Bakıda BƏƏ-nin birləşməsinin 42-ci ildönümü münasibəti ilə rəsmi qəbul təşkil edilib

Bakı:

24 °C

52 %

6 m/s

Əlaqə

AZ RU EN

Ana səhifə / Siyasət / Bakıda BƏƏ-nin birləşməsinin 42-ci ildönümü münasibəti ilə rəsmi qəbul təşkil edilib

Bakıda BƏƏ-nin birləşməsinin 42-ci ildönümü münasibəti ilə rəsmi qəbul təşkil edilib

04.12.2013 [08:37]

Dekabrın 2-də Birləşmiş Ərəb Əmirliklərinin (BƏƏ) Azərbaycandakı səfirliyi ölkənin dövlət quruculuğunun 42-ci ildönümü münasibəti ilə rəsmi qəbul təşkil edib. Tədbir hər iki ölkənin dövlət himnlərinin səslənməsi ilə başlayıb.
Daha sonra çıxış edən Birləşmiş Ərəb Əmirliklərinin Azərbaycandakı fövqəladə və səlahiyyətli səfiri Salem Xalifa Mohamed Əl-Ğafli bildirib ki, 2 dekabr Birləşmiş Ərəb Əmirliklərinin tarixində xüsusi bir gündür. Onun sözlərinə görə, 42 il əvvəl bu tarixdə yeddi əmirliklərin hakimləri bir araya gələrək, insanların rifahını və əmin-amanlığını təmin edən böyük bir ittifaq yaradıblar.
Diplomat qeyd edib ki, bu yaxınlarda Birləşmiş Ərəb Əmirliklərinin Dubay şəhəri “EXPO-2020” sərgisinə ev sahiblik etməyə hüquq qazanıb və buna görə ölkəsi beynəlxalq ictimaiyyətə öz təşəkkürünü bildirib: “Dubayın məşhur və qədim şəhərlərlə güclü və ədalətli mübarizədən sonra 2020-ci ildə keçiriləcək “EXPO” sərgisinə ev sahibi seçilməsi bizim sevincimizi daha da artırdı. Bu seçimə görə beynəlxalq ictimaiyyətə öz təşəkkürümüzü bildiririk. Böyük bir inamla deyə bilərik ki, Dubay bu sərgini çox yüksək bir səviyyədə təşkil edəcək”.
Azərbaycan-Birləşmiş Ərəb Əmirlikləri əlaqələrindən danışan diplomat deyib ki, ölkələrimiz arasındakı münasibətlər qarşılıqlı hörmətə, səmimi qardaşlığa, bunları daha da gücləndirən İslam irsinə və müştərək tarixə əsaslanır. Son illərdə iqtisadi əməkdaşlığımızın daha da gücləndiyini vurğulayan səfir əmin olduğunu bildirib ki, BƏƏ-Azərbaycan əlaqələrinin inkişafı bundan sonra da davam edəcək.
Azərbaycanın iqtisadiyyat və sənaye naziri Şahin Mustafayev Prezident İlham Əliyevin Birləşmiş Ərəb Əmirlikləri xalqına təbriklərini, sülh və əmin-amanlıq arzularını çatdırıb. Azərbaycanla Birləşmiş Ərəb Əmirlikləri arasında siyasi əlaqələrinin yüksək səviyyədə olduğunu vurğulayan nazir ölkələrimizin mövqelərinin beynəlxalq məsələlərdə də üst-üstə düşdüyünü diqqətə çatdırıb. Ş.Mustafayev əməkdaşlığımızın genişləndirilməsində yüksək səviyyəli qarşılıqlı səfərlərin rolunu vurğulayıb. Nazir 2006-cı ildə Prezident İlham Əliyevin Birləşmiş Ərəb Əmirliklərinə rəsmi səfərinin əlaqələrimizin inkişafına təkan verdiyini söyləyib. İki ölkə arasında möhkəm müqavilə-hüquq bazasının yaradıldığını qeyd edən nazir 20-dən çox sənədin imzalandığını bildirib.
Nazir diqqətə çatdırıb ki, Azərbaycan-Birləşmiş Ərəb Əmirlikləri hökumətlərarası komissiyanın fəaliyyəti, hər iki ölkənin iş adamları arasında işgüzar münasibətlərin stimullaşdırılması, yeni tərəfdaşlıq əlaqələrinin qurulması istiqamətində həyata keçirilən tədbirlər, təşkil edilən sərgilərdə və forumlarda birgə iştirak iqtisadi əməkdaşlığımızın inkişafının bariz nümunəsidir.
Qəbulda dövlət və hökumət rəsmiləri, Milli Məclisin deputatları, səfirlər, ictimaiyyətin nümayəndələri iştirak ediblər.
NADİR

Paylaş:

Baxılıb: 1045 dəfə