“Heydər Əliyev siyasəti: Tolerantlıq” kitabının təqdimatı olub

Bakı:

22 °C

94 %

3 m/s

Əlaqə

AZ RU EN

Ana səhifə / Siyasət / “Heydər Əliyev siyasəti: Tolerantlıq” kitabının təqdimatı olub

“Heydər Əliyev siyasəti: Tolerantlıq” kitabının təqdimatı olub

09.05.2015 [13:14]

Mayın 8-də Dini Qurumlarla İş üzrə Dövlət Komitəsi (DQİDK) Ümummilli lider Heydər Əliyevin anadan olmasının 92-ci ildönümü münasibətilə “Heydər Əliyev siyasəti: Tolerantlıq” kitabının təqdimatını keçirib.
AZƏRTAC xəbər verir ki, təqdimat mərasimində komitənin sədri Mübariz Qurbanlı dahi şəxsiyyət Heydər Əliyevin Azərbaycan xalqı və dövləti qarşısındakı xidmətlərindən danışıb. O, Ulu öndərin həyata keçirdiyi siyasətdə tolerantlığın hər zaman diqqət mərkəzində olduğunu vurğulayıb. Qeyd edib ki, ölkəmizdə bütün konfessiyalara eyni səviyyədə münasibət Ümummilli liderin tolerantlığa verdiyi önəmi bir daha göstərir.
Komitə sədri diqqətə çatdırıb ki, “Elm və təhsil” nəşriyyatında çap olunan kitabda müasir Azərbaycan dövlətinin yaradıcısı, Ümummilli lider Heydər Əliyevin 1993-2003-cü illərdə dövlət-din münasibətlərini, milli mənəvi dəyərlərin qorunmasını, tolerantlıq və multikulturalizm ideyalarını özündə əks etdirən dəyərli çıxışları, nitqləri, görüşləri və təbrikləri yer alıb. Bu topluda yer alan tarixi-xronoloji materiallar Heydər Əliyev irsinin və uğurlu strategiyasının öyrənilməsinə xidmət etməklə yanaşı, həm də Azərbaycanın bütün dünyaya nümayiş etdirdiyi dünyəvilik, tolerantlıq və multikulturalizm ideyalarının əyani vəsaitinə çevriləcək. Geniş oxucu kütləsi üçün nəzərdə tutulmuş bu kitabı oxuyan hər kəs Azərbaycan xalqının xarakterik xüsusiyyətlərindən və cəmiyyətimizdə yüzilliklər ərzində formalaşmış və bu gün də davam etdirilən ənənələrdən qaynaqlanan qarşılıqlı hörmət və birgəyaşayış mədəniyyətinin məhz Ümummilli lider Heydər Əliyev və Prezident İlham Əliyev tərəfindən necə qorunmasının və davamlı şəkildə təbliğ edilməsinin bariz nümunəsi ilə yaxından tanış olacaq.
Qafqaz Müsəlmanları İdarəsi sədrinin birinci müavini Salman Musayev bildirib ki, bütün konfessiyalara eyni səviyyədə münasibət, onların ibadətgahlarını fərq qoymadan ziyarət etmək, müxtəlif dinlərin və xalqların nümayəndələri ilə görüşlər Ulu öndərin tolerantlığa verdiyi önəmi bir daha göstərir. Bu dəyərli kitabda Ulu öndərin dünyanın müqəddəs yerlərinə ziyarətləri, Azərbaycanda tarixi məscidlərin və ibadət yerlərinin bərpasına diqqəti, dini icmalara təbrikləri, müraciətləri və digər materiallar təqdim olunub.
Bakı Dağ yəhudiləri dini icmasının sədri Milix Yevdayev, Rus Pravoslav Kilsəsinin Bakı və Azərbaycan Yeparxiyasının katibi Elnur Əfəndiyev, Azərbaycandakı katolik kilsəsinin baş keşişi ordinari Vladimir Fekete, Avropa yəhudilərinin Bakı dini icmasının sədri Gennadi Zelmanoviç, Azərbaycanın Alban-Udi xristian dini icmasının sədri Robert Mobili və DQİDK sədrinin birinci müavini Səyyad Salahlı çıxış edərək Ulu öndərin Azərbaycanda dövlət-din münasibətləri, milli mənəvi dəyərlərin qorunması, tolerantlıq və multikulturalizm sahəsində həyata keçirdiyi işlər, əldə edilən uğurlar barədə danışıblar.
Digər çıxış edən dini icmaların nümayəndələri də Heydər Əliyev şəxsiyyətinin böyüklüyündən danışıb və nəşrin əhəmiyyətini vurğulayıblar.
Sonda DQİDK-nın dini icmalar arasında ənənəvi olaraq təşkil etdiyi “Heydər Əliyev siyasəti və milli mənəvi dəyərlərimiz” mövzusunda məqalə müsabiqəsinin qalibləri mükafatlandırılıb.

Paylaş:

Baxılıb: 751 dəfə