XİN: Ermənistanın Avropa Məhkəməsindən siyasi məqsədlərlə istifadə etmək cəhdi onun özünün əleyhinə çevrilib

Bakı:

26 °C

52 %

2 m/s

AZ RU EN

Ana səhifə / Siyasət / XİN: Ermənistanın Avropa Məhkəməsindən siyasi məqsədlərlə istifadə etmək cəhdi onun özünün əleyhinə çevrilib

XİN: Ermənistanın Avropa Məhkəməsindən siyasi məqsədlərlə istifadə etmək cəhdi onun özünün əleyhinə çevrilib

01.10.2020 [09:27]

Azərbaycan Respublikası Xarici İşlər Nazirliyinin Mətbuat xidməti İnsan Hüquqları üzrə Avropa Məhkəməsinin 29 sentyabr tarixli qərarı ilə bağlı açıqlama yayıb.
XİN-dən AZƏRTAC-a bildiriblər ki, açıqlamada deyilir: “Sentyabrın 29-da İnsan Hüquqları üzrə Avropa Məhkəməsi Ermənistan hökumətinin verdiyi şikayətə cavab olaraq Məhkəmə Reqlamentinin 39-cu qaydasına müvafiq qərar qəbul edib. Həmin qərarda Avropa Məhkəməsi həm Ermənistanı, həm də Azərbaycanı mülki əhalinin Konvensiya hüquqlarının pozulmasına gətirib çıxara biləcək tədbirlərdən çəkinməyə dəvət edir.
Beləliklə, Ermənistanın hüquqi müstəvi təşkil edən Avropa Məhkəməsindən siyasi məqsədlərlə istifadə etmək cəhdi elə məhz onun özünün əleyhinə çevrilib. Əslində, bu qərarla Avropa Məhkəməsi 2015-ci ildə Çıraqov və digərləri Ermənistana qarşı işində çıxardığı qərarda gəldiyi qənaəti - Ermənistanın Azərbaycan ərazilərinin işğal olunması və bu ərazilərdə insan hüquqları pozuntularına görə məsuliyyət daşıdığını təsdiq edib. Bu, Azərbaycan torpaqlarının Ermənistan tərəfindən davam edən işğalının, habelə münaqişənin Ermənistan və Azərbaycan arasında getməsi faktının növbəti hüquqi təsbitidir.
Məlum olduğu kimi, Ermənistanın təcavüzkar hərbi birləşmələri Azərbaycanın şəhər və kəndlərini, o cümlədən mülki əhalini və çoxsaylı mülki obyektləri atəşə tutmaqdadır. Bunun nəticəsində dinc əhali arasında azı 12 nəfər həlak olub, onlarla insan xəsarət alıb, şəxsi və dövlət əmlakına bərpaolunmaz ziyan yetirilib. Nəticə etibarilə, Avropa Məhkəməsinin 29 sentyabr tarixli qərarı Ermənistana Azərbaycan ərazilərində törətdiyi, insan hüquqları və beynəlxalq humanitar hüquqa zidd zorakı əməllərinə son qoymağa dair çağırış mənasına gəlir.
Bundan əlavə, Avropa Məhkəməsi Ermənistanı öz öhdəliklərinə riayət etmək üçün görülmüş tədbirlər barədə mümkün qədər tezliklə ona məlumat verməsini istəyib.
Qeyd edək ki, sentyabrın 27-də Ermənistanın Azərbaycana qarşı törətdiyi təcavüz aktına cavab olaraq Azərbaycan Respublikasının Silahlı Qüvvələri tərəfindən başlanmış əks-hücum əməliyyatının gedişi zamanı beynəlxalq humanitar hüquqa tam və qəti şəkildə riayət edilir, heç bir formada mülki əhali və obyektlər hədəfə alınmır. Azərbaycan tərəfi Avropa Məhkəməsinin qərarına uyğun olaraq beynəlxalq öhdəliklərinə riayət edilməsi istiqamətində görülmüş tədbirlər barədə quruma müvafiq qaydada məlumatlar təqdim edəcək”.

Paylaş:

Baxılıb: 334 dəfə