Siyavuş Novruzov: Onların hamısı ölü candır

Bakı:

26 °C

53 %

5 m/s

Əlaqə

AZ RU EN

Ana səhifə / Siyasət / Siyavuş Novruzov: Onların hamısı ölü candır

Siyavuş Novruzov: Onların hamısı ölü candır

13.02.2014 [09:24]

“Bu gün “Milli şura” Azərbaycanda ictimai-siyasi proseslərə milçəyin vızıltısı qədər təsir etmək imkanında deyil”
Yeni Azərbaycan Partiyası İcra katibinin müavini, millət vəkili Siyavuş Novruzov “Milli şura”nın sədri Cəmil Həsənli və “El” Hərəkatının sədri Eldar Namazov arasında yaranan gərginliyə münasibət bildirib.
S.Novruzov APA-ya açıqlamasında deyib ki, bu gün siyasi partiya yaratmağa hazırlaşan E.Namazovun siyasi iddiası olub.
“Milli şura”nın E.Namazovun ideyalarından biri olduğunu deyən S. Novuzov bildirib ki, “Milli şura”da Rüstəm İbrahimbəyov aldadıcı amilmiş: “Çünki əvvəldən də bilirdilər ki, onun ikili vətəndaşlığı, başqa ölkə qarşısında öhdəliyi var, 10 ildən artıqdır, Azərbaycanda yaşamır, prezidentliyə namizəd ola bilməz. Eldar Namazov da bilirdi ki, “Milli şura”da Rüstəm İbrahimbəyovun prezidentliyə namizədliyi məsələsi alınmayacaq. Partiyalara gəlincə, AXCP Müsavat Partiyası başqanının, Müsavat Partiyası isə AXCP sədrinin prezidentliyə namizədliyinə razı olmayacaqdı. Sonrakı dövrdə də gördük ki, bu partiyalar bir-birinə qarşı nə dərəcədə aqressiv münasibətdədir. Digər partiyalar haqqında da eyni sözü demək olar. Eldar Namazovun yeganə ümidi və qurduğu tor ondan ibarət idi ki, Rüstəm İbrahimbəyov variantı olmadığı təqdirdə, özünün “Milli şura”nın İcra Aparatının rəhbəri kimi əvəzedici qismində prezidentliyə namizədliyinin irəli sürülməsinə nail olsun. Lakin “Milli şura”da bunu başa düşən qüvvələr Eldar Namazovun namizəd olmaması üçün Cəmil Həsənlinin namizədliyini irəli sürərək dəstəklədilər. Belə olan təqdirdə seçki dövründə Eldar Namazov faktiki bu proseslərə qoşulmadı. “Milli şura”dakılar indi çıxışlarında da qeyd edirlər ki, Eldar Namazov nə mitinqlərin təşkilində, nə imzatoplama, nə də təbliğat-təşviqat kampaniyasında iştirak etdi. Eldar Namazovun “Milli şura”da yaratdığı komissiyalar da seçki kampaniyasında iştirak etməyib. Cəmil Həsənli və Eldar Namazov arasında qarşıdurmanın səbəbi bunlardır. Digər tərəfdən, Cəmil Həsənlinin Azərbaycanda kifayət qədər hörmətinin olmaması, cəmiyyətdə qəbul edilməməsi, İsa Qəmbərin də dediyi kimi, ziyalıların böyük əksəriyyətinin Cəmil Həsənlini yaxşı tanıdığından onu dəstəkləməməsi fonunda “Milli şura”nın seçki prosesində iştirakı çox zəif oldu. Beləliklə, “Milli şura”da toplaşan müxalifətin bir hissəsinin namizədi çox acınacaqlı şəkildə məğlubiyyətə uğradı”.
S.Novruzov “Milli şura” və “El” hərəkatının artıq məhv olmuş qurumlar olduğunu vurğulayıb: “Milli şura” anadan ölü doğulmuş uşaqdır. Burada təmsil olunan insanlar ayrı-ayrı partiyalarda təmsil olunurlar, bir ildə beş təşkilat dəyişirlər. İndi də “Milli şura”nın siyasi qurum kimi fəaliyyət göstərməsi ideyasını ortaya atıblar. O cümlədən Eldar Namazov “El” hərəkatını partiyaya çevirmək ideyasını irəli sürüb. “Milli şura”da Cəmil Həsənlidən başqa adam qalmayıb. Vaxtilə çıxışlarımda demişdim ki, Cəmil Həsənli tərəzidəki boyun əti kimi ortada qalacaq, bu gün də qalıb. Əksəriyyət “Milli şura”dan istefa verib. Özünə yer tapa bilməyən iki-üç adam qalıb, onlar da yer tapan kimi gedəcəklər. Bu gün “Milli şura” Azərbaycanda ictimai-siyasi proseslərə milçəyin vızıltısı qədər təsir etmək imkanında deyil. “El” hərəkatı da faktiki yoxdur. Orada da 2-3 nəfər vardı, həmin adamlar “Milli şura”da idilər. Sadəcə, bu adamlar öz rollarını oynadılar, xaricdən vəsaitlərini aldılar, satqınlıqlarını göstərdilər. Öz dairələrinə, ağalarına Azərbaycan haqqında düzgün olmayan məlumat verdilər, seçki prosesinə kölgə salmağa çalışdılar. Lakin bunların heç biri baş tutmadı. Azərbaycan xalqı və Prezident bir yerdə oldu. Onların isə hamısı artıq məhv olmuş ölü candır”.

Paylaş:

Baxılıb: 1019 dəfə