AGRİ layihəsi yeni enerji xəritəsini formalaşdıracaq

Bakı:

10 °C

81 %

2 m/s

Əlaqə

AZ RU EN

Ana səhifə / Siyasət / AGRİ layihəsi yeni enerji xəritəsini formalaşdıracaq

AGRİ layihəsi yeni enerji xəritəsini formalaşdıracaq

17.09.2010 [09:22]

Layihə Xəzər-Qara-Aralıq dənizlərinin əhatə olunduğu hövzənin enerji təhlükəsizliyinin təmin olunmasına mühüm töhfələr verməklə yanaşı, yeni strateji əməkdaşlıq platformalarının yaradılmasına və uzunmüddətli perspektivdə davam etdirilməsinə təkan verəcək
Azərbaycan, Gürcüstan və Rumıniyanın iştirakçılığı ilə reallaşdırılacaq AGRİ (Azerbaijan-Georgia-Roumania İnterconnector) layihəsi özünün geoiqtisadi əhəmiyyəti ilə yanaşı, bir sıra mühüm tərəfləri ilə bu ölkələrin əhatə etdiyi coğrafiyada yeni geosiyasi münasibətlər sistemi və təhlükəsizlik balansının formalaşmasına real zəmin yaradacaq. Belə ki, layihə Xəzər-Qara-Aralıq dənizlərinin əhatə olunduğu hövzənin enerji təhlükəsizliyinin təmin olunmasına mühüm töhfələr verməklə yanaşı, yeni strateji əməkdaşlıq platformalarının formalaşmasına və uzunmüddətli perspektivdə davam etdirilməsinə də təkan verəcək. çünki ortaq maraqların uzlaşdırılması fonunda reallaşdırılan layihə iqtisadi və siyasi mənada iştirakçı və dəstəkçi ölkələri bir-birinə daha da yaxınlaşdıran təməl faktorlardan biri kimi çıxış edir...
AGRİ regionun perspektiv enerji xəritəsi və geosiyasi təhlükəsizlik balansını formalaşdıracaq
Qeyd etdiyimiz kimi, AGRİ layihəsi geoiqtisadi və geosiyasi mənada regiona yeni bir nizam və təhlükəsizlik mühiti vəd edir. Prezident İlham Əliyevin də qeyd etdiyi kimi, bu gün maraqlar tarazlığının təmin olunduğu bir vəziyyət yaranıb və hamı-hasilatçılar, tranzit ölkələr və istehlakçılar bundan yararlanacaqdır: “Daha sonra ölkələrimiz də, xalqlarımız da bundan faydalanacaq və bu, regional əməkdaşlıqda yeni bir mərhələyə gətirib çıxaracaqdır. Bu gün biz Gürcüstan, Rumıniya və Macarıstandan gələn qonaqların iştirakını nəzərə alaraq Qara dəniz-Xəzər dənizi əməkdaşlığından ciddi danışa bilərik”.
AGRİ-nin reallaşdırılması iştirakçı və tərəfdaş ölkələri əhatə edən coğrafi məkanda yeni enerji xəritəsinin və geosiyasi təhlükəsizlik balansının formalaşmasına gətirib çıxaracaq. Prezident İlham Əliyev bununla əlaqədar qeyd edib ki, əslində biz, enerji xəritəsini dəyişdiririk: “Biz hasilat, nəqletmə, ixracat marşrutları və yeni marşrutların yaranması haqqında ənənəvi anlayışları dəyişdiririk. Biz bu vəziyyəti dəyişdiririk, vəziyyət öz-özünə yaranmır. Bu, liderlərin siyasi iradəsidir və eyni zamanda, praktiki layihələr səylərin əlaqələndirilməsi üzrə ciddi bir işdir. Mən əminəm ki, ölkələrimiz və ölkələrimizin rəhbərləri arasındakı anlaşma səviyyəsi, səylərimizin potensial əlaqələndirmə səviyyəsi tamamilə yeni bir şərait yaradacaqdır”.
Yəni, nəticə etibarilə qeyd etmək olar ki, layihənin yüksək səviyyədə reallaşdırılması strateji mənada mövcud əməkdaşlıq platformalarının yeni keyfiyyət qazanmasına gətirib çıxarmaqla yanaşı, siyasi münasibətlərin və mövqelərin də beynəlxalq müstəvidə daha da güclənməsinə təkan verəcək. O baxımdan ki, layihə çərçivəsində davam etdiriləcək əməkdaşlıq gələcəkdə layihənin coğrafi əhatə dairəsini genişləndirməklə yanaşı, iştirakçı və dəstəkçi-tərəfdaş ölkələr arasında yeni işbirliyi formalarının da gündəmə gəlməsinə gətirib çıxaracaq...
Qanunauyğun proqnoz, yaxud layihənin siyasi-strateji önəmi münasibətlərə yeni keyfiyyət elementləri bəxş edəcək
AGRİ layihəsi siyasi-strateji mənada bir neçə cəhətdən xüsusi önəm kəsb edir:
Birincisi, bəhs edilən layihə Qara dəniz-Xəzər dənizi əməkdaşlığına yeni keyfiyyət bəxş edəcək. çünki hövzə əməkdaşlığının əsasını enerji təhlükəsizliyi təşkil etdiyindən bu layihənin reallaşdırılması həm enerji təhlükəsizliyinin təmin olunması, həm də yanaşı işbirliyi sahələrindəki əlaqələrin dərinləşməsi baxımından xüsusi önəm kəsb edir;
İkincisi, layihəyə perspektivdə Xəzərin şərq sahilində yerləşən ölkələrin qoşulması ehtimalı təchizat yollarının diversifikasiyasını təmin etməklə bütövlükdə bəhs edilən coğrafi məkanda-regionda siyasi sabitliyin tam təminini zəruri şərtə çevirəcək. çünki layihənin əhatə olunduğu bölgənin təhlükəsizlik balansının təmini və qorunması bilavasitə “layihənin ömrü”nü və perspektivini müəyyən edəcək. Nəzərə alsaq ki, AGRİ olduqca rentabellidir və ortaq maraqların uzlaşdırılması fonunda reallaşdırılır, onda qeyd edə bilərik ki, layihənin əhatə olunduğu bölgədə siyasi stabillik yüksək səviyyədə təmin olunacaq. Bu da siyasi münasibətlərə yeni keyfiyyət elementləri bəxş edəcək.
Nurlan QƏLƏNDƏROV

Paylaş:

Baxılıb: 1073 dəfə