İxtisas seçimi başlayır...

Bakı:

15 °C

82 %

2 m/s

Əlaqə

AZ RU EN

Ana səhifə / Sosial / İxtisas seçimi başlayır...

İxtisas seçimi başlayır...

31.07.2024 [11:15]

Keçid balları artacaq?

Məlum olduğu kimi, 2024-2025-ci tədris ili üzrə respublikanın ali məktəblərinə qəbul imtahanlarının bütün mərhələləri başa çatıb. Yekun nəticələrə görə, 2 nəfər maksimum - 700 bal toplayıb. Dövlət İmtahan Mərkəzindən (DİM) verilən məlumata görə, ixtisas seçimi avqustun 9-da başlayacaq.

Qeyd edək ki, əvvəlki illə müqayisədə 2024-cü ildə plan yerlərinin sayı artırılıb. Bu il 60 mindən çox abituriyentin tələbə adını qazanacağı ehtimal edilir. Ancaq keçid ballarının artacağı da istisna deyil. Belə ki, ekspertlər plan yerlərinin sayının çoxalmasına baxmayaraq, keçid ballarının artacağını və rəqabətin daha güclü olacağını düşünürlər.

28 minə yaxın yer dövlət sifarişlidir

Mövzunu “Yeni Azərbaycan”a dəyərləndirən təhsil üzrə ekspert Elçin Əfəndi bildirib ki, 9-19 avqustda həyata keçəcək ixtisas seçimi prosesində abituriyentlər daha diqqətli olmalıdırlar: “Onlar kortəbii formada seçim etməməlidir, əmək bazarında ehtiyac yaranan ixtisaslar üzrə təhsil almaqları məqsədəuyğundur. Bu, onların gələcəkdə öz karyeralarını qurub əmək fəaliyyətlərini inkişaf etdirmələri üçün vacibdir. Eyni zamanda ixtisaslaşma dövründə yaxşı olar ki, ailə büdcəsi imkan verdiyi halda ödənişli əsaslarla təhsilə üz tutsunlar. Bu il təxminən 60 mindən çox plan yeri ayrılıb. Bu yerlərin təqribən 28 minə qədəri dövlət sifarişli yerlərdir. Demək olar ki, ayrılan yerlərin yarısı dövlət sifarişlidir. Bu da o deməkdir ki, abituriyentlərin dövlət sifarişli yerlərə qəbul olmaq şansı daha yüksəkdir”.

3-cü qrupda vəziyyət gərgindir...

Ekspert qeyd edib ki, ən gərgin vəziyyət 3-cü ixtisas qrupundadır: “Burada öncəki illərdə 450 baldan yuxarı formalaşan keçid ballarında kifayət qədər artım olacaq. O cümlədən I ixtisas qrupunun RK alt qrupunda da vəziyyət o qədər yaxşı deyil. 4-cü ixtisas qrupunda da 500 baldan yuxarı ixtisaslarda keçid ballarının artımını müşahidə edəcəyik. 5-ci ixtisas qrupunda da buraxılış imtahanlarının nəticələrinə əsasən deyə bilərik ki, bəzi ixtisaslarda maksimum 6-7 bala qədər artım olacaq”.

Ən yaxşı vəziyyət bu qrupdadır...

E.Əfəndinin sözlərinə görə, ən yaxşı vəziyyət II ixtisas qrupunda olacaq: “Burada 450 bala qədər vəziyyət yaxşıdır. Daha yuxarı ballı ixtisaslarda isə rəqabət mühiti gərgindir. Nəzərə alsaq ki, 4 ixtisas qrupu üzrə təxminən 85 min, V ixtisas qrupu üzrə isə 10 mindən artıq abituriyent var, birinci turda plan yerləri 52 min həddində dola bilər. Qalan plan yerləri isə ikinci turda yenidən müsabiqəyə çıxarılacaq. Bu proses də yəqin ki, avqustun sonuna təsadüf edəcək”.

Builki rəqabət daha güclü olacaq

Ekspert qeyd edib ki, xüsusilə 400-dən yuxarı bal toplayan şagirdlər arasında rəqabət gözlənilir: “Rəqabət daha çox 3-cü və 4-cü qruplarda gərgin keçəcək. Ötən il 350-360 bal toplayan 2000 nəfər olubsa və bu il həmin say 2500-ə yüksəlibsə, bu, o deməkdir ki, ballar artacaq. Yaxud say artmayıbsa, deməli, ballarda artım olmayacaq. Keçən il 2000 nəfər, bu il 1800 nəfər olubsa deməli ballar enəcək. Bunların hamısı statistika jurnalı və “Abituriyent-4” jurnalında əks olunan plan yerləri əsasında məlum olacaq. Ümumi olaraq ortaya belə bir məsələ qoyuruq ki, bu il ötən ilə nisbətən buraxılış imtahanlarında göstərilən yüksək nəticəyə görə istənilən qrupda rəqabət daha güclü olacaq. Bu il aşağı bal toplayan abituriyentlərin çox hissəsi kəsiləcək”.

Yeganə BAYRAMOVA

Paylaş:

Baxılıb: 871 dəfə