İşğalçı Ermənistanın daha bir təxribatı...

Bakı:

30 °C

47 %

3 m/s

Əlaqə

AZ RU EN

Ana səhifə / Siyasət / İşğalçı Ermənistanın daha bir təxribatı...

İşğalçı Ermənistanın daha bir təxribatı...

11.06.2019 [09:14]

ATƏT-in Minsk qrupu həmsədrlərinin regiona səfəri ərəfəsində mayor Aqil Omarovun qətlə yetirilməsi, hazırda XİN rəhbərlərinin görüşü ərəfəsində isə növbəti təxribat törədilməsi Ermənistanın atəşkəs rejiminin qorunub saxlanmasını, sülh danışıqlarının konstruktiv məcrada davam etdirilməsini istəmədiyini göstərir
Milli maraqlara əsaslanan müstəqil xarici siyasət kursuna malik olan Azərbaycanın müasir beynəlxalq münasibətlər sistemində mövqeyi davamlı olaraq möhkəmlənir. Prezident İlham Əliyevin rəhbərliyi ilə həyata keçirilən çoxvektorlu və praqmatik xarici siyasət sayəsində ölkəmiz həm ikitərəfli münasibətləri, həm də beynəlxalq təşkilatlar çərçivəsində səmərəli və qarşılıqlı faydalı əməkdaşlıq əlaqələrini uğurla davam etdirir. Hazırda regional güc mərkəzi olan, bölgədə sabitləşdirici aktor kimi çıxış edən Azərbaycan müasir beynəlxalq münasibətlər sistemində etibarlı tərəfdaş kimi tanınır və dünyada böyük etimad qazanıb. Şübhəsiz ki, Azərbaycanın xarici siyasət kursunun ən mühüm strateji prioriteti Ermənistan-Azərbaycan Dağlıq Qarabağ münaqişəsinin beynəlxalq hüquq normaları əsasında, yəni ölkəmizin ərazi bütövlüyü çərçivəsində həllidir. Ölkəmiz bu istiqamətdə qətiyyətli mövqe nümayiş etdirir. Bu mövqe ondan ibarətdir ki, Dağlıq Qarabağ münaqişəsi yalnız Azərbaycanın ərazi bütövlüyü çərçivəsində, BMT Təhlükəsizlik Şurasının müvafiq qətnamələri əsasında öz həllini tapmalıdır.
O da qeyd edilməlidir ki, Azərbaycanın həyata keçirdiyi milli maraqlara əsaslanan siyasətin - respublikamızın hücum diplomatiyası və qətiyyətli mövqeyinin fonunda beynəlxalq müstəvidə Dağlıq Qarabağ münaqişəsinin beynəlxalq hüquq normalarına əsasən həllinin zəruriliyi mütəmadi olaraq bəyan edilir. Yəni münaqişənin həlli ilə bağlı Azərbaycanın ədalətli və haqlı mövqeyi dəstəklənir, bu mövqe ardıcıl olaraq daha da güclənir. Son zamanlar müxtəlif səviyyələrdə səsləndirilən bəyanatlar, qəbul edilmiş sənədlər də Azərbaycanın haqlı və ədalətli mövqeyinin dəstəklənməsinin əyani ifadəsidir.
Bütün bunlara baxmayaraq, Ermənistan qeyri-konstruktiv mövqe ilə danışıqlar prosesini pozmağa hesablanmış addımlar atmaqda davam edir. Dağlıq Qarabağdakı Ermənistan silahlı birləşmələrinin atəşkəs rejimini pozması nəticəsində Azərbaycan Silahlı Qüvvələrinin hərbçisi Elşən Xəlilovun həlak olması təxribat xarakterli addımlardan biridir.
Ümumiyyətlə, bu kontekstdə bir sıra məqamlara xüsusi diqqət yetirmək məqsədəmüvafiqdir. Əvvəla qeyd edək ki, ATƏT-in Minsk qrupu həmsədrlərinin regiona səfəri ərəfəsində mayor Aqil Omarovun qətlə yetirilməsi, hazırda isə XİN rəhbərlərinin görüşü ərəfəsində daha bir təxribat törədilməsi sübut edir ki, Ermənistan atəşkəs rejiminin qorunub saxlanmasını, sülh danışıqlarının konstruktiv məcrada davam etdirilməsini istəmir. Başqa bir nüansa diqqət yetirək. Ermənistanın müdafiə naziri David Tonoyan təsdiq edib ki, Azərbaycan hərbçisinin qətlə yetirilməsi ilə bağlı şəxsən göstəriş verib və bu əməliyyatı icra edən erməni hərbçilərini yüksək mükafata təqdim edib. Bütövlükdə, Ermənistanın baş naziri Nikol Paşinyanın Sankt-Peterburqda forum zamanı işğalçı ölkənin rəhbərliyinin cəbhə xəttində təxribatlara hər hansı aidiyyətinin olması barədə sualı təkzib etməsi, sonra isə bu ölkənin müdafiə nazirinin belə açıqlama verməsi göstərir ki, ya baş nazir ölkəni idarə edə bilmir, ya da bütün bunlar yalandır və sülh danışıqlarının imitasiyasıdır.
Beləliklə, istənilən halda Ermənistan öz yalanları ilə artıq həmsədrləri, beynəlxalq ictimaiyyəti aldada bilmir. Bütövlükdə isə, Ermənistanın təxribatçı hərəkətlərini davam etdirməsi qəbuledilməz və yolverilməzdir. Bu cür cəhdlərə - beynəlxalq hüquq normalarına zidd olan hərəkətlərə son qoyulmalıdır. Xüsusilə də, beynəlxalq ictimaiyyət Ermənistanın təxribatlarına sərt reaksiya verməli və bu ölkənin işğalçı siyasətinin, sülh danışıqlarını sabotaj etməsinin qarşısını almalıdır.
Nurlan QƏLƏNDƏRLİ

Paylaş:

Baxılıb: 537 dəfə