Azərbaycanla Vyetnam arasında əlaqələrin gücləndirilməsi üçün böyük potensial var

Bakı:

18 °C

63 %

10 m/s

Əlaqə

AZ RU EN

Ana səhifə / Siyasət / Azərbaycanla Vyetnam arasında əlaqələrin gücləndirilməsi üçün böyük potensial var

Azərbaycanla Vyetnam arasında əlaqələrin gücləndirilməsi üçün böyük potensial var

21.12.2011 [01:48]

YAP Sədrinin müavini-İcra katibi Əli Əhmədov ölkəmizdə səfərdə olan Vyetnam Kommunist Partiyasının nümayəndə heyətini qəbul edib
Dünən Yeni Azərbaycan Partiyası Sədrinin müavini-İcra katibi Əli Əhmədov ölkəmizdə səfərdə olan Vyetnam Kommunist Partiyasının (KP) xarici əlaqələr şöbəsinin müdiri, İCAPP-ın Daimi Komitəsinin üzvü Vuong Thua Phongun başçılıq etdiyi nümayəndə heyətini qəbul edib.
Qonaqları salamlayan Əli Əhmədov Vyetnam KP-nin nümayəndələrinin Bakıda keçiriləcək “Modernləşmə siyasəti: yeni iqtisadi və sosial çağırışlar” mövzusunda beynəlxalq konfransda iştirakının əhəmiyyətini vurğulayıb. Əli Əhmədov qeyd edib ki, bu səfər tərəflər arasında gələcək əməkdaşlıq münasibətlərinin genişlənməsində mühüm rol oynayacaq. “Hesab edirəm ki, bu səfər xalqlarımız və partiyalarımız arasında əlaqələrin genişlənməsinə təkan verəcək. Eyni zamanda, düşünürəm ki, beynəlxalq konfransda aparılan müzakirələr, fikir mübadilələri iştirakçılar üçün faydalı olacaq” - deyə, YAP Sədrinin müavini vurğulayıb.
Əli Əhmədovun sözlərinə görə, iki ölkə arasında əlaqələrin gücləndirilməsi üçün böyük potensial var. Onun fikrincə, hər iki ölkə, eləcə də, partiyalarımız və cəmiyyətlərimiz arasında münasibətlər daha da genişləndirilməlidir. Azərbaycana səfər etməkdən məmnunluğunu bildirən Vyetnam Kommunist Partiyasının xarici əlaqələr şöbəsinin müdiri Vuong Thua Phong beynəlxalq konfransda iştirak üçün etdiyi dəvətə görə YAP rəhbərliyinə təşəkkür edib. O bildirib ki, konfransın mövzusunun əhəmiyyətini nəzərə alaraq Vyetnam Kommunist Partiyasının rəhbərliyi bu tədbirdə iştirak etmək qərarı verib.
“Bizim üçün ən şərəfli hadisələrdən biri 1983-cü ildə Azərbaycan xalqının ümummilli lideri Heydər Əliyevin Vyetnama səfəri olub. O zaman Qırmızı Anoy çayı üzərində körpünün açılış mərasimi keçirildi. Bu körpünün açılışı Vyetnam iqtisadiyyatının inkişafına mühüm təsir göstərdi. Mən deyərdim ki, Heydər Əliyevin səfəri tarixi səfər idi. Mənim üçün qürurverici hal bu idi ki, bu səfər zamanı Heydər Əliyev kimi şəxsiyyətin tərcüməçisi oldum. Eyni zamanda, 1961-ci ildə Vyetnamın lideri Azərbaycanda səfərdə olub və biz bu səfərin 50 illiyini qeyd etmişik” - deyə, o, vurğulayıb.
Qonaq qeyd edib ki, Vyetnamda Azərbaycanı yaxşı tanıyır və hörmət edirlər. Onun sözlərinə görə, vaxtilə Bakıda ali təhsil alan vytenamlıların bəziləri dövlətdə yüksək vəzifələr tuturlar və bu insanlar Azərbaycanı özlərinin ikinci vətəni hesab edirlər. Vuong Thua Phong gələcəkdə ölkələr və partiyalar arasında əməkdaşlığın daha da gücləndirilməsində maraqlı olduqlarını deyib. Görüşdə, həmçinin, qarşılıqlı maraq doğuran məsələlərlə bağlı fikir mübadiləsi aparılıb.

Paylaş:

Baxılıb: 986 dəfə