Qiymətli kağızlar bazarı Azərbaycanda maliyyə sisteminin fəaliyyətində böyük rol oynayır

Bakı:

24 °C

55 %

6 m/s

Əlaqə

AZ RU EN

Ana səhifə / Siyasət / Qiymətli kağızlar bazarı Azərbaycanda maliyyə sisteminin fəaliyyətində böyük rol oynayır

Qiymətli kağızlar bazarı Azərbaycanda maliyyə sisteminin fəaliyyətində böyük rol oynayır

07.09.2013 [09:26]

Dünən Bakıda Qiymətli Kağızlar üzrə Dövlət Komitəsinin (QKDK) yaradılmasının 15-ci ildönümünə həsr olunmuş “Yeni erada kapital bazarlarının tənzimlənməsi: tənzimləyici və bazar institutlarına yenidən baxış” mövzusunda beynəlxalq elmi-praktik konfrans keçirilib.
“Kapital bazarlarının modernləşdirilməsi” layihəsi (CMMP) və Avrasiya Fond Birjaları Federasiyasının (FEAS) birgə təşkilatçılığı ilə keçirilən konfransda 15 ölkədən 100-dən çox nümayəndə iştirak edib.
Maliyyə naziri Samir Şərifov konfransdakı çıxışında 15 il əvvəl Azərbaycanda qiymətli kağızlar bazarının peşəkar iştirakçılarının tənzimləyici qurumunun yaradılmasını bazar iqtisadiyyatı prinsiplərinin bərqərar olunması və ölkəmizdə 1994-1995-ci illərdə həyata keçirilən köklü iqtisadi islahatların məntiqi nəticəsi kimi qiymətləndirib. Belə ki, o vaxt Azərbaycanda qiymətli kağızlar bazarının fəaliyyəti üçün vacib amillərdən biri olan özəlləşməyə start verilib və ölkədə özəl sahibkarlar təbəqəsi yaranmağa başlanılıb. Bu islahatların davamı olaraq 1998-ci ildə Ümummilli lider Heydər Əliyev tərəfindən Qiymətli Kağızlar üzrə Dövlət Komitəsinin yaradılması haqqında Fərman imzalanıb.
Qiymətli Kağızlar üzrə Dövlət Komitəsinin sədri Rüfət Aslanlı Azərbaycanda qiymətli kağızlar bazarının yaradılması, formalaşması və mövcud vəziyyəti barədə danışıb. Komitə sədri deyib ki, qiymətli kağızlar bazarı Azərbaycanda maliyyə sisteminin fəaliyyətində böyük rol oynayır: “Ölkəmizdə fond bazarı özəlləşdirmə prosesində yaradılmağa başlayıb və hazırda müasir texniki tələblərə cavab verən, investorlar, emitent və digər bazar iştirakçıları üçün imkanlar yaradan maliyyə sisteminin bir seqmentidir”.
Konfransda çıxış edən Mərkəzi Bankın sədri Elman Rüstəmov bildirib ki, Ümummilli lider Heydər Əliyevin şəxsi təşəbbüsü və qərarı ilə yaradılmış Qiymətli Kağızlar üzrə Dövlət Komitəsi ötən 15 il ərzində uğurlu inkişaf yolu keçib: “Komitə ölkəmizdə gedən nəhəng institusional quruculuq proseslərində mühüm rol oynayıb və o cümlədən dayanıqlı maliyyə sisteminin formalaşmasında böyük əhəmiyyət kəsb edib”.
Azərbaycanın əsas makroiqtisadi göstəriciləri barədə də məlumat verən Mərkəzi Bankın sədri vurğulayıb ki, irihəcmli strateji ehtiyatlar, makroiqtisadi sabitlik, stabil valyuta siyasəti kimi amillər ölkədə müasir və inkişaf edən qiymətli kağızlar bazarının fəaliyyəti üçün əsas yaradır.
Milli Məclisin İqtisadi siyasət komitəsinin sədri, akademik Ziyad Səmədzadə ölkədə qiymətli kağızlar bazarının formalaşmasından, keçdiyi inkişaf yolundan, QKDK-nın yaradılmasında Ümummilli lider Heydər Əliyevin əvəzsiz rolundan danışıb.
Konfransın “İnkişaf etməkdə olan ölkələrdə kapital bazarı tənzimlənməsi: Düzgün balansı necə müəyyən etməli?” adlı birinci panelində və “Kapital bazarlarının peşəkar iştirakçılarının tənzimləyici mühitdə dəyişikliklərə uyğunlaşması” adlı ikinci panelində məruzələr dinlənilib, müzakirələr aparılıb.
Nadir AZƏRİ

Paylaş:

Baxılıb: 1228 dəfə