“The Japan Times” qəzetində Azərbaycanda Prezident seçkilərinə həsr edilmiş məqalə dərc olunub

Bakı:

24 °C

52 %

6 m/s

Əlaqə

AZ RU EN

Ana səhifə / Siyasət / “The Japan Times” qəzetində Azərbaycanda Prezident seçkilərinə həsr edilmiş məqalə dərc olunub

“The Japan Times” qəzetində Azərbaycanda Prezident seçkilərinə həsr edilmiş məqalə dərc olunub

27.11.2013 [09:39]

Yaponiyanın nüfuzlu, ölkədə çalışan diplomatik korpus və iş adamları üçün nəşr edilən “The Japan Times” qəzetində “2013 Presidential Elections in Azerbaijan” (“Azərbaycanda 2013-cü il Prezident seçkiləri”) adlı məqalə dərc edilib.
Məqalənin müəllifi ölkəmizin Yaponiyadakı səfiri Gürsel İsmayılzadə yazır ki, oktyabrın 9-da Azərbaycanda seçkilər açıq və ədalətli keçirilib. Azərbaycan xalqı sərbəst səs hüququnu ifadə edərək, sandıq başına gəlib və böyük əksəriyyət Prezident İlham Əliyevin namizədliyini dəstəkləyib. 2013-cü il seçkiləri ölkəmizin demokratik cəmiyyətin gücləndirilməsi istiqamətində atdığı tarixi bir addımdır.
Məqalədə qeyd edilir ki, seçicilərin yüksək fəallığı ilə seçilən seçkilərdə bütün ölkə üzrə qeydə alınan 5,15 milyon seçicinin 72 faizi iştirak edib. Bildirilir ki, seçki prosesini 100 ölkədən və 50 beynəlxalq təşkilatdan 1400 müşahidəçi izləyib. Seçkilərin yüksək texniki təminatını vurğulayan səfir, seçki məntəqələrində min ədəd vebkameranın quraşdırıldığını xüsusi vurğulayıb.
Qeyd olunur ki, Avropa Şurası Parlament Assambleyası və Avropa Parlamentindən olan müşahidəçilər Azərbaycanın tərəqqisini qeyd edərək, seçkilərin azad, ədalətli və şəffaf keçdiyini bildiriblər. Həmin təşkilatlar seçkiləri peşəkar və dinc seçki günü kimi xarakterizə ediblər.
Məqalədə vurğulanır ki, Azərbaycan sabit inkişaf edən iqtisadiyyatı və sabit siyasi sistemi ilə sürətlə inkişaf edən gənc demokratik ölkədir. Prezident İlham Əliyev 2003-cü ildə hakimiyyətə gəldiyi vaxtdan davamlı iqtisadi artım və yeni iş yerlərinin yaradılması istiqamətində ardıcıl iş aparır. Adambaşına düşən ümumi daxili məhsul 1990-cı ildəki 346 ABŞ dollarından 2012-ci ildə 7490 dollara çatıb. Azərbaycan regional liderə və beynəlxalq münasibətlərdə etibarlı tərəfdaşa çevrilib.
Ölkəmizin dünyanın enerji təhlükəsizliyində mühüm rolundan danışan müəllif Bakı-Tbilisi-Ceyhan əsas neft ixrac kəməri və Bakı-Tbilisi-Ərzurum, Trans-Anadolu (TANAP) və Trans-Adriatik (TAP) qaz kəmərləri haqqında oxuculara ətraflı məlumat verir.
Müəllif Prezident İlham Əliyevin qətiyyətli siyasəti nəticəsində Azərbaycanın dini tolerantlıq ənənələrini qoruyub saxlaması, burada müxtəlif dinlərin və millətlərin nümayəndələrinin dinc yanaşı yaşaması barədə də danışır.
Azərbaycanın beynəlxalq səhnənin əsas aktorları ilə normal əlaqələr saxladığını qeyd edən səfir, ölkənin daim dəyişən beynəlxalq mühitə uğurla adaptasiya olunduğunu, cəmi 22 il bundan əvvəl müstəqilliyini bərpa etməsinə baxmayaraq, regionun lider dövlətinə çevrildiyini xüsusi vurğulayır. Qeyd edir ki, 155 ölkənin dəstəyi ilə Azərbaycanın BMT Təhlükəsizlik Şurasına qeyri-daimi üzv seçilməsi bunun bariz nümunəsidir.
Məqalədə qeyd edilir ki, son illərdə Azərbaycan “Eurovision” mahnı müsabiqəsinin, artıq ənənəyə çevrilmiş Mədəniyyətlərarası Dialoq Forumu və Bakı Beynəlxalq Humanitar Forumu kimi yüksək səviyyəli beynəlxalq tədbirlərin keçirildiyi məkana çevrilib. 2015-ci ildə isə ölkəmiz ilk Avropa Oyunlarına ev sahibliyi edəcəkdir.
Məqalə Prezident İlham Əliyevin son çıxışlarından birində dediyi “Azərbaycan demokratik ölkə kimi uğurlu inkişafını davam etdirəcəkdir” sözləri ilə başa çatır.

Paylaş:

Baxılıb: 1014 dəfə