Dövlətə, Vətənə bağlılığın təntənəsi...

Bakı:

10 °C

93 %

3 m/s

Əlaqə

AZ RU EN

Ana səhifə / Siyasət / Dövlətə, Vətənə bağlılığın təntənəsi...

Dövlətə, Vətənə bağlılığın təntənəsi...

15.07.2023 [10:20]

Türkiyədə baş verən dövlət çevrilişinə cəhddən yeddi il ötür

2016-cı il iyulun 15-dən 16-na keçən gecə Türkiyədə baş verən uğursuz dövlət çevrilişi cəhdindən yeddi il ötür. Xatırladaq ki, FETÖ və ona bağlı olan qüvvələr legitim hakimiyyəti hərbi yolla ələ keçirmək üçün çevrilişə cəhd göstərmişdi. Qəhrəman Türkiyə xalqı bu ağır sınaqdan şərəflə çıxdı, Prezident Rəcəb Tayyib Ərdoğanın ətrafında sıx birləşərək dövlət çevrilişi cəhdinin qarşısını aldı. Məhz bu qəhrəmanlıq və milli birlik nəticəsində məkrli qüvvələr öz niyyətlərinə çatmadılar, Türkiyə dövləti təlatümlərdən və tənəzzüldən xilas oldu.

Dövlətçilik və demokratiya çətin sınaq qarşısında...

Türk xalqı hər zaman özünün milli kimliyinin, dövlətçiliyinin və demokratiyanın keşiyində dayanıb, böyük itkilər versə də, bu dəyərləri unutmayıb, ən kritik məqamlarda belə Vətənə, torpağa sədaqət, möhkəm bağlılıq nümayiş etdirib. 15 iyul hadisələri də Türkiyə üçün, dövlətçilik üçün belə sınaq məqamlarından biri idi. Bu çevriliş cəhdində Türkiyənin zəifləməsini, regiondakı nüfuzunu və çəkisini itirməsini, iqtisadi cəhətdən çökməsini arzulayan xarici güclərin də rolu vardı. Başqa sözlə, FETÖ ssenarisi imperialist güc mərkəzlərinin mətbəxində hazırlanmışdı. Rəcəb Tayyib Ərdoğanın liderlik keyfiyyətləri və onun rəhbərliyi ilə Türkiyənin özünün milli maraqlarını qətiyyətlə qoruması, ədalət prinsipinin hər yerdə bərqərar olmasına güclü səy göstərməsi, Türk dünyasının birliyi uğrundakı mübarizəsi bir çoxlarını narahat edirdi. Onlar Türkiyəni inkişafdan, demokratiyadan geri döndərmək üçün müxtəlif planlar qurur, ssenarilər hazırlayırlar. Lakin FETÖ və digər satqın qüvvələrlə birləşən imperialist güc mərkəzlərinin qurduqları planlar növbəti dəfə iflasa uğradı. Milyonlarla insan dövləti xilas etmək, Prezident R.T.Ərdoğanla həmrəylik nümayiş etdirmək üçün ayağa qalxdı. Bu böyük gücün qarşısında FETÖ, ona himayədarlıq edən qüvvələr dayana bilmədilər və məğlubiyyətə uğradılar.

Qan yaddaşına yazılan izlər

FETÖ terror təşkilatının 2016-cı il 15 iyul tarixində törətdiyi dövlət çevrilişi cəhdi Türkiyə xalqının qan yaddaşında acı izlər buraxıb. Hərbi çevrilişə cəhd nəticəsində 251 nəfər şəhid olub, 2196 nəfər isə yaralanıb. Qədirbilən türk xalqı qəhrəman övladlarının xatirəsini həmişə əziz tutur. Türkiyə çox qısa zamanda toparlanaraq bu cinayətə yol verənlərin layiqli cəzasına çatmasını təmin etdi. Uzun illər ərzində Türkiyə daxilində fəaliyyət göstərən FETÖ şəbəkəsi ifşa edildi. Özünü “paralel hökumət” hesab edən bu terror birləşməsi ilə bağlı bütün faktlar açıldı.

Azərbaycanın həmrəyliyi

Azərbaycan-Türkiyə münasibətləri hər zaman dostluğun, qardaşlığın zirvəsi sayılır. Dünya dövlətləri arasında ikinci belə bir nümunə yoxdur ki, bu iki ölkə qədər bir-birinə yaxın olsun.15 iyul hadisələri zamanı nümayiş etdirilən qətiyyət Türkiyə-Azərbaycan qardaşlığının sarsılmaz olduğunu bir daha dünyaya göstərdi. Həmin çətin anlarda həm xalqımız, həm də dövlətimiz Türkiyə ilə bir yerdə idi. Prezident İlham Əliyev bu hadisələrdən dərhal sonra qardaş ölkəyə lazımi dəstəyin göstərilməsi ilə əlaqədar tapşırıqlarını verdi. Azərbaycan dövləti birinci olaraq bu məsələyə öz münasibətini bildirdi və birmənalı şəkildə Türkiyənin konstitusion quruluşunu, xalqın iradəsi ilə formalaşmış hakimiyyəti dəstəklədi, bu hakimiyyətə qarşı xain cəhdləri qətiyyətlə pislədi. Prezident İlham Əliyev 16 iyul 2016-cı il tarixində qardaş ölkənin dövlət başçısına ünvanladığı məktubunda baş verənləri bir tərəfdən Türkiyənin dövlətçiliyinə, digər tərəfdən Türk xalqına, onun iradəsinə və seçiminə qarşı törədilən dəhşətli cinayət kimi səciyyələndirdi.

Mübariz FEYİZLİ

Paylaş:

Baxılıb: 597 dəfə