Strasburqda Azərbaycanın Avropa İttifaqı Proqramında iştirakı üzrə protokol qəbul olunub

Bakı:

23 °C

63 %

1 m/s

Əlaqə

AZ RU EN

Ana səhifə / Siyasət / Strasburqda Azərbaycanın Avropa İttifaqı Proqramında iştirakı üzrə protokol qəbul olunub

Strasburqda Azərbaycanın Avropa İttifaqı Proqramında iştirakı üzrə protokol qəbul olunub

09.07.2016 [11:09]

Azərbaycanın Avropa İttifaqının proqramlarında iştirakı üzrə Protokol ötən gün Avropa Parlamentinin (AP) Strasburqda keçirilən plenar sessiyası çərçivəsində müzakirə olunub və səsverməyə çıxarılıb.
Bu barədə AZƏRTAC-a Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov məlumat verib.
Onun sözlərinə görə səsvermə nəticəsində Protokol əksər səs çoxluğu ilə qəbul olunub. 695 deputatın iştirak etdiyi səsvermədə 577 avropalı deputat sənədin lehinə, 67 əleyhinə səs verib, 51 deputat isə bitərəf qalıb.
Beləliklə Azərbaycan ilə Avropa İttifaqı arasında ölkəmizin ittifaqın proqramlarında iştirakı üzrə Protokolun icrası ilə bağlı Avropa Parlamenti Avropa Komissiyasına səlahiyyət verib.
Qeyd edək ki, Azərbaycan Respublikası ilə Avropa İttifaqı arasında ölkəmizin İttifaqın proqramlarında iştirakının ümumi prinsipləri haqqında çərçivə sazişi üzrə bir tərəfdən Azərbaycan, digər tərəfdən Avropa Birliyi və onun üzvü olan dövlətlər arasında tərəfdaşlıq və əməkdaşlıq sazişinin Protokolu 2014-cü il iyunun 14-də Avropa Komissiyasının həmin dövrdəki sədri Joze Manuel Barrozunun Azərbaycana səfəri çərçivəsində imzalanmışdır. Sənədin 2015-ci ilin sonlarında təsdiq edilməsi nəzərdə tutulurdu, lakin 2015-ci il sentyabrın 10-da AP-nin Azərbaycanla bağlı qəbul etdiyi məlum qətnamədən sonra bu qurumla Milli Məclis arasında münasibətlərin kəskin pisləşməsi nəticəsində sənədin müzakirəsi və səsverməsi qeyri-müəyyən vaxta təxirə salınmışdır.
Cari ilin aprel ayında Avropa Parlamentinin Avronest PA üzrə nümayəndə heyətinin rəhbəri xanım Heydi Hautalanın Azərbaycana səfəri və səfər çərçivəsində keçirilən görüşlər və aparılan müzakirələr, daha sonra Avropa Parlamentinin Xarici Əlaqələr Komitəsinin rəhbəri Elmar Brok, həmçinin Avropa İttifaqı - Azərbaycan Parlamentlərarası Əməkdaşlıq Komitəsinin rəhbəri Sayyad Kərim ilə Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov arasında baş tutan diplomatik yazışmalar nəticəsində, həmçinin Avropa Parlamentinin ALDE qrupun vitse-sədri, “Şərq Tərəfdaşlığı” Proqramının Azərbaycan üzrə məruzəçisi Norika Nikolaini və Avropa Parlamentinin üzvü İveta Qriqulenin cari ilin iyunun 2 və 3-də Azərbaycana səfəri və səfər çərçivəsində keçirilən görüşlər və aparılan müzakirələr AP ilə Milli Məclis arasında münasibətlərin bərpa olunmasına dair dialoqa start vermişdir.
Müzakirəsi və təsdiqlənməsi qeyri-müəyyən müddətə təxirə salınan bu Protokolun indiki mərhələdə qəbul olunması da məhz bu dialoqun başlanması və AP-nin bu dialoqa töhfə vermək istəyi ilə bağlıdır. Protokol plenar sessiyaya göndərilməzdən əvvəl cari il iyunun 14-də AP-nin Xarici Əlaqələr Komitəsində müzakirə olunub və səsverməyə çıxarılıb. Səsvermədə sənədin lehinə 51, əleyhinə 5 nəfər səs verib, 2 nəfər isə bitərəf qalıb. Protokol səs çoxluğu ilə qəbul edilərək plenar sessiyaya tövsiyə olunub.

Paylaş:

Baxılıb: 617 dəfə