Siyasi partiyalar milli maraqları və ali dəyərləri qorumaq üçün cəmiyyəti hərəkətə gətirə bilən əsas qüvvələrdir

Bakı:

24 °C

63 %

10 m/s

AZ RU EN

Ana səhifə / Siyasət / Siyasi partiyalar milli maraqları və ali dəyərləri qorumaq üçün cəmiyyəti hərəkətə gətirə bilən əsas qüvvələrdir

Siyasi partiyalar milli maraqları və ali dəyərləri qorumaq üçün cəmiyyəti hərəkətə gətirə bilən əsas qüvvələrdir

21.09.2010 [09:37]

Əgər hər hansısa partiya(lar) yalnız siyasi kampaniyalar zamanı hərəkətə gəlirsə, insanları ümummilli mənafeləri qorumaq işindən uzaqlaşdırırsa, o zaman, bu siyasi təşkilat(lar) sosial dəstəkdən məhrum olmaqla yanaşı, tarix qarşısında da cavab verməli olacaq
II məqalə
Keçmiş sovet cəmiyyətinin bir hissəsi olmuş Azərbaycan sosiumu artıq 17 ildir ki, yüksələn xətli inkişaf çərçivəsində müasir dəyərlərə doğru transformasiya edir. Bu mərhələdə cəmiyyətimiz güclü siyasi iradəyə malik hakimiyyətin formalaşdırdığı söz, fikir, yaradıcılıq, vicdan azadlıqlarının ehtiva olunduğu plüralist və demokratik atmosferdən bəhrələnərək, yeni dəyərlər yaratmaqdadır. Mədəniyyətlərin, fəlsəfi-düşüncələr sisteminin qarşılıqlı inteqrasiyasının güclü olduğu və ənənəvi cəmiyyətlərə xas olmayan dəyərlərin sürətlə yayıldığı bir zamanda, xalqların kolliziyalar vaxtı ayaqda durmasına xidmət etmiş ali dəyərlər yavaş-yavaş sıradan çıxarılmış olur. Bütün bunları nəzərə alan Azərbaycanda ali dəyərlərin, milli maraqların qorunması hazırda sosium qarşısında duran əsas vəzifələrdən sayılır.
Bu gün xalqımızın əsrlər boyu inkişafını və dünya xalqları sırasında öz layiqli yerini tutmasını təmin etmiş dəyərlərimizi və ilk növbədə dövlətçiliklə, ölkəmizin gələcəyilə bağlı milli maraqları qorumaq həm də siyasi partiyaların borcudur...
Partiyalar insanları ideyalarla silahlandırmalıdır...
ümumiyyətlə, müasir cəmiyyətdə insanların və ya qrupların müxtəlifliyi ilə seçilən maraqlarının, dəyərlərinin qarşılıqlı fəaliyyət zamanı effektiv qorunması və reallaşdırılması üçün onların təmsilçiliyini həyata keçirən yüksək səviyyəli mexanizm formalaşmalıdır. Əlbəttə ki, siyasi səhnədə açıq və aktiv şəkildə fəaliyyət göstərən siyasi qüvvə, yuxarıda göstərilən istiqamət üzrə işləyən subyekt qismində isə məhz, partiyalar çıxış edə bilir. Ona görə də, müasir cəmiyyəti partiyasız təsəvvür etmək mümkün deyil.
Partiyalar sosial-iqtisadi və sosio-mədəni xarakterli, cəmiyyətin evolyusiyasının məhsulu olduğu üçün, onlar siyasi məqsədlərlə yanaşı, ümummilli maraqları ehtiva edən fəaliyyət də sərgiləməlidirlər.
Siyasi partiyalar sosial qruplarla və bütövlükdə cəmiyyətlə əlaqəsini həyata keçirən sosial nümayəndəlik, siyasi liderlərin seçilməsi, sosial iqteqrasiya, siyasi sosiallaşma, hakimiyyət uğrunda mübarizə, yeni strategiyaların hazırlanması kimi funksiyaları həyata keçirir. Göstərilənlər siyasət nəzəriyyəsində müəyyən olunmuş funksiyalardır ki, bunları yalnız konkret norma kimi götürmək olar. Yəni, bütün funksiyaları reallaşdıra biləcək siyasi partiyalara çox az hallarda təsadüf edilib. Amma hər bir siyasi partiyanın bu funksiyaları həyata keçirmək qabiliyyətində olmasını onun ətrafında toplaşmış insanların, tərəfdarların sayı ilə də müəyyənləşdirmək olur.
Partiyalar, həmçinin, məqsədindən asılı olmayaraq, dövlətçiliyin maraqlarına xidmət edən ideyaların yayılması işi ilə də məşğul olmalıdırlar. Bu cür hallara tarixdə dəfələrlə rast gəlinmişdi. Məsələn, 1884-cü ildə ingilis ziyalıları tərəfindən yaradılmış “Fabian cəmiyyəti” kapitalist cəmiyyətin sosial islahatlar yolu ilə inkişaf etdirilməsi ideyalarının yayılması ilə məşğul olub.
Bu fakt isə onu göstərir ki, partiyalar, eyni zamanda, göstərilən funksiyalarla yanaşı, cəmiyyəti dövlətin ümumi düşməninə qarşı səfərbər etməli, milli maraqların və ali dəyərlərin qorunması üçün insanları ideyalarla silahlandırmalıdır. Bunu isə siyasi partiyalar gündəlik fəaliyyətlərində nümayiş etdirməlidirlər.
partiyalarımız da dəyərlərimizin qorunması işində yüksək aktivlik nümayiş etdirməlidir...
Qeyd etdiyimiz kimi, Azərbaycan xalqının ali dəyərləri bu gün Qərbdən gələn demokratiya adı altında böyük dalğanın təsirinə məruz qalır. Bu təsirlərin neytrallaşdırılması və xaric edilməsi, milli dəyərlərimizin qorunması üçün sosial-ictimai statusundan asılı olmayaraq, cəmiyyətin bütün üzvləri lazımi işləri həyata keçirməlidirlər. Milli maraqlarımızı və ali dəyərlərimizi mənfi təsirlərdən qorumaq üçün partiyalar da böyük məsuliyyət daşıyırlar. Amma təəssüflər ki, ölkəmizdə bu məqsəd üçün partiyaların böyük əksəriyyətinin fəaliyyəti qənaətbəxş deyil. Bu isə onların cəmiyyəti müxtəlif xarici risklərin təsirlərindən müdafiə etməkdə maraqlı olmamalarından irəli gəlir.
Ətrafında yarım milyondan çox insanı birləşdirən bir partiyanın ortaya qoyduğu ideyalar, cəmiyyəti milli-mənəvi dəyərlərdən uzaqlaşdıran fəaliyyət Qərb demokratiyası və mədəniyyəti adı altında daxil olan mənfi təsirlərin qarşısının alınmasına böyük töhfələr verməkdədir. Amma üzvü olduqları partiyanın adını çəkməyə utanan insanları ətrafında birləşdirən bir çox partiyalar isə şəxsi maraqların reallaşdırılması vasitəsinə çevrilib. Yalnız seçki zamanı hərəkətə keçən bu partiyaların əsas məqsədi insanlara yalançı vədlər verməklə, onların etimadını qazanmağa çalışmaq olur.
ümumiyyətlə, söhbət əgər Azərbaycan xalqının ali dəyərlərindən, dövlətimizin maraqlarından gedirsə, burada siyasi mənsubiyyət önəm kəsb etmir. Gərək bütün partiyalar xalqımızın sərvəti olan dəyərlərinin qorunması işində yüksək aktivlik nümayiş etdirsin. Əks təqdirdə milli-mənəvi dəyərlərin assimilyasiyası prosesi başlaya və böyük fəsadlar törənə bilər.
Bir sözlə, siyasi partiyalar milli maraqları və ali dəyərləri qorumaq üçün cəmiyyəti hərəkətə gətirə bilən əsas qüvvələrdir. Əgər hər hansısa partiya(lar) yalnız siyasi kampaniyalar zamanı hərəkətə gəlirsə, insanları ümummilli mənafeləri qorumaq işindən uzaqlaşdırırsa, o zaman, bu siyasi təşkilat(lar) sosial dəstəkdən məhrum olmaqla, tarix qarşısında cavab verməli olacaq.
Ramil VƏLİBƏYOV

Paylaş:

Baxılıb: 1197 dəfə