunmuş nailiyyətlər xüsusi vurğulanıb.
Q.Məmmədov nəzərə çatdırıb ki, Azərbaycan daha böyük nailiyyətlər əldə etməyə qadir olan ölkədir. Lakin Ermənistanın işğalçılıq siyasəti buna mane olur. Ermənistanın hərbi təcavüzü nəticəsində torpaqlarımızın 20 faizi işğal olunub. Komitə olaraq biz hazırda işğal olunmuş ərazilərimizin real coğrafi adlarının mühafizəsi və bununla bağlı xüsusi xəritələrin hazırlanmasına böyük əhəmiyyət veririk.
Azərbaycanda beynəlxalq əməkdaşlıq çərçivəsində əldə edilən nailiyyətləri sadalayan Q.Məmmədov, ölkəmizin Avropa ilə Asiya arasında körpü rolunu oynadığını və geoməkan məlumatlarının idarə olunması sahəsində Avropa ilə sıx əməkdaşlıq edildiyini diqqətə çatdırıb.
Sonda Q.Məmmədov geoməkan məlumatlarının idarə olunması sahəsindəki uğurlarımızın bundan sonra da davam edəcəyinə əminliyini ifadə edib, konfransda iştirak edən müxtəlif ölkələrin nümayəndələrinə səmərəli təcrübə mübadiləsi arzulayıb.

Paylaş:

Baxılıb: 1087 dəfə