Əli Kərimlinin tarixi təhrif etmək cəhdi uğursuzluğa məhkumdur

Bakı:

21 °C

83 %

2 m/s

Əlaqə

AZ RU EN

Ana səhifə / Siyasət / Əli Kərimlinin tarixi təhrif etmək cəhdi uğursuzluğa məhkumdur

Əli Kərimlinin tarixi təhrif etmək cəhdi uğursuzluğa məhkumdur

26.08.2021 [09:51]

44 günlük Vətən müharibəsində qazanılan qələbəyə kölgə salmaq üçün bütün vasitələrdən istifadə edən radikal müxalifət təmsilçiləri sosial şəbəkələrdə xalqımıza və dövlətimizə qarşı çirkin təbliğatı davam etdirirlər. Ekspertlərin də qeyd etdikləri kimi, radikalların sosial şəbəkələrdəki budəfəki “fəallığı” onların vaxtilə etdikləri xəyanətlərdən diqqətin yayındırılmasına hesablanıb. Hər halda, AXCP sədri Əli Kərimlinin və antimilli şuranın digər üzvlərinin sosial şəbəkələrdəki son paylaşımları bunu deməyə əsas verir. AXC-”Müsavat” cütlüyünün vaxtilə etdiyi xəyanətlərin bu dövlət və xalq üçün hansı bəlalara yol açdığını yaxşı bilən Əli Kərimli, necə deyərlər, ayıbına kor olmaq əvəzinə, bu gün “günahsız” olduqlarını əsaslandırmağa çalışır. Lakin o, əslində, bu açıqlamaları ilə AXC-”Müsavat” hakimiyyətinin torpaqlarımızın işğalına şərait yaratdığını və səbəb olduğunu etiraf edir.

Məsələ ilə bağlı fikirlərini bölüşən Milli Məclisin deputatı Şahin İsmayılov deyib ki, radikallar sosial şəbəkələrdə danışdıqları yalanlarla tarixi saxtalaşdırmağa, vaxtilə ərazilərimizin onların hakimiyyət hərisliyi ucbatından işğal altına düşməsi faktını “unutdurmağa” çalışırlar. O zaman baş verənlərin cəmiyyət tərəfindən unudulmadığını, yaxşı xatırlandığını bildirən millət vəkili qeyd edib ki, hakimiyyəti silah gücü ilə zəbt edən AXC-”Müsavat” qruplaşmasının xalqımıza və dövlətimizə vurduğu zərbələr heç kimə sirr deyil: “Bu gün həmin reallıqları inkar etməyə çalışan radikal müxalifət tarixi saxtalaşdırmaq istəyir. Əslində, onların 44 günlük Vətən müharibəsində əldə edilmiş qələbəyə qarşı antimilli xarakterli çirkin kampaniyalar aparmaları da xəyanətkar mövqedən qaynaqlanır. Radikal müxalifət təmsilçiləri anlayırlar ki, onlar tarixdə torpaqların itirilməsinin, Azərbaycanın suverenliyinin təhdid altına düşməsinin, ölkənin vətəndaş müharibəsinə sürüklənməsinin günahkarları kimi qalıblar”.

Milli Məclisin deputatı Ramin Məmmədov da radikal müxalifətin Vətən müharibəsində qazanılan tarixi Zəfərin əhəmiyyətini kiçiltməyə çalışmaqla yanaşı, vaxtilə etdikləri xəyanətlərin üstünü örtməyə cəhd göstərdiyini deyib. Millət vəkili diqqətə çatdırıb ki, vaxtilə torpaqların işğal olunmasına zəmin yaradanların bu gün tutduqları xəyanətkar mövqe təsadüfi ola bilməz: “Onlar bu gün də analoji xəyanətlərini davam etdirirlər. İstər müharibə dönəmində, istərsə də müharibədən sonrakı dövrdə xalqla, dövlətlə, ordu ilə birgə olmayanlar, erməni təbliğatının danışan dilinə çevrilənlər anlamalıdırlar ki, onların əməlləri Azərbaycan xalqına yaxşı bəllidir. İşğaldan azad olunmuş ərazilərimizdə aparılan abadlıq-quruculuq işlərinə qara yaxmağa çalışanlar, Zəngəzur dəhlizinin açılmasına qarşı təbliğat aparanlar bilməlidirlər ki, bu kimi qara piar kampaniyaları ilə heç nəyə nail ola bilməyəcəklər”.

Pərviz SADAYOĞLU

Paylaş:

Baxılıb: 665 dəfə