Əsli Kazımova: Bu gün hər birimiz ölkə Prezidentinin, Ali Baş Komandanın rəhbərliyi ilə müsəlləh əsgərik

Bakı:

27 °C

65 %

4 m/s

AZ RU EN

Ana səhifə / Siyasət / Əsli Kazımova: Bu gün hər birimiz ölkə Prezidentinin, Ali Baş Komandanın rəhbərliyi ilə müsəlləh əsgərik

Əsli Kazımova: Bu gün hər birimiz ölkə Prezidentinin, Ali Baş Komandanın rəhbərliyi ilə müsəlləh əsgərik

08.10.2020 [09:27]

“Azərbaycan bu gün öz torpaqlarının işğaldan azad edilməsi istiqamətində Vətən müharibəsi aparır. Ölkə Prezidenti, Silahlı Qüvvələrin Ali Baş Komandanı cənab İlham Əliyev xalqa müraciətində bir daha qətiyyətlə bildirdi ki, Azərbaycan heç bir halda mənasız danışıqlarda iştirak etməyəcək. Bu gün ərazi bütövlüyümüzün təmini uğrunda gedən mübarizəmizə ikili standartlardan yanaşan bir sıra dövlətlər və təşkilatlar anlamalıdırlar ki, biz hər zaman sülhün tərəfdarı olmuşuq. Azərbaycan inkişafın bütün komponentlərində Ermənistanı qabaqlasa da, biz müharibə istəməmişik. Amma görünən bu idi ki, erməni tərəfi təxribatlardan əl çəkmək niyyətində deyil, yeni torpaq işğalı haqda düşünür. Buna cavab olaraq, Azərbaycan ərazi bütövlüyünün təmin edilməsi üçün əks-həmlə əməliyyatları aparmaqdadır”.
Bunu qəzetimizə açıqlamasında Azərbaycan Sosial Rifah Partiyasının (ASRP) sədri Əsli Kazımova deyib.
Ə.Kazımova bildirib ki, Azərbaycan ictimaiyyəti yaşından, sosial statusundan və siyasi mənsubiyyətindən asılı olmayaraq Vətən müharibəsinin qələbə ilə nəticələnməsinə səfərbər olub. Onun sözlərinə görə, bu gün ölkəmizdə milli birlik, həmrəylik hökm sürür və bütün gücümüzü cəbhədə döyüşən əsgərin ruh yüksəkliyinin təmin olunmasına yönəltməliyik: “Ölkəmizdə fəaliyyət göstərən siyasi partiyaların dövlətin, xalqın və Ali Baş Komandanın yanında yer alması bir daha Azərbaycan xalqının əzmini, Vətən sevgisini nümayiş etdirir. Siyasi qüvvələr birmənalı şəkildə bu gün istər hərbi müstəvidə, istərsə də siyasi müstəvidə Azərbaycanın haqq işi uğrunda mübarizə aparır. Vətən məsələsində, Qarabağın azadlığı məsələsində heç bir siyasi fikir ayrılığı ola bilməz”.
Partiya sədri bildirib ki, oktyabrın 3-də Prezident Adminstrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevin siyasi partiyalarla keçirdiyi görüşdə bu məqam bir daha xüsusi vurğulandı: “Azərbaycan ictimaiyyəti bilməlidir ki, belə çətin zamanlarda hər kəs dövlətin rifahı və gələcəyi üçün bütün siyasi düşüncəsini kənara qoyaraq bir yerdə olmalıdır və bir yerdədir. Bu gün hər birimiz ölkə Prezidentinin, Ali Baş Komandanın rəhbərliyi ilə müsəlləh əsgərik. İnanırıq ki, yaxın zamanda Azərbaycan bütün işğal altındakı torpaqlarını azad edəcək, həmin torpaqlarda üçrəngli bayrağımız dalğalanacaq. Bu gün Azərbaycan işğalçı Ermənistandan fərqli olaraq mülki əhaliyə qarşı zorakılıq etmir, müharibə apardığı halda beynəlxalq konvensiyalara riayət edir. Sadəcə regionda sülh və əminamanlığın təmin olunması üçün Azərbaycan öz torpaqlarını terrorçulardan təmizləyir. Bu birmənalı olaraq Azərbaycanın hüququdur və bu hüququ Azərbaycanın əlindən kimsə ala bilməz!”.

Paylaş:

Baxılıb: 431 dəfə