BDU-da “Dünya azərbaycanlıları: tarix və müasirlik” mövzusunda V beynəlxalq elmi konfrans

Bakı:

25 °C

53 %

2 m/s

Əlaqə

AZ RU EN

Ana səhifə / Sosial / BDU-da “Dünya azərbaycanlıları: tarix və müasirlik” mövzusunda V beynəlxalq elmi konfrans

BDU-da “Dünya azərbaycanlıları: tarix və müasirlik” mövzusunda V beynəlxalq elmi konfrans

27.02.2025 [23:35]

Bakı Dövlət Universitetinin (BDU) Tarix fakültəsinin təşkilatçılığı ilə “Dünya azərbaycanlıları: tarix və müasirlik” mövzusunda V beynəlxalq elmi konfrans keçirilib.

BDU-dan AZƏRTAC-a bildirilib ki, əvvəlcə Dövlət Himni səsləndirilib, torpaqlarımızın azadlığı uğrunda həlak olan şəhidlərin əziz xatirəsi bir dəqiqəlik sükutla yad edilib.

Açılış mərasimində çıxış edən Tarix fakültəsinin dekanı professor İbrahim Zeynalov bildirib ki, dünya azərbaycanlılarının həmrəyliyini təmin edən mühüm vasitələrdən biri də milli ideologiyadır. Bu gün dünya azərbaycanlılarını bir amal və əqidə ətrafında birləşdirən azərbaycançılıq ideologiyası milli birlik və həmrəyliyi təmin edən universal ideoloji formul kimi çıxış etməkdədir. Azərbaycan xalqının Ümummilli Lideri Heydər Əliyevin müəllifi olduğu azərbaycançılıq ideologiyası özündə ümumbəşəri səciyyə daşıyan və milli dəyərlərə cavab verən prinsipləri ehtiva edir.

Professor İbrahim Zeynalov qeyd edib ki, dünya azərbaycanlıları ilə bağlı ərazi, əhali, tarixi-demoqrafiya problemlərinin, o cümlədən köçlər, soyqırımları və digər mövzuların tədqiqi xüsusi əhəmiyyət kəsb edib. Bu məqsədlə 1994-cü ildə Tarix fakültəsində “Dünya azərbaycanlıları: tarixi demoqrafiya” elmi-tədqiqat laboratoriyası yaradılıb. 1997-ci ildə Tarix fakültəsinin təşkilatçılığı ilə “Dünya azərbaycanlıları: tarix və müasirlik” mövzusunda ilk elmi konfrans təşkil olunub. 2016-cı ildən ənənəvi olaraq davam edən konfransın əsas tərəfdaşı Diasporla İş Üzrə Dövlət Komitəsi olub. Builki konfransda ənənəvi mövzularla yanaşı, Qarabağda quruculuq prosesi, Qərbi Azərbaycanın tarixi, siyasi və etno-demoqrafik proseslər də elmi müstəvidə müzakirə ediləcək. Konfransda yerli alimlərlə yanaşı, Türkiyə, Ukrayna, Gürcüstan, Polşa və digər ölkələrdən də mütəxəssislər iştirak edib.

BDU-nun Qədim dünya və orta əsrlər tarixi kafedrasının müdiri, akademik Yaqub Mahmudov, Milli Məclisin üzvü Naqif Həmzəyev, Azərbaycan tarixi (təbiət fakültələri üzrə) kafedrasının müdiri, dosent Mehman Abdullayev çıxışlarında Tarix fakültəsinin təşkilatçılığı ilə belə bir konfransın silsilə şəkildə keçirilməsinin əhəmiyyətini vurğulayıb, bu istiqamətdə elmi tədqiqatlara böyük ehtiyac olduğunu bildiriblər.

On bölmədə davam edən konfrans öz işini sabah yekunlaşdıracaq.

Paylaş:

Baxılıb: 575 dəfə