Güclü Ordu – Qələbənin Təminatçısı

Bakı:

24 °C

64 %

12 m/s

Əlaqə

AZ RU EN

Ana səhifə / YAP xəbərləri / Güclü Ordu – Qələbənin Təminatçısı

Güclü Ordu – Qələbənin Təminatçısı

22.06.2026 [09:43]

26 İyun – Silahlı Qüvvələr Günü Azərbaycan xalqının həyatında xüsusi əhəmiyyət daşıyan əlamətdar günlərdən biridir. Bu tarix müstəqil Azərbaycanın güclü, peşəkar və müasir ordusunun formalaşmasını, dövlətimizin təhlükəsizliyinin etibarlı şəkildə qorunmasını və xalqımızın qürur mənbəyinə çevrilmiş Silahlı Qüvvələrin şərəfli xidmətini ifadə edir. Hər il bu gün ölkəmizdə böyük təntənə ilə qeyd olunur, hərbçilərin xidmətləri yüksək qiymətləndirilir, Azərbaycan Ordusunun keçdiyi şərəfli yol bir daha xatırlanır.

Azərbaycan Respublikasının Prezidenti, Müzəffər Ali Baş Komandan İlham Əliyevin qeyd etdiyi kimi: “İyunun 26-sı Silahlı Qüvvələr Günüdür. Bu günü biz hər il təntənə ilə qeyd edirdik. Müxtəlif tədbirlər keçirilirdi. Hər il 26 iyun tarixində hərbçilərlə görüşlər əsnasında mən deyirdim ki, gün gələcək biz öz doğma torpağımıza qayıdacağıq, ərazi bütövlüyümüzü bərpa edəcəyik. Deyirdim ki, əgər bu, danışıqlar yolu ilə mümkün olmayacaqsa, məsələni hərbi yolla həll edəcəyik. Belə də oldu. Uzun illər davam edən danışıqlar heç bir nəticə vermədi və Azərbaycan öz ərazi bütövlüyünü, tarixi ədaləti, beynəlxalq hüququ döyüş meydanında təmin etmişdir.”

Bu fikirlər Azərbaycan dövlətinin və xalqının illər boyu dəyişməz mövqeyini, torpaqlarımızın işğaldan azad olunması istiqamətində aparılan məqsədyönlü siyasəti və ordumuzun qüdrətini əks etdirir. Müstəqilliyin ilk illərində ölkədə hökm sürən siyasi və iqtisadi çətinliklər ordunun inkişafına da mənfi təsir göstərirdi. Lakin Ümummilli Lider Heydər Əliyevin hakimiyyətə qayıdışından sonra dövlət quruculuğu ilə yanaşı, güclü ordu quruculuğu prosesi də sürətləndirildi. Azərbaycan Silahlı Qüvvələrinin möhkəmləndirilməsi dövlət siyasətinin əsas istiqamətlərindən birinə çevrildi.

Sonrakı dövrdə Prezident İlham Əliyevin rəhbərliyi ilə ordu quruculuğu yeni mərhələyə qədəm qoydu. Müdafiə xərclərinin artırılması, müasir silah və texnikaların alınması, hərbi infrastrukturun yenilənməsi, şəxsi heyətin sosial müdafiəsinin gücləndirilməsi Azərbaycan Ordusunu regionun ən güclü ordularından birinə çevirdi. Ordumuzun peşəkarlığı beynəlxalq təlimlərdə və müxtəlif hərbi əməkdaşlıq layihələrində də öz təsdiqini tapdı.

Azərbaycan xalqı uzun illər ərzində torpaqlarının işğal altında qalması ilə barışmadı. Dövlətimiz münaqişənin beynəlxalq hüquq normaları çərçivəsində sülh yolu ilə həll olunmasına çalışdı. Lakin uzun sürən danışıqlar prosesinin nəticəsiz qalması göstərdi ki, işğalçı tərəf status-kvonu qorumağa çalışır. Belə bir şəraitdə Azərbaycan öz suveren hüquqlarını təmin etmək üçün qətiyyətli addımlar atdı.

2020-ci ilin Vətən müharibəsi Azərbaycan tarixinin ən şanlı səhifələrindən biri oldu. Müzəffər Ali Baş Komandan İlham Əliyevin rəhbərliyi ilə Azərbaycan Ordusu cəmi 44 gün ərzində düşmənə sarsıdıcı zərbələr endirdi, işğal altında olan şəhər və rayonlarımızı azad etdi. Şuşa şəhərinin azad olunması isə qələbənin zirvəsi və tarixi dönüş nöqtəsi oldu. Bu möhtəşəm zəfər nəticəsində Azərbaycan öz ərazi bütövlüyünü bərpa etdi və beynəlxalq hüququn tələblərini döyüş meydanında təmin etdi.

Qələbə Azərbaycan Ordusunun yüksək döyüş hazırlığının, hərbi qulluqçularımızın qəhrəmanlığının və xalq-iqtidar birliyinin nəticəsi idi. Minlərlə hərbçimiz Vətən uğrunda canından keçərək şəhidlik zirvəsinə ucaldı, qazilərimiz isə böyük şücaət nümunələri göstərdilər. Onların fədakarlığı sayəsində bu gün Azərbaycan xalqı qalib xalq kimi yaşayır və gələcəyə daha böyük inamla baxır.

Bu gün Silahlı Qüvvələr Günü artıq fərqli bir ruh yüksəkliyi ilə qeyd olunur. Azərbaycan Ordusu qalib ordudur. Əsgər və zabitlərimiz yalnız dövlət sərhədlərimizi qorumaqla kifayətlənmir, həm də regionda sülhün və sabitliyin təmin olunmasına öz töhfələrini verirlər. Azad edilmiş ərazilərdə aparılan bərpa-quruculuq işləri, keçmiş məcburi köçkünlərin doğma yurdlarına qayıdışı qələbəmizin real nəticələrini nümayiş etdirir.

26 İyun – Silahlı Qüvvələr Günü hər bir azərbaycanlı üçün qürur mənbəyidir. Bu gün biz güclü dövlətimizin, qüdrətli ordumuzun və qəhrəman hərbçilərimizin xidmətlərini ehtiramla yad edir, şəhidlərimizin əziz xatirəsini dərin minnətdarlıqla anırıq. Azərbaycan Ordusu bundan sonra da ölkəmizin müstəqilliyinin, suverenliyinin və ərazi bütövlüyünün etibarlı təminatçısı olaraq qalacaqdır.

Ehtibar İsmayılov

YAP Ordubad rayon təşkilatının sədri

Paylaş:

Baxılıb: 119 dəfə