Söyüdlü insidentinin "şifrəsi"

Bakı:

17 °C

63 %

6 m/s

Əlaqə

AZ RU EN

Ana səhifə / Siyasət / Söyüdlü insidentinin "şifrəsi"

Söyüdlü insidentinin "şifrəsi"

23.06.2023 [13:18]

Başqa dövlətin zavodu...

Son günlər Gədəbəy rayonu Söyüdlü kəndində baş verənlər ictimaiyyətin diqqətindədir. Mövzu ilə bağlı dövlət səviyyəsində Komissiya yaradılıb və araşdırmalara başlanılıb. Amma baş verənlərə diqqət yetirdikdə bunun "səmimi etiraz" olmadığı ilk baxışdan ortaya çıxır. Birincisi, məsələyə ilk dəqiqlərdəncə radikal müxalifətin nəzarətində olan internet kanallarının olduqca yüksək səviyyədə maraq göstərməsi, bu internet televiziyalarının kameralarının Söyüdlüdə peyda olması müəyyən şübhələrə yol açır. Hətta "etiraz" vaxtı bir neçə rakursdan çəkilişlər aparılması, onun təşkili də situasiyanın fors-major olmadığını müəyyən mənada sübuta yetirir. Eyni zamanda, "iki daşın arasında" rəngli "etiraz plakatlarının" hazırlanaraq Söyüdlüyə "çatdırılması" da xüsusi maraq kəsb edən amillərdəndir...

Amma "Söyüdlü insidentinin şifrəsi" elə radikal müxalifətin nəzarətində olan Meydan TV-nin yaydığı videoda "gizlənir". "Gədəbəydə süni göl etirazı" başlığı ilə yayımlanan videoda "çıxış edən" yaşlı qadın - Ələkbərova Zərqələm Həsən qızı məhz altdan-altdan Meydan TV-nin kamerasına baxa-baxa bildirir ki, "Söyüdlü kəndi blokadadır. Prezident İlham Əliyev deyir ki, başqa dövlətlərin zavodunun iysi gələr, Azərbaycanı qırar. Öz zavodumuzun iysi bizi qırmazmı?".

Bu frazada çox şey yatır – birincisi, bu "blokada" sözü son dövrlərdə məhz Ermənistanın Laçın yolu ilə bağlı işlətdiyi "ən sevimli kəlmədir". Ən əsas məsələ isə, Z. Ələkbərovanın dediyi "başqa dövlətin zavodu" məsələsidir. Məlumat üçün bildirək ki, son günlər Ermənistanın Azərbaycanın Naxçıvan Muxtar Respublikası ilə həmsərhəd ərazidə - Arazdəyən kəndində illik istehsal gücü 180 min ton olan iri metallurgiya zavodunun inşası ilə bağlı layihəsinə qarşı ölkəmizdə ciddi və haqlı etirazlar səsləndirilir. Yaradılacaq bu müəssisə ekoloji terrora yol açır. Müəssisə həm Azərbaycanın, həm də Ermənistanın imzaladığı Espo Konvensiyasına zidd sayılır. Konvensiyanın müddəalarında sərhədlərarası kontekstdə ətraf mühitə təsirin qiymətləndirilməsi barədə ikitərəfli razılığın əldə olunması üzrə müvafiq bənd var. Azərbaycanın Ekologiya və Təbii Sərvətlər Nazirliyi Ermənistanın ölkəmizin ekoloji mühitinə ciddi mənfi təsir göstərən qanunsuz fəaliyyəti ilə bağlı bəyanat yayıb. Nazirliklə yanaşı, ekoloji yönümlü QHT-lər də məsələ ilə bağlı etiraz səslərini ucaldıblar – bəyanat qəbul ediblər. Bəyanatda QHT-lər BMT-nin Ətraf Mühit Proqramı, Ümumdünya Səhiyyə Təşkilatı, BMT-nin ətraf mühit üzrə xüsusi məruzəçisinə, müvafiq beynəlxalq təşkilatlara müraciət edərək onları bu fakta reaksiya verməyə və Ermənistanın növbəti ekoloji terroruna son qoymağa çağırıblar.

Bəli... Gədəbəyin Söyüdlü kəndində baş verənlərin əsas şifrəsi üzə çıxır – dağ kəndində yaşayan və özünün dediyi kimi 72 yaşı olan bu qadının "vurğuladığı» nüansın "hazırlıq prosesi" məhsulu olduğu bariz şəkildə ortadadır. Demək ki... Bu, heç də iddia edildiyi qədər "səmimi etiraz" deyilmiş...

Mənsur