Avropa Parlamenti nümayəndə heyətinin Azərbaycanda görüşləri başlayıb

Bakı:

25 °C

53 %

2 m/s

Əlaqə

AZ RU EN

Ana səhifə / Siyasət / Avropa Parlamenti nümayəndə heyətinin Azərbaycanda görüşləri başlayıb

Avropa Parlamenti nümayəndə heyətinin Azərbaycanda görüşləri başlayıb

13.02.2016 [11:26]

Avropa Parlamentinin vitse-prezidenti Riçard Çarnetski və Avropa Mühafizəkarlar və İslahatçılar Alyansının prezidenti Yan Zahradilin başçılıq etdiyi nümayəndə heyətinin Azərbaycanda görüşləri başlayıb.
Fevralın 12-də nümayəndə heyəti Milli Məclisin sədri Oqtay Əsədov ilə görüşüb. Oqtay Əsədov Azərbaycanın Avropa İttifaqı və onun strukturları ilə əlaqələrin genişləndirilməsinə önəm verdiyini söyləyib. Milli Məclisin sədri bu səfərin Avropa İttifaqı və Avropa Parlamenti ilə Azərbaycan arasında əməkdaşlığın inkişafı baxımından əhəmiyyətli olacağını qeyd edib. Bildirilib ki, nümayəndə heyətlərinin qarşılıqlı səfərləri əlaqələrimizin daha da dərinləşməsinə xidmət edir.
Oqtay Əsədov hazırda Azərbaycan-Avropa İttifaqı münasibətlərinin qarşılıqlı əməkdaşlıq səviyyəsinə yüksəldiyini vurğulayıb. O, Avropa Parlamentinin yüksək vəzifəli şəxslərinin, deputatlarının Azərbaycana səfərlərinin intensivləşməsinin bu əlaqələrin əhəmiyyətini bir daha təsdiqlədiyini diqqətə çatdırıb.
Avropa Parlamentinin deputatı, Mühafizəkarlar və İslahatçılar Alyansının prezidenti Yan Zahradil Azərbaycanda gördükləri inkişaf proseslərindən məmnun olduqlarını söyləyib. O, Avropa Parlamentinin Azərbaycan ilə münasibətlərin inkişafına daim böyük diqqət göstərdiyini qeyd edib. Yan Zahradil əlaqələrimizin daha da möhkəmləndirilməsi üçün zəruri səylərin göstəriləcəyini vurğulayıb.
* * *
Həmin gün Avropa Parlamentinin nümayəndə heyəti Prezident Administrasiyasında Azərbaycan Respublikası Prezidentinin İctimai-siyasi məsələlər üzrə köməkçisi Əli Həsənov ilə görüşüb.
Görüşdə Azərbaycan ilə Avropa Parlamenti və Mühafizəkarlar və İslahatçılar Alyansı arasındakı münasibətlərin mövcud vəziyyəti, perspektivləri müzakirə edilib. Azərbaycan-Avropa İttifaqı tərəfdaşlıq münasibətlərinin inkişaf etdirilməsində Avropa Parlamentinin və Mühafizəkarlar və İslahatçılar Alyansının rolu məsələsinə dair fikir mübadiləsi aparılıb.
Söhbət zamanı təhlükəsizlik, enerji məsələlərindən danışılıb, Azərbaycanın Avropa institutları ilə əlaqələrinin intensivləşdirilməsi, “Cənub” qaz dəhlizi layihəsinin reallaşdırılması, nəqliyyat-kommunikasiya sistemlərinin yaradılması və inkişafında Avropa strukturları ilə əməkdaşlığın əhəmiyyəti qeyd edilib.
Qonaqlar Avropada mövcud problemlərin, xüsusən də qaçqın probleminin, transmilli və regional məsələlərin həllində yaxından kömək göstərdiyinə görə Azərbaycan Prezidentinə təşəkkür ediblər. Bildirilib ki, Azərbaycanın bugünkü potensialı, ölkədə həyata keçirilən islahatlar onun Avropanın tamhüquqlu tərəfdaşı kimi bütün regionda, o cümlədən qitədə cərəyan edən proseslərdə yaxından iştirakına əsas yaradır.
Görüşdə Avropa Parlamentinin vitse-prezidenti Riçard Çarnetski Azərbaycan ilə bağlı qəbul edilən qərəzli qətnamələrə Avropanın digər rasional düşüncəli, proseslərə açıq gözlə baxan deputatları ilə birlikdə həmişə qarşı çıxdıqlarını və qarşı çıxmaqda da davam edəcəklərini deyib. O, Avropa Parlamentində Azərbaycan ilə dostluq qrupunun Azərbaycanın haqq səsinin, xüsusən Dağlıq Qarabağ münaqişəsinin həlli məsələsində ədalətli mövqeyinin dəstəklənməsində, ölkəmizə qarşı təzyiqlərin qarşısının alınmasında fəaliyyətinin bundan sonra da davam etdiriləcəyini vurğulayıb. “Biz Azərbaycanın haqq səsinin Avropaya yayılmasında fəal iştirak edəcəyik”, - deyə Riçard Çarnetski əlavə edib.
Görüşdə Azərbaycanı Mühafizəkarlar və İslahatçılar Alyansında təmsil edən Bütöv Azərbaycan Xalq Cəbhəsi Partiyasının sədri, Milli Məclisin deputatı Qüdrət Həsənquliyev də iştirak edib.

Paylaş:

Baxılıb: 631 dəfə