Rəsmi Bakı prezidentlər arasında bəyannamə imzalanmasını mühüm hadisə hesab edir

Bakı:

11 °C

82 %

4 m/s

Əlaqə

AZ RU EN

Ana səhifə / Siyasət / Rəsmi Bakı prezidentlər arasında bəyannamə imzalanmasını mühüm hadisə hesab edir

Rəsmi Bakı prezidentlər arasında bəyannamə imzalanmasını mühüm hadisə hesab edir

30.10.2010 [12:06]

Novruz Məmmədov: Ermənistan ATƏT-in Astana sammitinə qədər müəyyən addımlar atmalıdır
Rəsmi Bakı hesab edir ki, Ermənistan ATƏT-in Astanada keçiriləcək sammitinə qədər müəyyən addımlar atmalıdır. “Düşünürəm ki, bütün bu danışıqlar prosesi, həmsədrlərin də orada iştirakı, Rusiya prezidenti Dmitri Medvedevin fəal iştirakı elə bir situasiya yaradır ki, Ermənistan tərəfi öz mövqeyini bir daha götür-qoy edib, konstruktiv mövqe tutmaq üçün addımlar atmaq məcburiyyətində qalacaq, çünki qarşıdan ATƏT-in sammiti gəlir, o sammitə qədər müəyyən addımlar atılmalıdır”. Bunu Trend-ə eksklüziv müsahibəsində Azərbaycan, Rusiya və Ermənistan prezidentlərinin Həştərxanda keçirdikləri görüşü şərh edən Prezident Administrasiyasının Beynəlxalq əlaqələr şöbəsinin müdiri Novruz Məmmədov bildirib.
Qeyd edək ki, ATƏT sammiti dekabrın 1-2-də Astanada keçiriləcək. Sammitdə təşkilata 56 üzv ölkənin, 12 tərəfdaş ölkənin dövlət və hökumət başçıları, eləcə də, 68 beynəlxalq təşkilatın rəhbəri iştirak edəcək. N.Məmmədov bildirib ki, Həştərxanda danışıqlar prosesində hər üç prezident xarici işlər nazirlərinə ATƏT sammitinə qədər müəyyən addımlar atıb, danışıqları davam etdirib, sammitə hər hansı bir məqamla gəlib-çıxmaları ilə bağlı tapşırıq verib. “Xarici işlər nazirlərinə tapşırıqlar verilib ki, danışıqlar aparsınlar, əllərindən gələni etsinlər ki, ora hər hansı bir nəticə ilə gəlib-çıxmaq mümkün olsun. Amma bu, mümkün olacaq, ya olmayacaq, demək çətindir. Ermənistan tərəfi hələ də özünün qeyri-konstruktiv mövqeyində israrla qalır. Burada təəssüf doğuran bircə məqam var. Rusiya prezidenti və xarici işlər naziri bu məsələdə çox fəaldırlar və bunu da dəyərləndirmək, qiymətləndirmək lazımdır. Amma ABŞ-la Fransa tərəfi, çox təəssüflər olsun, belə fəallıq göstərmirlər. Baxmayaraq ki, onlar Həştərxanda olan görüşlərin nəticələrini bəyənirlər” - deyə, Novruz Məmmədov əlavə edib. PA rəsmisi Həştərxan görüşünü son 1 ildən artıq müddətdə Rusiya Federasiyası Prezidentinin xüsusi, çox fəal iştirakı ilə təşkil olunmuş görüşlərin növbəti bir prosesi adlandırıb. “Həştərxan görüşü də Rusiya Prezidenti Dmitri Medvedev tərəfindən təşkil olunub. Məqsəd də budur ki, mürəkkəb, çətin danışıqlar prosesində irəliyə bir addım atılsın. üç prezidentin bir yerə gəlməsi adi hadisə deyil və hamı bilir ki, Azərbaycan Prezidenti bu münaqişənin həlli ilə bağlı gedən danışıqlar prosesində irəliyə addım atılması üçün hər bir şeyi edir”, - deyə N.Məmmədov qeyd edib. O, prezidentlərin hərbi əsirlərin və həlak olanların cəsədlərinin qaytarılması ilə bağlı razılaşmanı mühüm hadisə hesab edir. “Bu, bir tərəfdən, prezidentlər arasında ən kiçik səviyyədə olsa da, anlaşmanın mümkün olduğunu, bir-birlərinə qarşı inam, etimad tədbirlərinin baş tutduğunu və bu istiqamətdə işləməyin mümkün olduğunu bir daha göstərir. Həm də bizim Milli Qəhrəmanımız Mübariz İbrahimovun cəsədinin alınması məsələsi də mühüm hadisədir” - deyə PA rəsmisi əlavə edib.
Xatırladaq ki, oktyabrın 27-də Həştərxanda Azərbaycan, Rusiya və Ermənistan prezidentlərinin görüşünün yekunu olaraq Bəyannamə imzalanıb və həmin sənəd hərbi əsirlərin qaytarılmasını nəzərdə tutur, humanitar xarakter daşıyır. Rusiya prezidenti Dmitri Medvedevin sözlərinə görə, xüsusi Bəyannamə etimad tədbirlərinin möhkəmləndirilməsinə yönəldilib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni, Dağlıq Qarabağ ərazisi və bu əraziyə bitişik yeddi rayon Ermənistan silahlı qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.

Paylaş:

Baxılıb: 1018 dəfə