Laçının azad edilməsi Prezident İlham Əliyevin rəhbərliyi ilə qazandığımız böyük hərbi və siyasi uğurların zirvəsinə çevrildi

Bakı:

27 °C

57 %

4 m/s

AZ RU EN

Ana səhifə / Siyasət / Laçının azad edilməsi Prezident İlham Əliyevin rəhbərliyi ilə qazandığımız böyük hərbi və siyasi uğurların zirvəsinə çevrildi

Laçının azad edilməsi Prezident İlham Əliyevin rəhbərliyi ilə qazandığımız böyük hərbi və siyasi uğurların zirvəsinə çevrildi

03.12.2020 [10:16]

Qürur hissi ilə deyirik ki, 28 illik erməni işğalından azad olunan Laçın rayonunda yenidən üçrəngli şanlı Azərbaycan Bayrağı dalğalanır. Azərbaycanın ən böyük rayonlarından biri olan Laçının bir güllə belə atmadan və şəhid verilmədən erməni işğalından azad edilməsi ölkəmizin ictimai-siyasi həyatında möhtəşəm, parlaq tarixi hadisəyə çevrilib. Doğrudur, işğal altında olan bütün rayonlarımızın azad edilməsi Azərbaycanın tarixi qələbəsidir. Lakin strateji baxımdan Laçın erməni hərbi-birləşmələri üçün nəfəslik rolunu oynayırdı. Çünki son 28 ildə Ermənistanla Dağlıq Qarabağ arasındakı nəqliyyat əlaqəsi, daha dəqiq söyləsək, həyati bağlantı Laçın rayonu vasitəsilə qurulmuşdu. Ermənistan Qarabağa silah-sursat, canlı qüvvə daşınmasını və digər həyati əhəmiyyətli daşımaları birbaşa Laçın dəhlizi vasitəsilə həyata keçirirdi. Eyni zamanda, Laçının işğaldan azad edilməsi Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə dövlətimizin uzun illər apardığı düşünülmüş siyasətin nəticəsi olmaqla, son iki ayda qazandığımız möhtəşəm hərbi və siyasi uğurların zirvəsinə çevrildi.
Bu fikirləri AZƏRTAC-a açıqlamasında Milli Məclisin deputatı Ağalar Vəliyev söyləyib.
Deputat deyib ki, Laçının azad edilməsi ilə BMT-nin Təhlükəsizlik Şurasının qəbul etdiyi 4 qətnamənin yerinə yetirilməsi başa çatdırıldı və erməni işğalına birdəfəlik son qoyuldu. Ermənistan-Azərbaycan Dağlıq Qarabağ münaqişəsi adlı anlayış həyatımızdan silinib. Ölkəmizin ərazi bütövlüyü təmin olunub. Bununla da bölgəmizdə yeni siyasi və iqtisadi reallıqlar yaranıb.
Müzəffər Ali Baş Komandan İlham Əliyev xalqa müraciətində söyləyib: “Ümid edirəm ki, biz bölgədə bu gün və gələcək üçün yeni təhlükəsizlik, yeni əməkdaşlıq formatını təşkil etdik. Bu format nədən ibarət olacaq, bunu həyat göstərər. Hər halda biz bu yeni əməkdaşlıq formatının yaradılması üçün lazımi işləri gördük, öz torpaqlarımızdan düşməni qovduq və noyabrın 10-da imzalanmış Bəyanatda göstərilən məsələlər əgər bu gün öz həllini taparsa, onda bölgəmizdə yeni əməkdaşlıq çərçivələri yaradılacaqdır”.
Ağalar Vəliyev qeyd edib ki, Türkiyənin və Rusiyanın fəal iştirak edəcəyi təhlükəsizlik əməkdaşlığı formatı Azərbaycanın gələcək inkişafı üçün böyük əhəmiyyət kəsb edir. İki qüdrətli dövlətin bölgədə formalaşan əməkdaşlıq formatı Azərbaycanın milli maraqlarına tamamilə uzlaşdırılmış şəkildə cavab vermiş olur.
Milli Məclisin deputatı onu da vurğulayıb ki, Qarabağ bölgəsi üçün yaranmış yeni reallıqlar öz növbəsində yeni perspektivlər vəd etməkdədir. İlk növbədə, logistika, nəqliyyat və enerji təhlükəsizliyi məsələlərinin təmin olunması həyata keçiriləcək. Ölkəmiz və xalqımız üçün tamamilə yeni epopeyaya - quruculuq, inkişaf və azad edilmiş ərazilərimizin bərpası dövrünə qədəm qoyuruq. İnamla demək olar ki, tarixən ən çətin vəzifələrin öhdəsindən gələn Azərbaycan xalqı həmrəylik və böyük əzm nümayiş etdirərək, mənfur qonşularımız tərəfindən dağıdılmış şəhərlərimizin və kəndlərimizin bərpa olunaraq normal həyata qayıtması üçün bütün gücünü ortaya qoyacaq.

Paylaş:

Baxılıb: 611 dəfə