Qulamhüseyn Əlibəyli: Ali Baş Komandan İlham Əliyevin rəhbərliyi ilə yürüdülən qətiyyətli siyasət öz bəhrəsini verir

Bakı:

24 °C

55 %

1 m/s

AZ RU EN

Ana səhifə / Siyasət / Qulamhüseyn Əlibəyli: Ali Baş Komandan İlham Əliyevin rəhbərliyi ilə yürüdülən qətiyyətli siyasət öz bəhrəsini verir

Qulamhüseyn Əlibəyli: Ali Baş Komandan İlham Əliyevin rəhbərliyi ilə yürüdülən qətiyyətli siyasət öz bəhrəsini verir

03.11.2020 [09:19]

“Azərbaycan Ordusunun sentyabrın 27-dən başlayan əks-hücum əməliyyatları qarşısında tab gətirməyən işğalçı Ermənistanın silahlı qüvvələrinin düşdüyü vəziyyət onu bəşəriyyətə qarşı növbəti cinayətlərə sövq edir. Döyüş meydanında məğlub olan Ermənistan gah qadağan olunmuş silahlar və ballistik raketlər vasitəsilə Azərbaycanın dinc sakinlərini hədəfə almaqla, gah da uşaqları döyüşlərə cəlb etməklə müharibə cinayətlərini davam etdirir. Belə ki, Gəncədə, Tərtərdə uşaqları qətlə yetirən Ermənistanın terrorçu hakimiyyəti öz uşaqlarına da əsgər forması geyindirib hərbi əməliyyatlara cəlb etməklə əsl simasını ortaya qoyur”.
Bunu “Yeni Azərbaycan” qəzetinə açıqlamasında Aydınlar Partiyasının sədri Qulamhüseyn Əlibəyli deyib.
Q.Əlibəyli bildirib ki, bu kimi faktlar Ermənistanın hərbi-siyasi rəhbərliyinin beynəlxalq xarakterli növbəti hərbi cinayətlər törətdiyini sübut edir: “Təsadüfi deyil ki, 50 siyasi partiya Ermənistan rəhbərliyinin müharibə cinayəti hesab edilən faşist əməlləri barədə dünya ictimaiyyətini məlumatlandırmaq üçün beynəlxalq təşkilatlara müraciət ünvanlayıb. Sözügedən müraciət təkcə Gəncədəki terror aktı deyil, Ermənistan rəhbərliyinin bütün hərbi cinayətləri barədə beynəlxalq ictimaiyyəti geniş şəkildə məlumatlandırmaq xarakteri daşıyır. Çünki Ermənistanın qəsdən dinc sakinləri hədəfə almasını xalqımıza qarşı soyqırımı kimi qiymətləndirmək olar. Bu aktlar bəşəriyyət əleyhinə cinayətlər hesab olunur. Buna görə də, Ermənistan beynəlxalq məhkəmələr qarşısında cavab verməlidir”.
Humanitar atəşkəsi Ermənistanın növbəti dəfə pozmasına toxunan Q.Əlibəylinin sözlərinə görə, işğalçı ölkə özünün ənənəvi siyasətinə sadiq qalıb: “Ermənistanın indiyə qədər hakimiyyətdə olan bütün rəhbərləri həmişə saxta və riyakar mövqeləri ilə seçiliblər. Lakin düşmənin dərhal humanitar atəşkəsi pozması Ermənistanın sülh istəmədiyini bir daha göstərir”.
Partiya sədrinin sözlərinə görə, humanitar atəşkəs rejiminin tətbiqi ilə Azərbaycan Ordusunun zəfər yürüşünün qarşısını almaq kimi məqsədlər güdən Ermənistan rəhbərliyi yanılır: “Hesab edirəm ki, ermənilərin humanitar atəşkəsdən istifadə edərək öz məkrli niyyətlərini həyata keçirməsinə imkan verilməyəcək. Əminəm ki, atəşkəsi pozan düşmən layiqli cavabını alacaq və işğal altındakı bütün torpaqlarımız azad olunacaq. Ona görə ki, 1 ay ərzində 4 rayonun işğaldan azad edilməsi ilə nəticələnən Vətən müharibəsinin tam zəfərlə başa çatdırılacağına inamımız böyükdür. Çünki Ali Baş Komandan İlham Əliyevin rəhbərliyi ilə yürüdülən qətiyyətli siyasət öz bəhrəsini verir. Eyni zamanda, bu gün Azərbaycanda dövlət başçımız, Ali Baş Komandanımızın rəhbərliyi ilə dünyanın heç bir ölkəsində müşahidə edilməyən unikal birlik yaranıb: Dövlət-xalq-ordu birliyi. Tam və qəti qələbə naminə bu milli birlik və həmrəyliyi qoruyub saxlamaq, bütün proseslərə çox uğurla rəhbərlik edən dövlət başçımıza həm daxili, həm hərbi, həm də beynəlxalq məsələlərdə tam dəstək vermək lazımdır”.
Qaşqay ZİYƏDDİNOĞLU

Paylaş:

Baxılıb: 497 dəfə