Kosmik Məsələlər üzrə Şuranın növbəti toplantısı keçirilib

Bakı:

13 °C

94 %

6 m/s

Əlaqə

AZ RU EN

Ana səhifə / Siyasət / Kosmik Məsələlər üzrə Şuranın növbəti toplantısı keçirilib

Kosmik Məsələlər üzrə Şuranın növbəti toplantısı keçirilib

09.07.2011 [12:25]

Azərbaycan Milli Aviasiya Akademiyasında Kosmik Məsələlər üzrə Şuranın növbəti iclası keçirilib. İclasda Şuranın sədri akademik Arif Paşayev, rabitə və informasiya texnologiyaları naziri Əli Abbasov, ekologiya və təbii sərvətlər naziri Hüseynqulu Bağırov, Azərbaycan Prezidenti yanında Ali Attestasiya Komissiyasının sədri Arif Mehdiyev, “Azərbaycan Hava Yolları” QSC-nin prezidenti Cahangir Əsgərov, Dövlət Torpaq və Xəritəçəkmə Komitəsinin sədri Qərib Məmmədov, Maliyyə Nazirliyinin Beynəlxalq əlaqələr şöbəsinin müdiri ülvi Seyidzadə, “Azərkosmos” ASC-nin sədri Rəşad Nəbiyev, Milli Aerokosmik Agentliyin direktoru Alçın Şirinzadə, RİTN-in Dövlət müəssisələrinin fəaliyyətinin əlaqələndirmə (DMŞ) şöbəsinin müdiri və Kosmik Məsələlər üzrə Şuranın Katibliyinin rəhbəri Mir-Heydər İsmayılov və “Teleradio” İB-nin texniki direktoru Mikayıl Abbasov iştirak ediblər.
Kosmik Məsələlər üzrə Şuranın sədri akademik Arif Paşayev iştirakçıları salamlayaraq kosmik sənayenin yaradılmasının və ilk telekommunikasiya peykinin orbitə çıxarılmasının respublika üçün xüsusi əhəmiyyət kəsb etdiyini qeyd edib və bu istiqamətdə aparılan işlərə dair öz tövsiyələrini verib.
Rabitə və informasiya texnologiyaları naziri Əli Abbasov Şuranın iclasında “Azərbaycan Respublikasında kosmik sənayenin yaradılması və inkişafı üzrə Dövlət Proqramı”nın icra vəziyyəti, ilk telekommunikasiya peykinin hazırlanması və orbitə çıxarılması, orbital mövqelərin qeydiyyatı və koordinasiyası üzrə aparılan işlər barədə geniş məlumat verib.
Sonra “Azərkosmos” ASC-nin sədri Rəşad Nəbiyev ilk telekommunikasiya peykinin hazırlanması və orbitə çıxarılması üzrə ABŞ-ın “Orbital Sciences Corporation”, Malayziyanın “Measat” və Fransanın “Arianespace” şirkətləri ilə bağlanmış müqavilələrin yerinə yetirilməsi barədə geniş təqdimatla çıxış edib.
RİTN-in DMŞ-nin müdiri və Kosmik Məsələlər üzrə Şuranın Katibliyinin rəhbəri Mir-Heydər İsmayılov kosmik sahədə beynəlxalq əməkdaşlığın, beynəlxalq təşkilatlara üzv olmağın və konvensiyalara qoşulmağın vacibliyini qeyd edərək bu istiqamətdə atılan addımlardan danışıb.
2010-cu il may ayının 3-də ölkə Prezidentinin Sərəncamı ilə “Azərkosmos” Açıq Səhmdar Cəmiyyəti təsis edilib. Sərəncamda Azərbaycan Respublikasında kosmik fəaliyyət sahəsində elmi-texniki nailiyyətləri və qabaqcıl təcrübəni öyrənmək, bu sahədə dövlət siyasətinin həyata keçirilməsinə dair müvafiq tədbirlərin görülməsində iştirak etmək və həmin sahənin inkişafı ilə bağlı təklifləri hazırlamaq məqsədi ilə eyni zamanda Kosmik Məsələlər üzrə Şuranın yaradılması barədə tapşırıq verilib.

Paylaş:

Baxılıb: 961 dəfə