Azərbaycanın xarici işlər naziri BMT Təhlükəsizlik Şurasında atıcı və yüngül silahların tətbiqi və yayılması məsələlərinə dair bəyanat verib

Bakı:

17 °C

67 %

7 m/s

AZ RU EN

Ana səhifə / Siyasət / Azərbaycanın xarici işlər naziri BMT Təhlükəsizlik Şurasında atıcı və yüngül silahların tətbiqi və yayılması məsələlərinə dair bəyanat verib

Azərbaycanın xarici işlər naziri BMT Təhlükəsizlik Şurasında atıcı və yüngül silahların tətbiqi və yayılması məsələlərinə dair bəyanat verib

30.09.2013 [09:49]

Nyu-Yorkda BMT Baş Məclisinin 68-ci sessiyasında iştirak edən Azərbaycan Respublikasının xarici işlər naziri Elmar Məmmədyarov atıcı və yüngül silahların istifadəsi məsələlərinə dair bəyanatla çıxış edib.
BMT Təhlükəsizlik Şurasında Avstraliyanın sədrliyi dövründə atıcı və yüngül silahların istifadəsi məsələlərinə dair görülmüş işləri dəstəkləyən, sessiyada problemə dair məlumat verilməsinə görə BMT-nin baş katibinə və Beynəlxalq Qızıl Xaç Komitəsinin vitse-prezidentinə minnətdarlığını bildirən E.Məmmədyarov bu məsələnin müzakirə olunmasının əhəmiyyətini vurğulayıb. Bildirib ki, bu, Təhlükəsizlik Şurasının münaqişə və postmünaqişə vəziyyətlərində atıcı və yüngül silahlardan istifadə olunması məsələlərinə dair qərarlarının səmərəliliyini qiymətləndirməyə, möhkəmləndirmə və reaksiyavermə metodlarını nəzərdən keçirməyə imkan verir. Bu da öz növbəsində müvafiq beynəlxalq öhdəliklərin yerinə yetirilməsinə təkan verəcək.
Diplomat vurğulayıb ki, atıcı və yüngül silahların qanunsuz yerdəyişməsi, pozucu akkumulyasiyası və düzgün tətbiq edilməməsi böyük problemlər, o cümlədən münaqişə və zorakılıq üçün şərait yaradır. Azərbaycan atıcı və yüngül silahların qanunsuz istehsalının, yerdəyişməsinin və dövr etməsinin, lazımsız akkumulyasiyasının və nəzarətsiz proliferasiyasının qarşısının alınmasına və aradan qaldırılmasına dair beynəlxalq təşəbbüs və metodları tam dəstəkləyir.
Bəyanatda deyilir ki, Azərbaycan yuxarıda deyilən məsələlər üzrə bütün öhdəlikləri yerinə yetirmək və məqsədə çatmaq üçün dövlət, regional və qlobal səviyyələrdə müvafiq tədbirlər görməyə davam edir.
Sonra E.Məmmədyarov Azərbaycan ərazilərinin Ermənistan tərəfindən davamlı işğalının yaratdığı ciddi maneələrdən söz açıb. Beynəlxalq hüquq normalarını və üzvü olduğu təşkilatların müvafiq regional sənədlərinin bəndlərini pozan Ermənistan Azərbaycanın işğal edilmiş ərazilərində hərbi potensialını artırmaqda davam edir. Atıcı, yüngül və adi silahlar beynəlxalq birliyin nəzarətində olmayan işğal edilmiş ərazilərə külli miqdarda daxil olmaqdadır.
Nazir sonda bildirib ki, Azərbaycan Ermənistan tərəfindən işğal edilmiş ərazilərində bu dövlətin atıcı və yüngül silahları, habelə digər adi silahları qanunsuz şəkildə yerdəyişməsi barədə beynəlxalq birliyi dəfələrlə məlumatlandırıb. Biz bütün dövlətlərə müraciət edərək, onları Azərbaycanın suverenliyini və ərazi bütövlüyünü pozan, regionumuzda sülhün və tərəqqinin bərqərar olunmasına əngəl törədən belə qanunsuz hərəkətlərə yol verməməyə, onları pisləməyə və qarşısını almağa çağırırıq.

Paylaş:

Baxılıb: 958 dəfə