"WikiLeaks" internet saytı imperialist güclərin maraqlarına xidmət edir

Bakı:

25 °C

53 %

2 m/s

Əlaqə

AZ RU EN

Ana səhifə / Siyasət / "WikiLeaks" internet saytı imperialist güclərin maraqlarına xidmət edir

"WikiLeaks" internet saytı imperialist güclərin maraqlarına xidmət edir

01.12.2010 [09:37]

Dövlətlər və rəsmi şəxslər arasındakı münasibətlərə xələl gətirmək istəyən qüvvələrin kimliyi hər kəsə bəllidir
Hələ ötən əsrin ikinci yarısında nüfuzlu alimlər informasiyanın dünya üçün böyük əhəmiyyət kəsb edəcəyini, hətta dövlətlərin bu sahədə təhlükəsizlik tədbirləri həyata keçirmək məcburiyyətində qalacağını söyləmişdilər. Artıq həmin vaxt gəlib çatıb və yaşadığımız əsri də “informasiya əsri” adlandırırlar.
Təsadüfi deyil ki, bu gün dünyanın imperialist gücləri öz mənafeləri naminə informasiyadan silah kimi istifadə edərək, ölkələr daxilində çaxnaşmalar yaradır, hətta dövlətlərarası münasibətləri belə korlaya bilirlər. Məhz qloballaşma prosesi çərçivəsində informasiyanın digər ənənəvi təzyiq vasitələrinə nəzərən daha çox istifadə edilməsi isə gələcəkdə bu sahədə təhlükələrin artacağını və artıq başlanmış informasiya müharibəsinin daha da güclənəcəyini ehtimal etməyə əsas yaradır.
Yeri gəlmişkən, bu günlərdə “WikiLeaks” internet saytında ABŞ rəsmilərinin xarici dövlət başçıları və nümayəndələri ilə keçirdikləri görüşlərin guya “bəzi gizli məqamlarını” əks etdirən materialların yayılması güclənən informasiya müharibəsinə əyani sübutdur.
Qeyd edək ki, həmin materiallarda Azərbaycan Respublikası Prezidentinin ABŞ-ın rəsmi nümayəndələri ilə keçirdiyi görüşlə bağlı da bəzi fikir və mülahizələr əks olunub. Azərbaycan Respublikası Prezidentinin mətbuat xidmətinin məlumatında bununla əlaqədar bildirilib ki, saytda Azərbaycan Respublikası Prezidenti İlham Əliyevə aid edilən fikir və mülahizələr qətiyyən həqiqəti əks etdirmir və onların heç bir əsası yoxdur: “Bu materiallar Azərbaycanın qonşu dövlətlərlə münasibətlərini korlamaq, ölkə başçıları arasında inamsızlıq və etimadsızlıq yaratmaq məqsədi daşıyan açıq təxribatdır. Prezidentin leksikonunda saytda ifadə olunmuş jarqon ifadələr, kəskin və emosional dəyərləndirmələr mövcud deyildir.
Azərbaycan Respublikası heç zaman qonşu dövlətlərin daxili siyasət məsələlərinə qarışmayıb və hər zaman region dövlətləri ilə mehriban qonşuluq əlaqələrinin saxlanılmasına, inkişaf etdirilməsinə xidmət edən şəffaf siyasət yürüdüb. Azərbaycan Prezidenti istənilən görüş və çıxışlarında milli maraqlardan irəli gələn fikirləri açıq-aydın ifadə edib. ölkənin xarici siyasəti həmişə müstəqil, davamlı, məntiqli və səmimi olub”.
Bu məsələyə Azərbaycan Prezidenti Administrasiyasının beynəlxalq əlaqələr şöbəsinin müdiri Novruz Məmmədov da münasibət bildirib: “Orada yer alan bəzi məlumatlar məni təəccübləndirdi. Ona görə təəccübləndirdi ki, bu məlumatlarda Azərbaycan Prezidentinin görüşləri zamanı ona aid olduğu iddia edilən bəzi fikirlər yayılıb”.
N.Məmmədov Azərbaycan Prezidenti İlham Əliyevin indiyə qədər olan bütün siyasi xarakterli görüşlərində iştirak etdiyini deyərək, bu görüşlərin birbaşa müşahidəçisi olduğunu vurğulayıb: “Mən Azərbaycan Prezidenti İlham Əliyevin ABŞ dövlət katibinin müavini Uilyam Börnslə keçirdiyi görüşdə də iştirak etmişəm. Qeyd etmək istəyirəm ki, konkret bu görüş iki məsələyə həsr olunub, yəni, görüşün predmeti iki məsələ olub: birinci məsələ Ermənistan-Azərbaycan, Dağlıq Qarabağ münaqişəsinin həlli, ikinci məsələ isə Azərbaycanla ABŞ arasında ikitərəfli münasibətlərin inkişafı. Bildirmək istəyirəm ki, ümumiyyətlə, Azərbaycan Prezidentinin keçirdiyi görüşlərdə həmişə belə olub: bir qayda olaraq Azərbaycan Prezidenti keçirdiyi görüşdə təmsil olunan tərəfin Azərbaycanla əlaqələrindən danışır. Belə görüşlər zamanı Azərbaycan Prezidenti üçüncü tərəf və ya dövlət haqqında danışmır. Bayaq adını çəkdiyim Uilyam Börnslə görüş zamanı da belə olub. Yəni, dediyim iki məsələdən başqa heç bir dövlət barədə danışıq olmayıb”.
N.Məmmədov vurğulayıb ki, bizim qonşu dövlətlərlə münasibətlərimizin real vəziyyəti bu gün hamıya bəllidir: “O cümlədən, ikitərəfli əməkdaşlıq sahəsində qonşu dövlətlərlə atdığımız addımlar göz önündədir. Bunu sübut etməyə heç bir ehtiyac yoxdur. Təkcə qardaş Türkiyə ilə bu illər ərzində gördüyümüz işlər beynəlxalq aləmdə son onilliyin ən mühüm və möhtəşəm layihələridir ki, bunların həyata keçirilməsində Prezident İlham Əliyevin müstəsna xidmətləri var”.
ümumiyyətlə, bu materialların yayılma istiqamətlərinə nəzər yetirdikdə, “WikiLeaks” internet saytını dezinformasiya ilə təmin edən qərəzli mənbə və imperialist güclərin məqsədləri açıq-aydın görünmüş olur. Əlbəttə ki, yayılmış materiallar əsasında dərin təhlillər aparıb imperialist güclərin bütün kartlarını üzə çıxarmaq mümkündür. Amma düşünürük ki, dövlətlər və rəsmi şəxslər arasındakı münasibətlərə xələl gətirmək istəyən qərəzli qüvvələrin kimliyi hər kəsə bəllidir.
Azərbaycan Prezidenti Administrasiyasının beynəlxalq əlaqələr şöbəsinin müdiri Novruz Məmmədov da deyib ki, görünür bu saytda yerləşdirilən materiallar vasitəsilə müxtəlif dövlətlər arasında münasibətləri korlamaq istəyən qüvvələr var və onlar bu istiqamətdə artıq müəyyən cəhdlər göstərirlər. Əlbəttə ki, bu, sülhsevər və etibarlı əməkdaşlıq münasibətlərinin qurulmasına çalışan bütün dövlətlər üçün təhlükəli tendensiyadır.
Ramil VƏLİBƏYOV

Paylaş:

Baxılıb: 1127 dəfə