Ceyhun Bayramovla Ararat Mirzoyan növbəti dəfə danışdılar...

Bakı:

24 °C

66 %

11 m/s

Əlaqə

AZ RU EN

Ana səhifə / Siyasət / Ceyhun Bayramovla Ararat Mirzoyan növbəti dəfə danışdılar...

Ceyhun Bayramovla Ararat Mirzoyan növbəti dəfə danışdılar...

26.04.2022 [10:11]

Birgə Sərhəd Komissiyası və işçi qrupu yaxın zamanlarda görüşəcək

Nardar BAYRAMLI

Azərbaycanın xarici işlər naziri Ceyhun Bayramov ilə Ermənistanın xarici işlər naziri Ararat Mirzoyan arasında telefon danışığı olub. Bu barədə Xarici İşlər Nazirliyinin Mətbuat xidməti idarəsindən verilən məlumatda bildirilir ki, nazirlər iki dövlətin liderləri səviyyəsində əldə edilmiş razılaşmaların davamı olaraq fikir mübadiləsi aparıblar. Tərəflər Birgə Sərhəd Komissiyasının iştirakçılarının parametrləri barədə razılığa gəliblər. Birgə Sərhəd Komissiyasının, habelə sülh müqaviləsinin işlənib hazırlanması ilə bağlı işçi qrupunun görüşlərinin yaxın zamanlarda təşkil olunmasına dair razılıq əldə edilib. Nazirlər, eyni zamanda humanitar sahədə addımların davam etdirilməsi ilə bağlı fikir mübadiləsi aparıblar.

Ümumiyyətlə, əldə olunan razılaşmaların icrası baxımından xarici işlər nazirlərinin telefon danışığı müsbət faktdır. Ermənistan bu razılaşmalara nə dərəcədə əməl edəcək?

Məsələ ilə bağlı qəzetimizə açıqlama verən Milli Məclisin deputatı Ramin Məmmədov bildirib ki, son dövrlər Avropa İttifaqı Cənubi Qafqazda sülhün, təhlükəsizliyin və əməkdaşlığın təmin edilməsi üçün böyük fəallıq göstərir. Onun sözlərinə görə, Avropa İttifaqı Şurasının Prezidenti Şarl Mişelin təşəbbüsü ilə Azərbaycan Prezidenti İlham Əliyev və Ermənistanın baş naziri Nikol Paşinyan arasında ötən ilin dekabrında və bu il aprelin 6-da Brüsseldə görüşü keçirilib: “Bundan əlavə, Şarl Mişel mütamadi olaraq iki ölkələrin rəhbərləri ilə telefonla danışır, eləcə də Avropa İttifaqının Cənubi Qafqaz üzrə xüsusi nümayəndəsi Toivo Klaar tez-tez regiona səfər edir. Bütün bunlar proseslərin kifayət qədər aktivliyinin göstəricisidir. Düşünürəm ki, aprelin 6-da Brüsseldə keçirilən görüş daha məhsuldar oldu. Bunu Şarl Mişelin görüşün nəticələri ilə bağlı bəyanatında da aydın görmək mümkündür. Ən vacib məqamlardan biri aprelin sonunadək birgə sərhəd komissiyasının yaradılması və sülh sazişinin hazırlanması üzrə işçi qruplarının təşkil edilməsidir. Hesab edirəm ki, xarici işlər nazirlərinin telefon danışığında əldə olunan razılıq müəyyən qədər nikbinliyə əsas verir. Çünki Brüssel görüşündən sonra Paşinyanın Ermənistan parlamentində çıxışı da qarşı tərəfin mövcud reallıqlarla barışmasının göstəricisidir. Amma biz indiyə qədər ermənilərin razılaşmaları dəfələrlə pozduğuna şahidlik etmişik. Ona görə də, proseslərin gələcəyi haqqında qəti fikir söyləmək mümkün deyil. Həm də Paşinyanın Moskvaya səfəri diqqətlə izlənildi, belə fikirlər səslənirdi ki, bu səfərdən sonra erməni tərəfinin mövqeyində dəyişikliklər ola bilər. Həmin səfərdən sonra Avropa İttifaqının Prezidenti Şarl Mişelin həm Azərbaycan, həm də Ermənistanın rəhbəri ilə telefon danışıqları oldu. Eləcə də, xüsusi nümayəndə Tovio Klaar da bölgəyə səfər edərək müzakirələr apardı”.

Millət vəkili qeyd edib ki, Prezident İlham Əliyev Şarl Mişellə aprelin 23-də telefon danışığında Brüssel görüşünün nəticələrinə uyğun olaraq Azərbaycan tərəfinin Ermənistan-Azərbaycan sərhədinin delimitasiyası və demarkasiyası üzrə milli komissiyanın və iki ölkə arasında sülh müqaviləsinin hazırlanması üzrə nümayəndə heyətinin tərkibini müəyyən etdiyini vurğulayıb: “Görünən odur ki, Azərbaycanın regionda yaratdığı yeni reallıqları Ermənistan da qəbul edir. Erməni tərəfi razılaşmalara əməl etməyə məcburdur. Əks halda, itirən özü olacaq. Paşinyana daxili təzyiqlər var və bu təzyiqlərin xaricdəki bəzi dairələr tərəfindən idarə olunduğu istisna deyil. Ermənistanda revanşistlər hər fürsətdə Paşinyana qarşı etiraz aksiyaları keçirirlər. Amma əhalini öz ətraflarına toplamağa çətinlik çəkirlər. Çünki erməni xalqı onların kim olduğunu yaxşı bilir. Revanşistlər hakimiyyətə gəlmək üçün hər cür təxribata da gedə bilər. Belə olan halda, regionda vəziyyət yenidən gərginləşə bilər ki, bu da heç kimin marağında deyil. Əgər Paşinyan hakimiyyəti razılaşmalara sadiq qalsa, proses irəli gedə bilər. Hər halda, xarici işlər nazirlərinin birbaşa telefon danışığı və əldə olunan razılaşmalar buna ümid verir”.

Paylaş:

Baxılıb: 683 dəfə