Ermənistan ordusu təxribatlar törətməkdə davam edir

Bakı:

10 °C

87 %

5 m/s

Əlaqə

AZ RU EN

Ana səhifə / Siyasət / Ermənistan ordusu təxribatlar törətməkdə davam edir

Ermənistan ordusu təxribatlar törətməkdə davam edir

22.12.2010 [09:27]

İşğalçı ölkənin atəşkəsi kobud şəkildə pozması cəbhə xəttindəki vəziyyəti daha da gərginləşdirməyə xidmət edir
İşğalçı Ermənistanın silahlı qüvvələri hər zaman olduğu kimi, hazırda da təxribatlar törətməkdə davam edir. Daha doğrusu, iki dövlət arasında hələ 16 il əvvəl atəşkəs haqqında sazişin imzalanmasına baxmayaraq, işğalçı ölkə ordusu, demək olar ki, hər gün atəşkəs rejimini pozur, üzbəüz yerləşən səngərlərdəki hərbçilərimizi, həmçinin, azərbaycanlılar yaşayan kəndləri atəşə tutur. Ermənistan ordusunun sonuncu belə özbaşınalıqlarından biri isə Azərbaycan Silahlı Qüvvələrinin nəzarətində olan əraziyə artilleriya mərmisinin atılması ilə bağlıdır.
Qeyd edək ki, bu hadisə ilə əlaqədar Azərbaycan Müdafiə Nazirliyi bəyanat yayıb. Bəyanatda deyilir: “Aparılan araşdırmalar nəticəsində aydın olub ki, Tərtər rayonunun işğal altında olan Talış yaşayış məntəqəsinin 2,5 km qərb istiqamətindəki mövqelərdən düşmənin BM 21 qrad qurğusundan atdığı 122 mm-lik reaktiv qəlpəli fuqas mərmisi Azərbaycan Silahlı Qüvvələrinin nəzarətində olan Borsunlu yaşayış məntəqəsinin yaxınlığına düşüb”.
Bəyanatda o da deyilir ki, mərminin 15-16 km uzaqlıqdan buraxıldığı ehtimal olunur. Məlumata görə, mərminin partlayış səsi və zərbə dalğası ətraf yaşayış məntəqələrində hiss edilsə də, zərərçəkən olmayıb.
Beləliklə, bu, bir həqiqətdir ki, Ermənistanın atəşkəsi kobud şəkildə pozması cəbhə xəttindəki vəziyyəti daha da gərginləşdirməyə xidmət edir. Bu isə öz növbəsində Ermənistan-Azərbaycan, Dağlıq Qarabağ münaqişəsi üzrə danışıqların aparıldığı bir vaxtda prosesin gedişatına mənfi təsir göstərir. Ermənistanın bu addımı işğalçı ölkənin sülh tərəfdarı olmadığını bir daha sübut edir. Yəni, işğalçı ölkə bir tərəfdən danışıqlarda iştirak edir, guya münaqişənin sülh yolu ilə həllinə tərəfdar olduğunu göstərməyə, digər tərəfdən isə, cəbhə xəttində təxribatlar törətməklə qarışıqlıq yaratmağa çalışır. Sözsüz ki, işğalçı Ermənistanın bu təxribatları atəşkəsin tələblərini pozmaqla yanaşı, ATƏT və digər beynəlxalq təşkilatların cəbhə xəttində sabitliyin qorunub saxlanması ilə bağlı çağırışlarına da ziddir. Digər tərəfdən, atəşkəs rejimini pozan Ermənistanın ağır artilleriyadan istifadə etməsi Avropada Adi Silahlar haqqında konvensiyaya ziddir.
Görünən odur ki, işğalçı Ermənistan beynəlxalq hüququn və konvensiyaların tələblərinə heç bir əhəmiyyət vermədiyini bir daha nümayiş etdirdi. Bu isə o deməkdir ki, işğalçı ölkə regional sülh və sabitliyə başlıca təhlükə olaraq qalır. Ermənistanın Azərbaycan ərazilərinin işğalını davam etdirməsi, qoşunların təmas xəttində müntəzəm olaraq silahlı təxribatlar törətməsi isə bölgədə müharibə ehtimalını daha da gücləndirir. Ermənistanın təcavüzkar siyasətə son qoymaması isə 16 ildir ki, ATƏT-in Minsk qrupunun vasitəçiliyi ilə aparılan danışıqlar prosesinin nəticəsiz qalmasına səbəb olur.
Əslində, işğalçı ölkənin təxribat xarakterli fəaliyyəti Azərbaycanın konfliktin sülh yolu ilə həlli istiqamətində səylərini boşa çıxarmağa yönəlib. Halbuki, Ermənistan rəhbərliyi beynəlxalq ictimaiyyətdə belə bir fikir formalaşdırmağa çalışır ki, guya Azərbaycan tərəfi müharibəyə can atır və bu məqsədlə də atəşkəsi pozur. Lakin son hadisə Ermənistanın iddialarının yalan olduğunu, münaqişənin bu vaxta qədər həll olunmamasının və cəbhə xəttində vəziyyətin gərgin olaraq qalmasının yeganə səbəbkarının işğalçı ölkə olduğunu növbəti dəfə təsdiqlədi.
Hülya MƏMMƏDLİ

Paylaş:

Baxılıb: 955 dəfə