YAP-ın siyahısı partiyanın bütövlükdə mövqeyini düzgün əks etdirir

Bakı:

15 °C

67 %

6 m/s

Əlaqə

AZ RU EN

Ana səhifə / Siyasət / YAP-ın siyahısı partiyanın bütövlükdə mövqeyini düzgün əks etdirir

YAP-ın siyahısı partiyanın bütövlükdə mövqeyini düzgün əks etdirir

21.09.2010 [09:30]

Əli Əhmədov: Parlament seçkilərində də YAP partiya daxilində kifayət qədər fəallıq nümayiş etdirmiş qadınların və gənc insanların namizədliklərini irəli sürmək barəsində çox əhəmiyyətli bir qərar qəbul edib
“Yeni Azərbaycan Partiyasının təqdim etdiyi siyahıda özünə yer tutmuş yeni simaların böyük əksəriyyəti Azərbaycan cəmiyyətində özlərinə nüfuz qazanmış, ölkə elminin, təhsilinin, mədəniyyətinin, həyatımızın digər sahələrinin inkişafına böyük töhfələr vermiş və buna görə də yüksək nüfuz sahibi olan insanlardır. Güman edirəm, onların malik olduğu böyük nüfuz qarşıdan gələn parlament seçkilərində onlara rəqib olacaq müxalifət təmsilçilərinin əldə edə biləcəyindən daha çox səs qazanmasına imkan verəcək”, - bunu Trend-ə müsahibəsində YAP-ın Sədr müavini-İcra katibi, millət vəkili Əli Əhmədov bildirib.
Əli Əhmədovun sözlərinə görə, YAP fəaliyyəti dövründə həm qadınların, həm də gənclərin ölkənin ictimai-siyasi həyatında yaxından iştirak etməsi üçün imkanlar yaradılmasını diqqət mərkəzində saxlayıb.
“Bu, bütün seçkilərdə müşahidə olunub. Bundan əvvəl - 2009-cu ildə keçirilən bələdiyyə seçkilərində də YAP böyük bir təşviqat kampaniyası apararaq, gənclərin və qadınların bələdiyyə seçkiləri kampaniyasında yaxından iştirak etməsini təşviq edirdi və biz güman edirik, əhəmiyyətli nailiyyətlər əldə edə bildik. Parlament seçkilərində də YAP partiya daxilində kifayət qədər fəallıq nümayiş etdirmiş qadınların və gənc insanların namizədliklərini irəli sürmək barəsində çox əhəmiyyətli bir qərar qəbul edib”, - deyə, YAP-ın Sədr müavini bildirib.
Qadın və gənc namizədlərin seçkilərdə iştirakının kifayət qədər uğurlu olacağını bildirən Əli Əhmədovun sözlərinə görə, irəli sürülən namizədlər içərisində yaşı 40-dan az olan 15-dən yuxarı insan var.
“Bunlar da, güman edirəm, artıq Azərbaycan cəmiyyətində, həyatımızın müxtəlif sahələrində fəaliyyətləri ilə özlərini tanıda bilmiş, hörmət, nüfuz qazanmış insanlardır. İnanırıq ki, onların da seçki kampaniyası uğurlu olacaq və YAP-ın deputat korpusunun cavanlaşmasına əhəmiyyətli köməklik göstərə biləcək” - deyə, Əli Əhmədov vurğulayıb.
YAP-ın Sədr müavininin bildirdiyinə görə, bütün dairələr üzrə aparılan təhlillər nəticəsində müəyyən edilib ki, partiyanın irəli sürdüyü namizədlər həm bütövlükdə, həm də ayrı-ayrılıqda dairələr üzrə rəqiblərimiz tərəfindən irəli sürülən namizədlərdən öz keyfiyyətlərinə, şanslarına, nüfuz və hörmətlərinə görə əhəmiyyətli dərəcədə fərqlənirlər.
Ə.Əhmədov onu da qeyd edib ki, YAP-ın parlament seçkilərinə namizədlərin siyahısı bütövlükdə partiya daxilində aparılan geniş müzakirələr nəticəsində tərtib edildiyindən, partiyanın hər bir üzvünün iradəsini və mənafeyini əks etdirir.
“Siyahının açıqlanmasından artıq bir neçə gün keçməsinə baxmayaraq, bütövlükdə, həm cəmiyyət, həm də Yeni Azərbaycan Partiyası tərəfindən bu siyahı müsbət qiymətləndirilib. Namizədlər siyahısında adı olmayan keçmiş deputatların əksəriyyəti siyahının məhz bu insanların iştirakı ilə tərtib edilməsini tamamilə normal qarşılayıb. Mən bunu YAP-ın daxili birliyinin və monolitliyinin ifadəsi hesab edirəm. Ona inanmaq istəyirəm və düşünürəm, siyahıya daxil edilməyən keçmiş deputatların özləri də vaxtı ilə onların deputat olduğu dairələrdə YAP tərəfindən irəli sürülmüş yeni namizədlərin uğur qazanmasına öz imkanları daxilində dəstək verəcəklər”, - Əli Əhmədov müsahibəsində bildirib.

Paylaş:

Baxılıb: 1050 dəfə