Azərbaycan ilə Çin arasında əməkdaşlıq məsələləri müzakirə olunub

Bakı:

22 °C

64 %

8 m/s

Əlaqə

AZ RU EN

Ana səhifə / Siyasət / Azərbaycan ilə Çin arasında əməkdaşlıq məsələləri müzakirə olunub

Azərbaycan ilə Çin arasında əməkdaşlıq məsələləri müzakirə olunub

20.08.2020 [08:55]

Avqustun 19-da Azərbaycan Respublikasının Xarici İşlər naziri Ceyhun Bayramov Çin Xalq Respublikasının ölkəmizdəki səfiri xanım Qo Minlə görüşüb.
Xarici İşlər Nazirliyinin Mətbuat xidməti idarəsindən AZƏRTAC-a bildiriblər ki, görüşdə nazir Ceyhun Bayramov Azərbaycan ilə Çin arasında qarşılıqlı anlaşmaya və etimada əsaslanan ən yüksəksəviyyəli siyasi dialoqun mövcud olduğunu qeyd edib. Ölkələrimiz arasında qarşılıqlı əməkdaşlıq əlaqələrindən bəhs edən nazir Azərbaycan ilə Çin münasibətlərinin siyasi, iqtisadi-ticari, humanitar, səhiyyə və təhsil sahələrində inkişafından məmnunluğunu ifadə edib.
Səfir Qo Min Çinin Xarici İşlər naziri Vanq Yinin səmimi salamlarını və təbriklərini nazir Ceyhun Bayramova çatdırıb.
Görüşdə tərəflər ikitərəfli və çoxtərəfli formatlarda, beynəlxalq təşkilatlar çərçivəsində əməkdaşlığın daha da genişləndirilməsi üzrə fikir mübadiləsi aparıblar.
Ölkə rəhbərləri səviyyəsində səfərlərin Azərbaycan ilə Çin arasında əlaqələrin inkişafına təkan verdiyi qeyd olunub.
Tərəflərin dövlətlərin suverenliyi və ərazi bütövlüyünə hörmətlə bağlı prinsipial mövqeyi vurğulanıb.
Ermənistan-Azərbaycan Dağlıq-Qarabağ münaqişəsi barədə qarşı tərəfə məlumat verən nazir xüsusilə bu il iyulun 12-də Azərbaycan-Ermənistan sərhədinin Tovuz rayonu istiqamətində Ermənistan silahlı qüvvələri tərəfindən əvvəlcədən planlaşdırılan təxribat barədə danışıb. Ermənistanın bu növbəti təxribatının ölkənin hərbi-siyasi məqsədlərinə xidmət etdiyini və münaqişənin həlli üzrə substantiv danışıqlara mane olmaq məqsədi güddüyünü bildirib.
Görüşdə səfir Azərbaycan Respublikasının suverenliyi və ərazi bütövlüyünə hörmətin ifadə olunması ilə bağlı Çinin qəti mövqeyini diqqətə çatdırıb.
Xanım səfir Qoşulmama Hərəkatına sədrliyi dövründə ölkəmizin fəaliyyətinin, xüsusilə pandemiya ilə əlaqədar Azərbaycan Prezidentinin irəli sürdüyü bir sıra qlobal təşəbbüslərin Çin tərəfindən yüksək qiymətləndirildiyini vurğulayıb.
Tərəflər, habelə qlobal səviyyədə COVID-19 pandemiyası ilə mübarizənin aparıldığı dövrdə beynəlxalq əməkdaşlığın və həmrəyliyin əhəmiyyətini qeyd ediblər. Çin tərəfindən göstərilən texniki dəstəyi vurğulayan nazir bunun Azərbaycan və Çin xalqları arasında dostluq ənənələrinə sadiqliyin bariz nümunəsi olduğunu qeyd edib, bu çətin günlərdə göstərilən dəstəyə və həmrəyliyə görə minnətdarlığını bildirib.
Görüşdə, həmçinin qarşılıqlı maraq doğuran digər məsələlər üzrə müzakirələr aparılıb.

Paylaş:

Baxılıb: 351 dəfə