Yeni Azərbaycan Partiyası dünənin, bu günün və sabahın partiyasıdır

Bakı:

10 °C

93 %

6 m/s

Əlaqə

AZ RU EN

Ana səhifə / Siyasət / Yeni Azərbaycan Partiyası dünənin, bu günün və sabahın partiyasıdır

Yeni Azərbaycan Partiyası dünənin, bu günün və sabahın partiyasıdır

20.11.2010 [10:50]

Qaradağ rayonunda YAP-ın yaradılmasının 18-ci ildönümü münasibətilə tədbir keçirilib
Dünən Qaradağ rayonunda YAP-ın yaradılmasının 18-ci ildönümü münasibətilə tədbir keçirilib. Tədbir iştirakçıları öncə partiyanın qərargahında xalqımızın ümummilli lideri, müasir müstəqil Azərbaycan dövlətinin memarı və qurucusu, Yeni Azərbaycan Partiyasının yaradıcısı Heydər Əliyevin xatirəsini ehtiramla yad edib, abidəsi önünə gül dəstələri qoyublar.
Akt zalında davam etdirilən tədbirdə çıxış edən YAP Qaradağ rayon təşkilatının sədri, partiyanın Siyasi Şurasının üzvü Aydın Hüseynov bildirib ki, 1992-ci il noyabrın 21-də ümummilli lider Heydər Əliyevin müdrikliyi və uzaqgörənliyi ilə YAP-ın yaradılması ölkəmizin ictimai-siyasi həyatında mühüm hadisədir: “Azərbaycan xalqının təkidli tələbi ilə ikinci dəfə ölkənin siyasi hakimiyyətinə gələn Heydər Əliyev 1993-cü ildə Sədri olduğu Yeni Azərbaycan Partiyasını iqtidara gətirdi. Ulu öndərin siyasi təcrübəsi, uzaqgörənliyi və iradəsi nəticəsində respublikamızda siyasi böhrana, vətəndaş müharibəsi təhlükəsinə, seperatçılıq meyllərinə, dövlət çevrilişi cəhdlərinə, terror aktlarına son qoyuldu, vətəndaş həmrəyliyi təmin edildi, ölkə daxilində ictimai-siyasi sabitlik bərqərar edildi”.
çıxış edən Qaradağ rayon İcra Hakimiyyətinin başçısı Süleyman Mikayılov YAP-ın yaradılmasının 18-ci ildönümü münasibətilə tədbir iştirakçılarını təbrik edib. Böyük uğurların əldə edilməsinin prinsipial əsaslarını diqqətə çatdıran Süleyman Mikayılov vurğulayıb ki, Ulu öndər Heydər Əliyev tərəfindən əsası qoyulan sosial-iqtisadi inkişaf siyasətinin partiyamızın Sədri, Prezident İlham Əliyev tərəfindən uğurla davam etdirilməsi nəticəsində ölkəmiz günü-gündən çiçəklənir, tərəqqi edir: “Bu siyasətin məntiqi nəticəsi Azərbaycanın sürətli inkişafı, bölgədə lider dövlətə çevrilməsi, dünyaya inteqrasiya prosesinə aktiv şəkildə qoşulması və bu prosesdə uğurla iştirak etməsi, ölkəmizin beynəlxalq mövqelərinin möhkəmlənməsinə və beynəlxalq əhəmiyyətinin artmasına xidmət etməkdən ibarətdir. İnsanların rifahının yaxşılaşdırılması istiqamətində dövlətin uğurlu siyasəti və həyata keçirdiyi çox mühüm tədbirlər, böyük regional iqtisadi layihələrin bilavasitə Azərbaycanın iştirakı ilə gerçəkliyə çevrilməsi indiki iqtidarın fəaliyyəti nəticəsində mümkün olmuşdur. Azərbaycanı misilsiz inkişaf həddinə çıxaran partiyamızın Sədri, Prezident İlham Əliyev yeni zamanın yeni lideri, həyata keçirdiyi daxili və xarici siyasət kursu, əldə etdiyi nailiyyətlər qazanılan uğurların möhkəm təməlini təşkil edir”.
Süleyman Mikayılov deyib ki, bu gün Yeni Azərbaycan Partiyasının sıralarında 520 mindən artıq insan birləşib: “Bu insanlar sadəcə olaraq partiyaya üzv olmaq naminə deyil, müstəqil, demokratik, hüquqi, dünyəvi və sosialyönlü dövlətin qurulması naminə birgə səy göstərmək amalı ilə Yeni Azərbaycan Partiyasının ətrafına toplaşmış üzvlərdir. Partiya sıralarında olan insanlar müxtəlif sahələrdə çalışmaqla, həm partiyamızın qarşısına qoyduğu vəzifələrə necə əməl etməsini sübut edir, həm də güclü dövlətin yaradılması prosesinə özünəməxsus töhfə vermiş olurlar”.
“Cəmiyyətdə günü-gündən sosial bazasını möhkəmləndirən Yeni Azərbaycan Partiyası əsas qüvvə kimi istimai-siyasi proseslərin önündə gedir” fikri ilə çıxışına başlayan YAP İdarə Heyətinin üzvü Nizami Xudiyev deyib ki, partiyamızın cəmiyyətin fəal, ziyalı, siyasi prosesləri dərindən dərk edən və düzgün nəticə çıxarmağı bacaran təbəqəsini özündə birləşdirən 520 mindən çox üzvü vardır: “Bu, Partiyamızın geniş resursa malik olduğunu göstərir”.
çıxış edən YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə tədbir iştirakçılarını təbrik edərək deyib ki, 1992-ci ildə Azərbaycanın yenicə qazandığı müstəqilliyini qorumaq, dövlətimizi gücləndirmək və ölkəni bərabərhüquqlu aktor kimi beynəlxalq münasibətlər sisteminə çıxarmaq məqsədilə ətrafında vətənpərvər, uzaqgörən insanları birləşdirən Yeni Azərbaycan Partiyası yaradıldı: “Ağır dönəmdə Ulu öndər Heydər Əliyevin ətrafında toplaşmış vətənpərvər insanlar Naxçıvana gedərək Azərbaycanın işıqlı sabahına olan ümidlərinin yalnız və yalnız ümummilli liderimizlə bağlı olduğunu sübuta yetirdilər. Həyatları təhlükədə olmasına baxmayaraq, dövlətimizin və xalqımızın gələcəyini düşünən bu insanlar yaradılmış partiyanı inkişaf etdirərək hətta deyərdim ki, bütövlükdə regionun avanqard, ən güclü siyasi qüvvəsinə çevirdilər. Ulu öndər Heydər Əliyevin partiyaya rəhbərliyi dönəmində qarşısına qoyduğu məqsəd və vəzifələrə doğru addım-addım irəliləyən Yeni Azərbaycan Partiyası xalqın etimadını doğrultmağa və ətrafında çoxminli kontingent formalaşdırmağa nail oldu. Cənab Prezidentimiz İlham Əliyevin rəhbərliyi də partiyamıza daha böyük uğurlar gətirdi və bu gün də nailiyyətlər seriyası davam etdirilməkdədir”.
Sonra çıxış edən partiya fəallarından Rəhman Yusifov, Hicrət Qaradağlı, İmran Şıxəliyev, Xatirə Namazova və Şahmar Hüseynov Yeni Azərbaycan Partiyasının dövlətimizin ictimai-siyasi, sosial-iqtisadi həyatında oynadığı roldan danışıblar.
Ramil VƏLİBƏYOV

Paylaş:

Baxılıb: 1014 dəfə