“Fitnə” sənədli filmi Bakı Dövlət Universitetinin ilahiyyat fakültəsində nümayiş etdirilib

Bakı:

25 °C

56 %

6 m/s

Əlaqə

AZ RU EN

Ana səhifə / Sosial / “Fitnə” sənədli filmi Bakı Dövlət Universitetinin ilahiyyat fakültəsində nümayiş etdirilib

“Fitnə” sənədli filmi Bakı Dövlət Universitetinin ilahiyyat fakültəsində nümayiş etdirilib

20.05.2016 [10:35]

Prezident İlham Əliyevin Sərəncamı ilə təsdiq edilmiş 2016-cı ilin Azərbaycanda “Multikulturalizm ili” elan edilməsinə dair Tədbirlər Planına uyğun olaraq Bakı Dövlət Universitetinin ilahiyyat fakültəsində “Multikulturalizm ili” çərçivəsində tədbir keçirilib.
Dini Qurumlarla İş üzrə Dövlət Komitəsinin təşəbbüsü ilə keçirilən tədbirdə Dövlət Komitəsinin sədri Mübariz Qurbanlı, BDU-nun ilahiyyat fakültəsinin dekanı, akademik Vasim Məmmədəliyev, fakültənin müəllim və tələbələri, eləcə də Komitə sədrinin müavinləri Səyavuş Heydərov və Gündüz İsmayılov iştirak ediblər.
Əvvəlcə Dini Qurumlarla İş üzrə Dövlət Komitəsinin sifarişi ilə çəkilmiş “Fitnə” sənədli filmi nümayiş olunub.
Akademik Vasim Məmmədəliyev xüsusilə gənclərin radikal dini cərəyanların təsiri altına düşməməsi və bu istiqamətdə məlumatlandırılması üçün faktlar əsasında çəkilən filmin önəmindən bəhs edib. O bildirib ki, radikal dini qrupları, eləcə də bu qruplara qoşulan gəncləri yalnız maarifləndirmə yolu ilə, İslamın buyurduğu həqiqətləri çatdırmaqla zərərsizləşdirmək mümkündür.
Dövlət Komitəsinin sədri Mübariz Qurbanlı “Fitnə” filminin ərsəyə gəlməsinin səbəb və məqsədindən bəhs edib. Komitə sədri deyib ki, film vasitəsilə dini radikalizmin qurbanı olmuş insanların, eləcə də cinayət məsuliyyətinə cəlb edilmiş şəxslərin timsalında bu problemin cəmiyyət və dövlətimiz üçün nə qədər təhlükəli olduğu dolğun şəkildə açıqlanır.
Mübariz Qurbanlı ilahiyyat fakültəsinin fəaliyyətindən bəhs edib və fakültənin yüksək ixtisaslı kadrların hazırlanmasında xüsusi əhəmiyyətə malik olduğunu vurğulayıb. Komitə sədri gələcəkdə də dini radikalizmin fəsadlarından bəhs edən filmlərin çəkilişinin nəzərdə tutulduğunu və bu istiqamətdə Dövlət Komitəsinin ilahiyyat fakültəsinin tələbələrinin ideyalarını dəyərləndirməyə hazır olduğunu bildirib.
Mübariz Qurbanlı tarixən Azərbaycan cəmiyyətinə xas olan fərqli mədəniyyət, din, dillərə ehtiram kimi humanist münasibətin - multikulturalizm anlayışının dövlət tərəfindən inkişaf etdirilməsində həyata keçirilən çoxşaxəli tədbirlər barədə də tədbir iştirakçılarına geniş məlumat verib. O bildirib ki, Azərbaycanda multikultural mühitin qorunması və inkişafı yönündə ardıcıl, məqsədyönlü addımların atılması, xüsusilə Prezident İlham Əliyevin multikulturalizmi dövlət siyasətinin prioritet istiqamətlərindən birinə çevirməsi olduqca əhəmiyyətlidir. Ölkəmizdə müxtəlif dini konfessiyaların əsrlərdir sərbəst və qarşılıqlı anlaşma şəraitində fəaliyyət göstərdiklərini, onların dilinə, dininə, mədəniyyətinə xalqımız tərəfindən daim yüksək qiymət verildiyini vurğulayıb, bu ənənələrin dərin tarixi köklərdən qaynaqlandığını bildirib. Komitə sədri həyata keçirilən uğurlu daxili və xarici siyasət nəticəsində multikulturalizmin Azərbaycanın dövlət siyasətinə və həyat tərzinə, tolerantlığın isə xalqımız üçün demokratik dəyərə çevrildiyini söyləyib.
Sonda tədbir iştirakçılarını maraqlandıran suallar cavablandırılıb.

Paylaş:

Baxılıb: 896 dəfə