ABŞ daha çox fəlakətlərə düçar olmuş Dağlıq Qarabağın azərbaycanlı icmasına yardım göstərməlidir

Bakı:

28 °C

44 %

5 m/s

Əlaqə

AZ RU EN

Ana səhifə / Siyasət / ABŞ daha çox fəlakətlərə düçar olmuş Dağlıq Qarabağın azərbaycanlı icmasına yardım göstərməlidir

ABŞ daha çox fəlakətlərə düçar olmuş Dağlıq Qarabağın azərbaycanlı icmasına yardım göstərməlidir

17.12.2009 [09:53]

ABŞ Konqresinin Nümayəndələr Palatasının separatçı Dağlıq Qarabağ rejiminə 8 milyon dollar həcmində maliyyə yardımı edilməsi haqqında qərar qəbul etməsi Azərbaycan ictimaiyyəti tərəfindən kəskin etirazla qarşılanıb. Bu etirazlara millət vəkilləri də qoşulub. Xatırladaq ki, Milli Məclis məsələ ilə bağlı ABŞ Konqresinə müraciət edib.
YAP Siyasi Şurasının üzvü, millət vəkili Məlahət İbrahimqızı bildirib ki, ABŞ Azərbaycanın ərazi bütövlüyünü tanıdığı halda, ölkəmizin razılığı olmadan separatçı Dağlıq Qarabağ rejiminə birbaşa yardım separatizmə dəstək kimi qiymətləndirilməlidir. Onun sözlərinə görə, Dağlıq Qarabağın azərbaycanlı icması da var və onlar işğal nəticəsində doğma torpaqlarından didərgin düşüblər. Buna görə də, Dağlıq Qarabağa ayrılan hər hansı yardım onlara da edilməlidir. Millət vəkili hesab edir ki, Nümayəndələr Palatasının qərarı beynəlxalq hüquq normalarına sığmayan məsələdir: “ABŞ Azərbaycanın strateji tərəfdaşıdır, bir çox sahələrdə əməkdaşlıq edirik. Azərbaycan anti-terror koalisiyasının ən fəal üzvlərindən biridir. Eyni zamanda, Amerika Minsk qrupunun həmsədridir. Bu nöqteyi nəzərdən separatçı rejimə ABŞ-ın maliyyə dəstəyi heç bir məntiqə sığmır. Amma ABŞ dövlətinin rəhbərliyi bu səhvi düzəldə bilər”.
Azərbaycan ictimaiyyətinin məsələyə sərt münasibət göstərdiyini bildirən M.İbrahimqızının sözlərinə görə, onun məcburi köçkün seçiciləri bu qərara etiraz edir. O, bütün narazılıqların hamısının haqlı olduğunu deyib.
Ana Vətən Partiyasının sədri, millət vəkili Fəzail Ağamalı da bildirib ki, Nümayəndələr Palatasının qərarı ədalətli deyil: “ABŞ bir tərəfdən özünü dünyada haqqın və ədalətin müdafiəçisi kimi təqdim edir və dünya ictimaiyyətini buna inandırmağa çalışır, başqa tərəfdən belə addımlar atırsa, qeyri-səmimi olduğunu göstərir. Bəllidir ki, Azərbaycanın ərazisi olan Dağlıq Qarabağda hərbi xunta fəaliyyət göstərir və uzun illərdir ki, bu xuntanın vasitəsilə Azərbaycanın ərazi bütövlüyünə qəsd edilib. ABŞ tərəfindən bu xuntaya guya humanitar məqsədlər üçün ayrılmış maliyyə yardımı təyinatı üzrə xərclənmir. Bu vəsait mahiyyət etibarilə hərbi xuntanın möhkəmləməsinə yardım edir. Yəni qeyri-humanist məqsədlər üçün həmin vəsaitdən istifadə olunur. Həmin vəsaitin xərclənməsi ilə bağlı ABŞ hökumətinin monitorinq aparıb-aparmaması haqqında isə heç bir məlumat yoxdur”.
Bununla da, separatçı rejimin möhkəmləndiyini deyən F.Ağamalının sözlərinə görə, bu məqsədə xidmət edən vəsait ayırmaqla ABŞ özünün ədalətli mövqeyinə xələl gətirir və eyni zamanda münaqişənin həlli istiqamətində vasitəçi dövlət kimi neytrallığını kifayət qədər şübhə altına alır. Əslində, Amerika ədalətsiz və qeyri-neytral baxımdan öz mövqeyini ortalığa qoyur. “Məsələnin başqa tərəfi odur ki, ABŞ tərəfindən digər münaqişə zonalarına yardım göstərilmir. Nə Dnestryanı bölgəyə, nə də Abxaziya və Osetiyaya belə yardımlar edilmir. Yalnız Dağlıq Qarabağ separatçıları bu vəsaiti görür” deyə AVP sədri vurğulayıb. Millət vəkili qeyd edib ki, əgər ABŞ humanitar məsələlərə belə həssasdırsa, onda daha çox fəlakətlərə düçar olmuş Dağlıq Qarabağın azərbaycanlı icmasına yardım göstərsin. Amma nəticə bundan ibarətdir ki, ABŞ ikili standartlarla çıxış edir və beləliklə də, Azərbaycandakı nüfuzuna çox ciddi zərbələr endirir.
Böyük Quruluş Partiyasının sədri, millət vəkili Fazil Mustafa isə hesab edir ki, Nümayəndələr Palatasının qərarı ABŞ-ın Azərbaycana münasibəti baxımından normal bir faktdır: “çünki biz dəfələrlə bildirmişik ki, Qarabağ probleminin həllinə mane olan qüvvə Rusiya ilə yanaşı həm də ABŞ-dır. ABŞ yenə də ənənəvi mövqeyini ortaya qoydu. Heç bir separatçı rejiminə maliyyə yardımı göstərmədiyi halda Dağlıq Qarabağ rejiminə dəstək verir. Bu o deməkdir ki, ABŞ həmin rejimi separatçı rejim kimi tanımır. ABŞ həmin vəsaiti gizli şəkildə Ermənistan vasitəsilə də edə bilərdi. Amma bu fakt onu göstərir ki, Dağlıq Qarabağdakı separatçıların arxasında Rusiyadan daha çox Amerika dayanır”.
Nardar BAYRAMLI

Paylaş:

Baxılıb: 1335 dəfə