Yeni hədəflərə çatmaq üçün qarşıda böyük vəzifələr durur

Bakı:

21 °C

78 %

4 m/s

Əlaqə

AZ RU EN

Ana səhifə / Siyasət / Yeni hədəflərə çatmaq üçün qarşıda böyük vəzifələr durur

Yeni hədəflərə çatmaq üçün qarşıda böyük vəzifələr durur

07.10.2026 [12:10]

Yeni Azərbaycan Partiyasının VIII Qurultayı Azərbaycanın ictimai-siyasi həyatında mühüm hadisə olmaqla yanaşı, yeni tarixi mərhələdə ölkəmiz qarşısında dayanan strateji vəzifələrin müəyyənləşdirilməsi baxımından xüsusi əhəmiyyət daşıyır. Qurultayın Azərbaycanın ərazi bütövlüyünün və suverenliyinin tam bərpa edilməsindən sonra ilk dəfə keçirilməsi isə yeni reallıqlar şəraitində Azərbaycanın siyasi qüdrətini, o cümlədən YAP-ın , Cənubi Qafqazın ən böyük siyasi qüvvəsi kimi proseslərdə aktiv iştirakını nümayiş etdirdi. Qurultay bu baxımdan son 5 ildə ölkəmizdə baş verən ictimai-siyasi, iqtisadi prosesləri təhlil edərək yeni inkişaf gündəliyinin və ideoloji-siyasi kursun müasir prioritetlərinin müəyənləşdirilməsi baxımından mühüm əhəmiyyət kəsb edir. Bu barədə YAP üzvü, Milli Məclisin deputatı Aydın Hüseynov bildirib.

A.Hüseynov qeyd edib ki, Prezident, Yeni Azərbaycan Partiyasının Sədri cənab İlham Əliyevin qurultayda çıxışı tədbirin əsas siyasi məzmununu müəyyənləşdirdi. Dövlət başçısı YAP-ın ölkənin ictimai-siyasi həyatındakı rolunu yüksək qiymətləndirərək partiyanın fəaliyyətinin və siyasi xəttinin təkcə Azərbaycan üçün deyil, bütövlükdə region üçün mühüm əhəmiyyət daşıdığını vurğuladı. Qurultayda verilən mesajlar göstərir ki, Azərbaycanın yeni inkişaf mərhələsində yalnız əldə edilmiş nəticələrin qorunması deyil, eyni zamanda qarşıya qoyulmuş yeni hədəflərə çatmaqda fəaliyyətin daha da gücləndirilməsi əsas məqsədlərdən biridir. Güclü dövlət, dayanıqlı iqtisadiyyat, yüksək sosial rifah, müasir ordu, milli həmrəylik və fəal xarici siyasət Azərbaycanın gələcək inkişafının əsas dayaqlarıdır: “Dövlət başçısının qeyd etdiyi kimi, Azərbaycanın qarşısında duran əsas vəzifələrdən biri əldə olunmuş siyasi və hərbi nəticələrin davamlılığını təmin etmək, ölkənin təhlükəsizliyini və müdafiə qabiliyyətini daha da gücləndirməkdir. Özünün iqtisadi potensialını daim gücləndirən Azərbaycan yeni geoiqtisadi reallıqlar şəraitində hərbi təhlükəsizliyinin möhkəmləndirilməsi, dövlət sərhədlərinin etibarlı mühafizəsi üçün hərbi-iqtisadi imkanlarını daha da artırmağı mühüm prioritetlər olaraq saxlayacaq”.

A.Hüseynov bildirib ki, son illərdə demokratik dövlət quruculuğu kursuna uyğun olaraq ölkəmizdə dərin islahatlar aparılır, savadlı və intellektual, yaradıcı gənc kadrlar idaretmədə və ictimai-siyasi proseslərdə irəli çəkilirlər. Cənab Prezident gənclərə böyük etimad göstərir, parlamentdə, siyasi strukturlarda onların təmsil olunmasına geniş şərait yaradır. Ölkəmizin aparıcı siyasi təşkilatı olan Yeni Azərbaycan Partiyasında hər zaman yeni çağırışların fəlsəfəsinə uyğun olaraq yenilikçi, gənc kadrlara yer verilib. Bu konteksdən gələcək vəzifələr arasında təşkilati fəaliyyətin təkmilləşdirilməsi, yerli strukturların fəallığının artırılması, ictimai əlaqələrin genişləndirilməsi və yeni informasiya vasitələrindən daha səmərəli istifadə kimi istiqamətlərdə gənclərin üzərinə böyük məsuliyyət düşür. Ona görə də, siyasi təşkilatların gənclərlə münasibətlərində yalnız ənənəvi təşkilati metodlarla kifayətlənməməsi, onların maraq və gözləntilərini nəzərə alması vacib məsələlərdən biridir. Eləcə də gənclərin ideoloji proseslərdə daha fəal iştirakı, şablonçuluqdan yenilikçi yanaşmalara əsaslanan kursa keçmələri vacib amillərdən biridir.

E.CƏFƏRLİ

Paylaş:

Baxılıb: 103 dəfə