Qərbin demokratiya institutları Ermənistandakı repressiyalara heç bir reaksiya göstərmir

Bakı:

28 °C

44 %

5 m/s

Əlaqə

AZ RU EN

Ana səhifə / Siyasət / Qərbin demokratiya institutları Ermənistandakı repressiyalara heç bir reaksiya göstərmir

Qərbin demokratiya institutları Ermənistandakı repressiyalara heç bir reaksiya göstərmir

18.06.2020 [09:17]

Ermənistanın baş naziri Nikol Paşinyan özünün keçmiş və gələcək siyasi rəqiblərini həbs etdirir, söz və mətbuat azadlığını məhdudlaşdırır. Bütün bunları aqressiv şəkildə həyata keçirərkən isə demokratiya pərdəsi arxasında gizlənir, korrupsiyaya qarşı mübarizə apardığını iddia edir. Beləliklə, həm də universal dəyərləri öz repressiya siyasətinə alət edir. Ancaq məsələ bununla da bitmir.
Bu fikirləri AZƏRTAC-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu bildirib.
O qeyd edib ki, vətəndaş cəmiyyəti institutlarının fəalları, repressiyaya qarşı küçəyə çıxan sadə vətəndaşlar polis tərəfindən kütləvi şəkildə həbs edilir. Artıq iyunun 16-da “Çiçəklənən Ermənistan” partiyasının sədri, Ermənistan parlamentindəki “Sarukyan” fraksiyasının lideri, milyonçu Qaqik Sarukyanın deputat toxunulmazlığı parlament tərəfindən ləğv edilib. O, ifadə vermək üçün təhlükəsizlik qüvvələri tərəfindən istintaqa çağırılıb və həbs ediləcəyi istisna olunmur.
“Hər kəsə bəllidir ki, bütün bunların iki səbəbi var. Birincisi, Paşinyanın Sarukyanı özünə ciddi siyasi rəqib hesab etməsidir. İkincisi isə məhz Q.Sarukyanın N.Paşinyanın hakimiyyətini daha sərt tənqid etməsidir. Hadisənin də bu fonda baş verməsi bir daha müxalifət liderinin təzyiqlərə məruz qalması və bu hadisələrin siyasi təqib olmasının göstəricisidir”, - deyə H.Babaoğlu əlavə edib.
Vurğulayıb ki, Paşinyanın bu addımları artıq onun Ermənistanda bir diktator kimi qəbul edilməsinə gətirib çıxarmaqdadır. Əgər işğalçı ölkədəki daxili vəziyyəti qiymətləndirməyə çalışsaq, bunu ikili böhran dövrü kimi xarakterizə edə bilərik. Bunlardan biri pandemiya böhranı, digəri isə siyasi böhrandır. N.Paşinyanın yeganə məqsədi isə ölkədə siyasi repressiyalar həyata keçirməklə öz diktaturasının müddətini uzatmaq və daha totalitar inqilabi diktatura qurmaqdır. Ancaq bəlkə də bunları işğalçı ölkənin daxili işləri kimi görüb onu gündəmə daşımamaq da olardı. Lakin məsələ ondadır ki, Qərbin demokratiya institutları baş verən bütün bu repressiyalara heç bir reaksiya göstərmir, işğalçı ölkənin hərəkətlərinə qiymət vermirlər. Beləliklə, qlobal ictimai rəydə onun demokratik obrazının yaradılmasına xidmət göstərmiş olurlar ki, bu faktor da nəticə etibarilə Ermənistanın işğalçı yox, demokratik ölkə olması barədə rəyin yaradılmasına xidmət edir. Təəssüf ki, bu günə qədər nə ABŞ Dövlət Departamenti, nə Avropa Şurası Parlament Assambleyası, nə ATƏT-in Media Azadlığı üzrə nümayəndəsi, nə ABŞ-ın, nə də Qərb ölkələrinin Ermənistandakı səfirlikləri baş verənlərə heç bir münasibət bildirməyiblər. Ancaq bənzər hadisələr Azərbaycanda baş versəydi, dərhal ölkəmizə qarşı sistemli bir qarayaxma kampaniyası başlada, bunu uzun müddət gündəmdə saxlamaqla beynəlxalq imicimizə zərbə vurmağa çalışardılar.
“Ona görə əgər demokratik dəyərlər, insan hüquq və azadlıqları, söz azadlığı Qərbin demokratiya institutları üçün üstün doğurdan da dəyərdirsə, o zaman Ermənistanda baş verənlərə mütləq adekvat münasibət bildirməli, işğalçı ölkənin diktatura rejimini ifşa etməlidirlər”, - deyə Milli Məclisin deputatı bildirib.

Paylaş:

Baxılıb: 473 dəfə