Gənclər ilk Avropa Oyunlarının Bakıda keçirilməsini ölkəmizin tarixi uğuru sayırlar

Bakı:

20 °C

73 %

8 m/s

Əlaqə

AZ RU EN

Ana səhifə / Sosial / Gənclər ilk Avropa Oyunlarının Bakıda keçirilməsini ölkəmizin tarixi uğuru sayırlar

Gənclər ilk Avropa Oyunlarının Bakıda keçirilməsini ölkəmizin tarixi uğuru sayırlar

29.04.2015 [10:23]

Sirr deyil ki, Azərbaycan bu gün dünyada nüfuzlu idman ölkəsi kimi tanınır. Ölkəmizin idman sahəsindəki uğurları və Olimpiya hərəkatının inkişafına verdiyi töhfələr beynəlxalq və yerli ictimaiyyət tərəfindən yüksək qiymətləndirilir. Elə bu səbəbdəndir ki, Avropa Olimpiya Komitəsinin Baş Assambleyası ilk Avropa Oyunlarına 2015-ci ildə paytaxt Bakının ev sahibliyi etməsi barədə qərar qəbul edib.
Sevindirici haldır ki, ilk Avropa Oyunlarına ictimai təşkilatlar, idman mütəxəssisləri ilə yanaşı, gənclər də böyük dəstək və maraq göstərirlər. Azərbaycan gəncliyi ölkəmizdə ilk Avropa Oyunlarının keçirilməsinin mühüm əhəmiyyət kəsb etdiyini bəyan edir. Yeni Azərbaycan Partiyası (YAP) Gənclər Birliyinin koordinatoru Həsən Hüseynzadənin sözlərinə görə, bu, Azərbaycanın beynəlxalq müstəvidə nüfuzunu gücləndirməklə yanaşı, eyni zamanda, tarixə əlamətdar hadisə kimi yazılacaq: “Bu gün Azərbaycan mədəniyyətlərin qovuşduğu, sabitlik adası, tolerant məkan kimi səciyyələndirilir. Şübhəsiz ki, bütün bu və digər amillər Azərbaycanın beynəlxalq müstəvidə nüfuzunu daha da gücləndirir. Doğrudur, müəyyən beynəlxalq dairələr Azərbaycan dövlətinin müstəqil, milli maraqlara xidmət edən siyasətini həzm edə bilmirlər. Ona görə də qərəzli, qeyri-obyektiv rəy formalaşdırmağa çalışırlar ki, ölkəmizin imicinə mənfi təsir etsin. Hazırda da bu cəhdlər bəzi xarici donorlar tərəfindən maliyyələşdirilərək davam etdirilir. Ancaq bu qarayaxma kampaniyası ilə məşğul olanlar bilməlidirlər ki, onların bu istək və arzuları heç vaxt baş tutmayacaq. Bu gün beynəlxalq ictimaiyyət ilk Avropa Oyunlarına böyük maraq göstərməklə yanaşı, həmçinin, ölkəmizin bu möhtəşəm tədbirə hazırlığını diqqətlə izləyir. İlk Avropa Oyunlarına hazırlıq işləri Prezident İlham Əliyevin tapşırığı əsasında yüksək səviyyədə davam etdirilir. Həmçinin Azərbaycanın birinci xanımı, Heydər Əliyev Fondunun prezidenti Mehriban Əliyevanın rəhbərliyi ilə Təşkilat Komitəsi çevik fəaliyyət göstərir. Bütün bunlar, onu deməyə əsas verir ki, ilk Avropa Oyunları ölkəmizdə yüksək səviyyədə keçiriləcək və Azərbaycan bu tədbirə də böyük uğurla ev sahibliyi edəcək”.
Fəal gənc Nigar Qasım da ilk Avropa Oyunlarının ölkəmizdə keçirilməsinin əlamətdar bir hadisə olduğunu bildirib. Onun sözlərinə görə, yarışların ilk dəfə Azərbaycanda keçirilməsi ölkəmizin siyasi, iqtisadi cəhətdən güclü bir dövlət olduğundan xəbər verir. “Bu yarışlar ölkəmiz üçün tarixi əhəmiyyət kəsb edir. Mən çox qürurlanıram. İlk dəfə “Eurovision” müsabiqəsi ölkəmizdə baş tutduğu zaman belə qürur hissi keçirmişdim. Odlar Yurdu yenə möhtəşəm bir müsabiqəyə ev sahibliyi edir. Bu dəfə daha çox qonağımız olacaq. Biz gənclər “Bakı-2015” ilk Avropa Oyunlarını səbrsizliklə gözləyirik. Bu, ölkəmiz üçün əlamətdar hadisədir. Bilirsiniz ki, Azərbaycan bir çox sahələrdə olduğu kimi idman sahəsində də mühüm uğurlara imza atıb. Bir azərbaycanlı gənci olaraq mən ölkəmlə qürur duyuram”.
YAP Gənclər Birliyinin koordinatoru Ümid Abuzərlinin sözlərinə görə, ictimaiyyətlə yanaşı gənclər də böyük sevinc və həyəcan hissi ilə bu əlamətdar günü gözləyir: “Bütün Avropa qitəsi və dünyanın diqqəti bu il 12-28 iyun tarixində Bakıda keçiriləcək ilk Avropa Oyunlarına yönələcək. Biz gənclər bu cür mötəbər dünya miqyaslı yarışların ölkəmizdə keçirilməsini yüksək dəyərləndiririk. Hər kəs kimi biz gənclər də çalışacağıq ki, Azərbaycanda Avropanın idman tarixində yeni səhifənin başlanğıcı olacaq bu böyük tədbirin uğurla keçirilməsinə var qüvvəmizlə dəstək olaq. Mən inanıram ki, biz ölkəmizin qüdrətini, iqtisadi inkişafını, xalqımızın qonaqpərvərliyini, nümayiş etdirməklə yanaşı Azərbaycanın idman siyasətini bütün dünyaya tanıtmağa nail olacağıq”.
Vüsalə CAVANŞİR

Paylaş:

Baxılıb: 1022 dəfə