Azərbaycan ilə Koreya elektron xidmət sahəsində daha sıx əməkdaşlıq edəcəklər

Bakı:

26 °C

50 %

1 m/s

Əlaqə

AZ RU EN

Ana səhifə / Siyasət / Azərbaycan ilə Koreya elektron xidmət sahəsində daha sıx əməkdaşlıq edəcəklər

Azərbaycan ilə Koreya elektron xidmət sahəsində daha sıx əməkdaşlıq edəcəklər

20.08.2016 [11:38]

Vətəndaşlara Xidmət və Sosial İnnovasiyalar üzrə Dövlət Agentliyi ilə Koreyanın Daxili İşlər Nazirliyi arasında E-hökumət və dövlət xidmətlərinin göstərilməsi sahəsində əməkdaşlığa dair Anlaşma Memorandumu imzalanıb
Avqustun 19-da Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi (ASAN xidmət) tərəfindən Dövlət İdarəçiliyi üzrə Azərbaycan-Koreya Əməkdaşlıq Forumu keçirilib. Tədbir çərçivəsində Vətəndaşlara Xidmət və Sosial İnnovasiyalar üzrə Dövlət Agentliyi ilə Koreyanın Daxili İşlər Nazirliyi arasında E-hökumət və dövlət xidmətlərinin göstərilməsi sahəsində əməkdaşlığa dair Anlaşma Memorandumu imzalanıb.
AZƏRTAC xəbər verir ki, forumu giriş sözü ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri İnam Kərimov açıb. O, bildirib ki, bu forum son nailiyyətləri paylaşmaq və yeni əməkdaşlıq sahələrini müəyyənləşdirmək üçün önəmli körpü rolunu oynayacaq. Azərbaycan ilə Koreya arasında diplomatik münasibətlərin tarixindən danışan İ.Kərimov qeyd edib ki, iki ölkə arasında dövlət başçıları səviyyəsində bir sıra səfərlər həyata keçirilib. Koreya daxili işlər nazirinin bu səfəri də dostluq əlaqələrinin inkişafına öz töhfəsini verəcək, əməkdaşlıq daha da intensivləşəcək. Bu gün imzalanan anlaşma memorandumu qarşılıqlı faydalı əməkdaşlıq üçün lazımi hüquqi çərçivəni təmin edəcək.
Rəhbərlik etdiyi qurumun fəaliyyəti barədə danışan İnam Kərimov məlumat verib ki, “ASAN xidmət”ə indiyədək 11 milyon nəfər müraciət edib. Dörd il əvvəl fəaliyyətə başlayan “ASAN xidmət”dən məmnunluq indeksi 98 faizdir. Azərbaycanda elektronlaşdırmanın dövlət siyasətinin prioritetlərindən birini təşkil edir. Elektron hökumət, ASAN ödəniş sistemi, dövlət xidmətlərinin reyestri, əcnəbilər üçün ASAN viza sistemi elektron hökumət sahəsində icra olunan tədbirlərdir. “ASAN xidmət” elektron xidmətin təşkili ilə yanaşı, onun qiymətləndirməsini də həyata keçirir.
Koreyanın daxili işlər naziri Honq Yun-Sık bildirib ki, Koreya və Azərbaycan dinamik inkişaf baxımından bir-birini çox yaxındır. Bugünkü əməkdaşlıq forumu iki ölkə arasında əlaqələrin genişlənməsi və qazanılmış təcrübəni bölüşmək məqsədi daşıyır. Ölkələrimiz coğrafi baxımdan uzaq olsa da, ümumi cəhətləri çoxdur. Hər iki xalqın dili Altay dil qrupuna aiddir və eyni qrammatik quruluşa malikdir. Uzun illər qonşu dövlətlərin hücumuna məruz qalan xalqlarımız öz müstəqil dövlətlərini qurublar. “Diplomatik münasibətlərimizin 25 ili tamam olur. Ötən müddət ərzində müxtəlif sahələrdə yüksək səviyyədə əməkdaşlıq qura bilmişik. Bu tendensiya gələcəkdə də davam etdiriləcək. Bugünkü forum əməkdaşlığımızın daha da dərinləşməsinə təkan verəcək”, - deyə koreyalı nazir vurğulayıb.
Forumda çıxış edən Koreyanın Azərbaycandakı səfiri Kim Çanq-qyu ölkələrimiz arasında əməkdaşlığın müxtəlif istiqamətlərdə daha da genişləndirilməsi üçün böyük potensialın olduğunu diqqətə çatdırıb. Səfir qeyd edib ki, Koreya dünyada ən böyük elektron hökumət yaradaraq yüksək keyfiyyətli idarəçilik xidməti həyata keçirir. Azərbaycan da keçmiş Sovet İttifaqı ölkələri arasında ən inkişaf etmiş elektron hökumət yaradıb və bu istiqamətdə səylərini davam etdirməkdədir.
Anlaşma Memorandumu imzalandıqdan sonra mətbuat konfransı keçirilib. Sənədin əhəmiyyəti ilə bağlı sualı cavablandıran İ.Kərimov bildirib ki, məqsəd elektron xidmət sahəsində daha səmərəli əməkdaşlıq yaratmaqdır. Bu hər iki dövlətdə vətəndaşlara göstərilən xidmətin daha da təkmilləşdirilməsi üçün yeni imkanlar yaradacaq.
Koreyalı nazir qeyd edib ki, ölkələrimizin elektron hökumət sahəsində təcrübələrini paylaşması elektron xidmətin səviyyəsinin daha da yüksəldilməsinə xidmət edir. Anlaşma Memorandumunun imzalanması ilə elektron hökumət və dövlət idarəçiliyi sahəsində sıx əməkdaşlığın təməli qoyulub.
Forum işini panel iclaslarda davam etdirib.

Paylaş:

Baxılıb: 470 dəfə