Azərbaycanın xarici işlər naziri 16-cı Doha Qlobal Forumu çərçivəsində plenar sessiyada çıxış edib

Bakı:

27 °C

47 %

1 m/s

AZ RU EN

Ana səhifə / Siyasət / Azərbaycanın xarici işlər naziri 16-cı Doha Qlobal Forumu çərçivəsində plenar sessiyada çıxış edib

Azərbaycanın xarici işlər naziri 16-cı Doha Qlobal Forumu çərçivəsində plenar sessiyada çıxış edib

24.05.2016 [10:11]

Azərbaycanın xarici işlər naziri Elmar Məmmədyarov 16-cı Doha Qlobal Forumu çərçivəsində “Beynəlxalq və regional status-kvo və çağırışlarla üzləşməyin vasitələri” adlı plenar sessiyada məruzə ilə çıxış edib.
AZƏRTAC xəbər verir ki, nazir E.Məmmədyarov çıxışında beynəlxalq və regional təhlükəsizliyin təmin olunmasında ölkəmizin rolu, ekstremizm və terrorizmə qarşı mübarizədə verdiyi töhfə, eləcə də Ermənistan-Azərbaycan, Dağlıq Qarabağ münaqişəsi və onun nəticələri barədə geniş məlumat verib.
Müasir dünyada baş verən dramatik dəyişikliklər nəticəsində dünya ölkələrinin üzləşdiyi hərbi təcavüz və qanunsuz işğal kimi ənənəvi təhdidlərlə yanaşı, kiberterrorizm, kütləvi miqrasiya kimi qeyri-ənənəvi problemlərin beynəlxalq və regional təhlükəsizlik arasında sərhədləri aradan qaldırdığını qeyd edən E.Məmmədyarov bu problemlərlə effektiv mübarizə aparmaq yolları haqqında danışıb.
E.Məmmədyarov dünyada baş verən ədalətsizliklərin aradan qaldırılması məqsədilə gücün deyil, hüququn hökmranlıq etməsinin əsas olduğunu bildirərək, dünya birliyi tərəfindən beynəlxalq hüquqa tam əməl olunması üçün effektiv mexanizmlərin yaradılmasının əhəmiyyətini vurğulayıb. Nazir 20 faizdən çox ərazilərimizin Ermənistan tərəfindən işğal olunması və ölkə əhalisinin hər doqquz nəfərindən birinin qaçqın və məcburi köçkünə çevrilməsi ilə bağlı Azərbaycanın üzləşdiyi ən böyük ədalətsizlik haqqında danışaraq, münaqişə ilə bağlı BMT Təhlükəsizlik Şurasının müvafiq qətnamələrinə baxmayaraq işğal faktına son qoyulmadığını, ölkəmizə münasibətdə ədalətsizliyin hələ də davam etdiyini təəssüflə qeyd edib.
E.Məmmədyarov son dövrlər kütləvi xarakter alan miqrasiya böhranına toxunaraq, problemin müharibələr deyil, həmin ölkələrin üzləşdiyi iqtisadi çətinliklərdən qaynaqlandığını diqqətə çatdırıb. Miqrasiya böhranının səmərəli həlli üçün davamlı inkişaf yolu ilə iqtisadi şərait və imkanların yaradılmasının vacibliyini bildirib.
Nazir, həmçinin multikulturalizm ideyaları, onların təşviq olunmasının əhəmiyyətindən də danışıb, ölkəmizin dünyada multikulturalizm və tolerantlıq nümunəsi olduğunu nəzərə çatdırıb.
Ekstremizm və terrorizmlə mübarizədə əməkdaşlıqdan da bəhs edən E.Məmmədyarov beynəlxalq və regional təhlükəsizliklə bağlı təhdidləri dəf etmək üçün dövlətlərin beynəlxalq səviyyədə tanınmış sərhədlərinin toxunulmazlığının ən vacib şərt olduğunu vurğulayıb.

Paylaş:

Baxılıb: 683 dəfə