Bələdiyyələr birləşdiriləcək?

Bakı:

20 °C

94 %

7 m/s

Əlaqə

AZ RU EN

Ana səhifə / Sosial / Bələdiyyələr birləşdiriləcək?

Bələdiyyələr birləşdiriləcək?

11.10.2024 [09:48]

Yerli özünüidarə strukturlarında islahatlar gözlənilir

Azərbaycanda bələdiyyələrin fəaliyyəti ilə bağlı mütəmadi islahatlar aparılır. Qanunvericilik təkmilləşdirilir, fəaliyyətin daha dinamik və optimal şəkildə həyata keçirilməsi üçün addımlar atılır. Qeyd edək ki, bələdiyyələr qanunla müəyyən edilmiş ərazi hüdudları daxilində yerli özünüidarəetmə formasıdır. Bələdiyyənin öz mülkiyyəti və yerli büdcəsi olur - struktur Azərbaycan Respublikasının Konstitusiyası, eyni zamanda “Bələdiyyələrin statusu haqqında” Azərbaycan Respublikasının Qanunu ilə səlahiyyətlərinə aid edilmiş yerli əhəmiyyətli məsələləri müstəqil surətdə həll edir. 1995-ci ildə qəbul olunan müstəqil Azərbaycanın ilk Konstitusiyasında keçmiş postsovet məkanı üçün tamamilə yeni olan hüquqi təsisat - yerli özünüidarə orqanları, qeyri-dövlət təşkilatı olan bələdiyyələr institutu təsis edilib. Konstitusiyanın 142-ci maddəsində bələdiyyələrin formalaşması və hüquqları müəyyən olunur. Ölkəmizdə ilk bələdiyyə seçkiləri 1999-cu il dekabrın 12-də baş tutub. 1999-cu ildə bu struktur yaradılarkən ölkədə 2669 bələdiyyə fəaliyyət göstərdiyi halda sonradan onların sayı artaraq 2757-yə çatıb. Sonradan bələdiyyələrin birləşməsi nəticəsində bu say əvvəlcə 1766-ya, daha sonra isə 1606 düşüb.

Yeni qanun layihəsi...

Bununla belə, yerli özünüidarə strukturu ilə bağlı yenidən islahatlar nəzərdə tutulur. Milli Məclisin Regional məsələlər komitəsinin sədri Siyavuş Novruzov KİV-ə açıqlamasında Azərbaycanda bələdiyyələrin birləşməsi ilə bağlı qanun layihəsinin hazırlanacağını bildirib. Layihə çərçivəsində bələdiyyələrin sayının üçdə birinin azaldılması nəzərdə tutulur. Beləliklə, ölkə üzrə bələdiyyələrin sayı 500-dən artıq olacaq. Siyavuş Novruzovun sözlərinə görə, bəzi ərazilərdə əhalinin sayına baxmayaraq, çox sayda bələdiyyə fəaliyyət göstərir. Elə yerlər var ki, 60-70 nəfər əhali yaşayır, lakin orada bələdiyyə qurulub. Bu bələdiyyələr vergi yığmaqda, digər funksiyalarını yerinə yetirməkdə çətinlik çəkirlər. Bu səbəbdən, bələdiyyələrin birləşdirilməsi məsələsi gündəmdədir. Yeni qanun layihəsinin qəbulundan sonra, bələdiyyələrin fəaliyyətinin daha səmərəli olması və idarəetmənin optimallaşdırılması gözlənilir.

Qanun layihəsində əhalisinin sayı 3000 nəfərdən və ya ev təsərrüfatlarının sayı 1000 vahiddən az olan bələdiyyələr onlarda yaranan sosial-iqtisadi vəziyyət, tarixi və digər yerli xüsusiyyətlər nəzərə alınmaqla Azərbaycan Respublikası Milli Məclisinin qərarı ilə digər bələdiyyələrlə birləşdiriləcək.

Bələdiyyələrin birləşdirilməsi müsbət nəticəsini verəcək

Məsələ ilə bağlı fikirlərini bölüşən Regional məsələlər komitəsinin üzvü Tahir Rzayev bildirib ki, kiçik bələdiyyələr maliyyə bazası olmayan yerli idarəetmə orqanları kimi özlərini doğrultmurlar. Onun sözlərinə görə, kiçik bələdiyyələrin fəaliyyəti vətəndaşları qane etmir və bələdiyyələr haqqında mənfi fikir formalaşır: “Bir çoxları deyir ki, bu qurum əhəmiyyətsiz, heç bir işə yaramayan qurumdur və ləğv olunmalıdır. Əslində, bələdiyyələr bu günümüz üçün vacib olan demokratik təsisatdır. Ancaq onların fəaliyyəti təkmilləşdirilməlidir”.

Milli Məclisin üzvü əlavə edib ki, bugünədək ölkədə bələdiyyələrin birləşməsi, ləğv edilməsi prosesi baş verib: “Bu islahatların müsbət nəticələrinin də şahidi olmuşuq. Ancaq hələ də onların sayı çoxdur. Əhalisi Azərbaycan qədər olan bir sıra ölkələr var ki, orda 250-300 bələdiyyə fəaliyyət göstərir. Əgər bu gün hər hansı bir kənddə fəaliyyət göstərən bələdiyyə heç bir maliyyə bazasına malik olmayan, yerli əhəmiyyətli sosial-iqtisadi məsələləri həll edə bilmirsə, demək ki, onun fəaliyyətinin də effekti olmayacaq. Hesab edirəm ki, bələdiyyələrin sayının azaldılması ilə bağlı irəli sürülən təkliflər müsbətyünlüdür və məqsədəuyğundur. Biz bu il ölkə olaraq bələdiyyə seçkilərinə gedirik. Əlbəttə, bu prosesin baş verməsi seçkilərdən sonra daha yüksək səviyyədə və optimal fəaliyyətə malik bələdiyyələrin formalaşmasına yol açacaq. Düşünürəm ki, Azərbaycanda da sözügedən proses, bələdiyyələrin birləşdirilməsi müsbət nəticəsini verəcək”.

S.İSMAYILZADƏ

Paylaş:

Baxılıb: 635 dəfə