Heydər Əliyev Mərkəzində keçirilən “Həyat, ölüm və gözəllik” sərgisində açıq gün səhər saatlarından başlayıb və günün sonunadək davam edib

Bakı:

24 °C

52 %

6 m/s

AZ RU EN

Ana səhifə / Siyasət / Heydər Əliyev Mərkəzində keçirilən “Həyat, ölüm və gözəllik” sərgisində açıq gün səhər saatlarından başlayıb və günün sonunadək davam edib

Heydər Əliyev Mərkəzində keçirilən “Həyat, ölüm və gözəllik” sərgisində açıq gün səhər saatlarından başlayıb və günün sonunadək davam edib

07.08.2013 [09:08]

XX əsrin məşhur rəssamı Endi Vorholun Heydər Əliyev Mərkəzində keçirilən “Həyat, ölüm və gözəllik” sərgisində avqustun 6-da açıq gün olub.
AzərTAc xəbər verir ki, böyük sənətkarın 85 illik yubileyi münasibətilə elan edilən açıq gündə bütün ziyarətçilər sərgiyə sərbəst şəkildə tamaşa etmək hüququ qazanıblar.
Sərgidə XX əsrin pop-art sənətinin məşhur simasının 100-dən çox əsəri, kiçik filmləri nümayiş olunur.
Azərbaycanda ilk dəfə keçirilən bu sərgi yerli sakinlər və turistlər arasında böyük maraqla qarşılanıb. Bu günədək 2000-dən çox ziyarətçi Endi Vorholun müxtəlif illərdə çəkdiyi “Güllər” (Flower), Kamuflyaj” (Camuflaje), “Sonuncu şam yeməyi” (The Last Supper), “Dua edən kişi əlləri” (Male hand Praying), “Elektrik stulu” (Electric Chair), “Nəsli kəsilməkdə olan növlər”, “İntibah rəsmlərindən fraqmetlər”, “Avtoportret”, “Azadlıq heykəli” və digər dünya şöhrətli əsərləri ilə tanış olmaq imkanı əldə ediblər.
Sərgini ziyarət edən insanlar öz təəssüratlarını bölüşüblər. Onlar məşhur rəssamın yaradıcılığı barədə məlumatlarının olduğunu söyləyərək qüdrətli fırça ustasının əsərlərində bir çox mövzuları əks etdirdiyini və bunların hər kəsin yaddaşında dərin iz buraxdığını bildiriblər. Ziyarətçilər dünya şöhrətli rəssamın yaradıcılığının özünəməxsusluğu ilə seçildiyini söyləyib və onun əsərlərinin Azərbaycanda sərgilənməsinin xoş hadisə olduğunu qeyd ediblər. Onlar sərginin davam etdiyi müddətdə yenə də bu gözəl məkanı ziyarət etməyi düşündüklərini söyləyiblər.
Sərgidə açıq gün səhər saatlarından başlayıb və günün sonunadək davam edib.
Ümumiyyətlə, Mərkəzdə iyunun 21-də Heydər Əliyev Fondunun və Endi Vorhol Muzeyinin birgə dəstəyi ilə açılmış sərgi sentyabrın 18-dək davam edəcək. Bu sərgi Heydər Əliyev Mərkəzinin mədəniyyətlərin bir-birinə qovuşması, xalqlar arasında dialoqun yaranması istiqamətində uğurlu layihələrindən hesab olunur.
Endu Vorhol 1928-ci il avqustun 6-da Pitsburqda (ABŞ, Pensilvaniya ştatı) dünyaya gəlib. Mərhum sənətkar rəssamlıqla yanaşı, kinoprodüser, kinoaktyor, fotoqraf, reklam meneceri kimi də fəaliyyət göstərib.
XX əsrin məşhur rəssamlarından olan Endi Vorholun əsərləri indiyədək dünyanın əksər muzey və rəsm qalereyalarında sərgilənib.

Paylaş:

Baxılıb: 1177 dəfə