Azərbaycan Tibb Universitetində “İİV müayinəsi ilə bağlı Avropa həftəliyi” kampaniyası çərçivəsində tədbir keçirilib

Bakı:

25 °C

58 %

6 m/s

AZ RU EN

Ana səhifə / Siyasət / Azərbaycan Tibb Universitetində “İİV müayinəsi ilə bağlı Avropa həftəliyi” kampaniyası çərçivəsində tədbir keçirilib

Azərbaycan Tibb Universitetində “İİV müayinəsi ilə bağlı Avropa həftəliyi” kampaniyası çərçivəsində tədbir keçirilib

30.11.2013 [10:56]

Noyabrın 29-da Azərbaycan Tibb Universitetinin Tədris Cərrahiyyə Klinikasında “İİV müayinəsi ilə bağlı Avropa həftəliyi” kampaniyası çərçivəsində tədbir keçirilib.
Rusiya Azərbaycanlı Gənclər Birliyinin (RAGB) təşkil etdiyi tədbirdə universitetin müəllim və tələbələri, Respublika QİÇS ilə Mübarizə Mərkəzinin nümayəndələri iştirak ediblər.
Tədbirdə çıxış edən RAGB-nin tibb üzrə əlaqələndiricisi Samir Əliyev dünya səhiyyəsinin infeksion xəstəliklər sahəsində ən ciddi problemlərindən biri olan QİÇS-in kəşfi və tədqiqi tarixindən danışıb.
ATU-nun elmi işlər üzrə prorektoru, professor İbrahim İsayev deyib ki, Azərbaycan bu il ilk dəfə olaraq Avropa regionunda noyabrın 22-dən 29-dək keçirilən “İİV müayinəsi ilə bağlı Avropa həftəliyi”nə qoşulub. Bununla bağlı Azərbaycanın bir neçə regionunda, o cümlədən Bakı şəhərindəki ali və orta ixtisas təhsili müəssisələrində tələbələrin iştirakı ilə belə aksiyalar keçirilir. Məqsəd dünyada geniş yayılan bu təhlükəli xəstəliklə mübarizə üzrə səylərin gücləndirilməsidir.
Respublika QİÇS ilə Mübarizə Mərkəzinin direktoru Esmira Alməmmədova Azərbaycanda İİV/QİÇS ilə bağlı epidiomoloji vəziyyət və bu xəstəliklərə qarşı görülən mübarizə tədbirləri barədə ətraflı məlumat verib.
Azərbaycanda İİV-ə yoluxanların sayının aşağı səviyyədə olduğunu qeyd edən E.Alməmmədova deyib ki, ölkəmizdə qadınlarla müqayisədə kişilər arasında İİV-ə yoluxma faizi üstünlük təşkil edir. Bu göstərici kişilərdə 80, qadınlarda isə 20 faizdir. Gənclər arasında da İİV-ə yoluxma faktları qeydə alınır. İİV-ə yoluxanların 35 faizi 40-49 yaşlı insanlardır.
Ölkəmizdə İİV-ə yoluxanların 30,3 faizinin məhbuslar təşkil etdiyini diqqətə çatdıran E.Alməmmədova deyib ki, bu virusa yoluxmanın qarşısının alınması yolu vaxtında testdən keçməkdir. 1 dekabr - Dünya QİÇS ilə Mübarizə Günü ilə bağlı tədbirlər planı müəyyənləşdirilib. Sərnişin nəqliyyatı ilə yanaşı, ticarət və digər ictimai iaşə mərkəzlərində də İİV ilə bağlı müayinələrə başlanılıb.
Digər çıxış edənlər də İİV/QİÇS-in təkcə tibbi problem deyil, həm də ciddi sosial-iqtisadi və hüquqi problem olduğunu bildiriblər, bu xəstəliklərlə mübarizədə əhalinin məlumatlandırılmasının vacibliyini vurğulayıblar.
Nəzərə çatdırılıb ki, bu problemin həlli yolunda Səhiyyə Nazirliyi əhali arasında vaxtaşırı maarifləndirmə tədbirlərini və beynəlxalq təşkilatlarla əməkdaşlığı davam etdirir.
Tədbirdə Rusiyanın “Krasnaya lentoçka” sosial informasiya kampaniyasının QİÇS ilə bağlı hazırladığı film nümayiş etdirilib.

Paylaş:

Baxılıb: 1036 dəfə