AŞPA: Prezident İlham Əliyev səslərin böyük əksəriyyətini toplayaraq qələbə qazanıb

Bakı:

15 °C

72 %

6 m/s

Əlaqə

AZ RU EN

Ana səhifə / Siyasət / AŞPA: Prezident İlham Əliyev səslərin böyük əksəriyyətini toplayaraq qələbə qazanıb

AŞPA: Prezident İlham Əliyev səslərin böyük əksəriyyətini toplayaraq qələbə qazanıb

11.10.2013 [10:19]

Məlum olduğu kimi, dünən AŞPA və Avropa Parlamentindən olan bir qrup müşahidəçinin Azərbaycanda keçirilən 9 oktyabr prezident seçkiləri ilə bağlı birgə mətbuat konfransı baş tutub. Hər iki qurumun müşahidə missiyaları hesab edir ki, Azərbaycanda seçki prosesi azad, ədalətli və şəffaf keçirilib.
Avropa Parlamentinin müşahidə missiyasının rəhbəri Pino Arlakki dinc seçki münasibətilə Azərbaycan xalqını təbrik edib: “Biz sizə dərs keçmək üçün deyil, seçkini müşahidə etmək məqsədilə bura gəlmişik. Bizim müşahidəmizə görə, seçki dinc atmosferdə keçdi. Biz seçicilərə hər hansı təzyiq faktını müşahidə etmədik”.
Seçkiləri müşahidə edən AŞPA nümayəndə heyətinin rəhbəri Robert Uolter isə deyib ki, AŞPA-nın 7 üzvündən ibarət nümayəndə heyəti ilə Azərbaycana bir ay əvvəl gəliblər. Uzunmüddətli müşahidə missiyasının seçkiqabağı prosesi diqqətlə izlədiyini qeyd edən R.Uolter seçki günü 30 millət vəkilindən ibarət heyətlə müşahidə apardıqlarını deyib.
Daha sonra KİV nümayəndələrinin suallarını cavablandıran müşahidəçilər sonuncu seçkiləri demokratiya quruculuğu yolunda irəliləyən Azərbaycanın irəliyə doğru addımı kimi qiymətləndirərək, görüləsi işlərin də olduğunu deyiblər.
R.Uolter qeyd edib ki, müşahidəçilər səslərin sayılması prosesində də iştirak ediblər və qanun pozuntusuna rast gəlməyiblər: “Bütün bunların nəticəsində deyə bilərəm ki, Prezident İlham Əliyev səslərin böyük əksəriyyətini toplayaraq qələbə qazanıb”.
“Yeni Azərbaycan” qəzetinin baş redaktoru Hikmət Babaoğlu sual verərək öz torpaqlarında səs verə bilməyən Azərbaycandakı 1 milyondan artıq qaçqın və məcburi köçkünün işğal səbəbindən hüquqlarının pozulmasının AŞPA və Avropa Parlamentinin seçkilərlə bağlı rəyində əksini tapmamasının səbəbini soruşub. AŞPA nümayəndə heyətinin rəhbəri R.Uolter cavabında bildirib ki, Avropa Şurası digər üzv dövlətlər kimi Azərbaycanın da ərazi bütövlüyünə hörmətlə yanaşır. O deyib ki, müşahidə missiyası Minsk qrupunun münaqişəni nizamlamaq fəaliyyətinə münasibət bildirə bilməz. Lakin müşahidələr onu göstərib ki, məcburi köçkünlərin seçkilərdə öz səslərini verməsinə normal şərait yaradılıb.
H.Babaoğlunun, həmçinin, seçkilərdə uduzan tərəfin siyasi mədəniyyət nümayiş etdirərək məğlubiyyəti qəbul etməsinə çağırışın AŞPA və Avropa Parlamentinin seçkilərlə bağlı hesabatına salınmasının mümkünlüyü barədə sualına cavabında R.Uolter deyib ki, müxtəlif uğursuz namizədlərin seçkinin nəticələrini tanıyıb-tanımaması siyasi məsələdir və bununla bağlı suallar onlara ünvanlanmalıdır.
Hülya

Paylaş:

Baxılıb: 1013 dəfə