Siyasi partiyaların həmrəylik nümayiş etdirməsi milli birliyimizin nümunəsidir

Bakı:

26 °C

51 %

2 m/s

Əlaqə

AZ RU EN

Ana səhifə / Siyasət / Siyasi partiyaların həmrəylik nümayiş etdirməsi milli birliyimizin nümunəsidir

Siyasi partiyaların həmrəylik nümayiş etdirməsi milli birliyimizin nümunəsidir

05.11.2020 [08:29]

Ölkəmizdə fəaliyyət göstərən 50 siyasi partiyanın Ali Baş Komandanın və ordumuzun ətrafında sıx birləşməsi Azərbaycan cəmiyyətinin monolitliyini gücləndirən əsas amillərdən biridir
Son illərdə ölkəmizdə aparılan köklü islahatlar bütün sahələrin inkişafını təmin etməklə yanaşı, siyasi platformada da yeni münasibətlər sisteminin formalaşmasına yol açıb. Qeyd etmək lazımdır ki, bu ilin fevralında baş tutan VI çağırış Milli Məclisə seçkilərin ardından yaranan yeni siyasi konfiqurasiya ölkəmizdə siyasi qüvvələr arasında əlaqələrin möhkəmlənməsində əsaslı rol oynadı. Milli Məclisin yeni tərkibdə ilk iclasında Prezident İlham Əliyevin tarixi çıxışının ardından ölkəmizdə yeni yaranan siyasi konfiqurasiyanın əsasında siyasi dialoq mühitinin formalaşdırılması prosesinə başlanıldı və bu Azərbaycanda siyasi sistemi möhkəmləndirmək, siyasi münasibətləri sağlam zəmində gücləndirmək üçün vacib şərtə çevrildi. Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevlə siyasi partiyaların rəhbərlərinin görüşləri istər iqtidar-müxalifət, istərsə də partiyalararası münasibətlərdə yeni mərhələnin yaranmasına rəvac verdi. Məhz bu siyasi birlik bu gün Dağlıq Qarabağın və ətraf rayonların erməni işğalından azad olunması istiqamətində aparılan əks-hücum əməliyyatlarında siyasi həmrəyliyin güclənməsində xüsusi əhəmiyyətə malik oldu. Vurğulayaq ki, hazırda ölkəmizdə fəaliyyət göstərən əksər partiyalar siyasi baxışlarından asılı olmayaraq Prezident, Ali Baş Komandan İlham Əliyevin, Ordumuzun yanında olduqlarını bildirir və cəbhədə qələbəmizə öz töhfələrini verməyə çalışırlar. Bununla bağlı 50 siyasi partiyanın birgə bəyanat imzalaması da deyilənlərə sübutdur.
Məsələ ilə bağlı Milli Məclisin komitə sədri Tahir Rzayev bildirib ki, bu gün Azərbaycan haqq savaşı aparır: “Ermənistan 27 ildir ki, BMT-nin Təhlükəsizlik Şurasının qətnamələrinə əməl etmir və əfsuslar olsun ki, işğalçı ölkə buna görə cəzalandırılmır. Bu, qəbuledilməzdir. Artıq onları Azərbaycan dövləti və xalqı cəzalandırır. Dövlətimiz artıq həmin qətnamələrin bir hissəsini yerinə yetirib. Çox sevindirici haldır ki, Ermənistanın işğalçı siyasətinə etiraz, eləcə də xalqın haqq tələbi ölkədəki siyasi qüvvələri də birləşdirib. Siyasi partiyaların rəhbərlərinin birgə bəyanatı, eləcə də videokonfrans formatında keçirilən görüşlər Azərbaycan xalqının və ölkənin siyasi partiyalarının yekdilliklə cənab Prezidentin yanında olduğunu nümayiş etdirir. Ölkənin 50 siyasi partiyasının Ali Baş Komandan İlham Əliyevin yanında olduqlarına dair bəyanatı milli və siyasi həmrəyliyin əyani göstəricisidir. Bu bəyanat, həmçinin ölkədə siyasi dialoqun mövcudluğunun ifadəsidir”.
T.Rzayevin sözlərinə görə, bu gün Azərbaycan cəmiyyəti hər zaman olduğundan daha çox birlik və həmrəylik nümayiş etdirir. Ölkənin siyasi tarixində ilk dəfə olaraq 50 siyasi partiya rəhbərinin Ali Baş Komandan, Prezident İlham Əliyevin yanında olduqlarına dair birgə bəyanatı milli birliyin təcəssümüdür. Başqa sözlə, bu bəyanat təkcə xalqla hökumətin vahid mövqeyindən xəbər vermir, eyni zamanda, Azərbaycanda mövcud olan həmrəyliyin göstəricisidir.
Komitə sədri söyləyib ki, işğalçı erməni hərbi birləşmələrinin hücumlarının qarşısını almaq, əhalimizin təhlükəsizliyini təmin etmək məqsədilə qəhrəman ordumuzun əks-hücum əməliyyatları tamamilə məntiqlidir və təcavüzkar Ermənistan bunun bədəlini ödəməkdədir: “İnanırıq ki, Ali Baş Komandan İlham Əliyevin rəhbərliyi ilə rəşadətli ordumuz uzun illərdən bəri işğala məruz qalan müqəddəs torpaqlarımızı tam azad edəcək, dövlətçilik və hərb tariximizə şanlı səhifələr yazacaq”.
“Rəşadətli Azərbaycan Ordusunun Ermənistanın təxribatına cavab olaraq əks-hücuma keçməsi və işğal altında olan torpaqlarımızın azad edilməsi istiqamətində ciddi irəliləyişlərə nail olması hər bir vətəndaşda böyük ruh yüksəkliyi yaradır. Torpaqlarımızın işğaldan azad olunması üçün hərbi əməliyyatların başlanması və düşmənə ağır zərbələr vurulması son 30 ilin ən böyük tarixi hadisələrindən biridir”. Bu fikirləri isə Ana Vətən Partiyasının sədri, millət vəkili Fəzail Ağamalı deyib. Onun sözlərinə görə, çox sevindirici haldır ki, bu gün cəmiyyətimizin bütün təbəqələri, o cümlədən siyasi partiyalar, QHT-lər Ali Baş Komandanımızın yanındadır.
Partiya sədri qeyd edib ki, bu məsələdə Azərbaycan cəmiyyəti bir yumruq kimi birləşib. Hər bir vətəndaşın arzusu budur ki, bütün torpaqlarımız işğaldan azad olunsun. Ona görə də, bütün cəmiyyətimiz qələbə əhval-ruhiyyəsindədir.
F.Ağamalının fikrincə, siyasi baxışlarından, ideoloji prinsiplərindən asılı olmayaraq, ölkədə fəaliyyət göstərən 50 siyasi partiyanın bir araya gələrək Ali Baş Komandan, Prezident İlham Əliyevin Vətənimizin ərazi bütövlüyünün və vətəndaşların təhlükəsizliyinin qorunması, Ermənistanın ölkəmizə qarşı həyata keçirdiyi genişmiqyaslı terror təxribatlarının qarşısının alınması məqsədilə həyata keçirdiyi bütün siyasi və hərbi tədbirləri yekdilliklə dəstəklədiklərini və dövlət başçısının yanında olduqlarını bəyan etməsi mühüm hadisədir, milli birliyimizin, həmrəyliyimizin bariz nümunəsidir: “Dövlətimiz və xalqımız üçün həyati əhəmiyyət kəsb edən mürəkkəb bir şəraitdə siyasi partiyalar tərəfindən ölkəmizin bütün vətəndaşlarının, dünya azərbaycanlılarının milli birliyə, vəhdətə səslənməsi siyasi yetkinliyin göstəricisi kimi mühüm əhəmiyyətə malikdir. Amma təəssüf ki, belə bir şəraitdə də iki siyasi partiya - “Müsavat” və AXCP Böyük Qələbə uğrunda mücadilədə Azərbaycan xalqı və dövləti ilə birlikdə olmaq istəmədilər. Bu da onların antimilli mahiyyətindən xəbər verir”.
Nardar

Paylaş:

Baxılıb: 550 dəfə