Azərbaycan Memarlıq və İnşaat Universitetində abituriyentlər üçün “Açıq qapı” günü keçirilib

Bakı:

25 °C

56 %

6 m/s

Əlaqə

AZ RU EN

Ana səhifə / Sosial / Azərbaycan Memarlıq və İnşaat Universitetində abituriyentlər üçün “Açıq qapı” günü keçirilib

Azərbaycan Memarlıq və İnşaat Universitetində abituriyentlər üçün “Açıq qapı” günü keçirilib

24.05.2016 [09:59]

Azərbaycan Memarlıq və İnşaat Universitetində (AzMİU) I, II və V qrupa daxil olmaq istəyən abituriyentlər üçün “Açıq qapı” günü keçirilib. Universitet, professor və müəllim heyəti, fakültələr, laboratoriya və auditoriyalarla tanışlıq xarakteri daşıyan “Açıq qapı” günündə abituriyentlərə tədris prosesi və qəbul qaydalarıyla bağlı məlumatlar verilib.
AzMİU-nun rektoru, professor Gülçöhrə Məmmədova rəhbərlik etdiyi tədris ocağı barədə geniş açıqlama verərək bildirib ki, hazırda AzMİU-da 8 fakültədə 7000-ə yaxın tələbə təhsil alır, onlardan 700-ü xarici ölkə vətəndaşıdır. Tədris 3 dildə - Azərbaycan, rus və ingilis dillərində aparılır. Daha sonra Gülçöhrə Məmmədova fakültələr barədə geniş məlumat verib, ali təhsil ocağının beynəlxalq əlaqələrindən danışıb. Tanışlıq xarakterli çıxışında Gülçöhrə Məmmədova rəhbəri olduğu Universitetin ixtisaslarının həmişə aktual olduğunu, hazırladıqları kadrlara həmişə, hər yerdə ehtiyac olduğunu abituriyentlərin diqqətinə çatdırıb: “Bizim məqsədimiz savadlı, bilikli, özünəgüvənən, dünyada rəqabətə davam gətirə bilən, müstəqil fikirli, öz dəst-xəttiylə seçilən kadrlar yetişdirməkdir. Bizim universiteti seçməklə siz həm də şəffaf, demokratik bir mühitdə təhsil alacaqsınız, zəruri texniki avadanlıqlarla təchiz olunmuş ixtisas laboratoriyalarında, birbaşa inşaat meydançalarında iş prosesiylə tanış olacaqsınız, müasir təcrübəyə malik böyük şirkətlərdə, tanınmış mütəxəssislərlə təmasda olacaq, yeni bilgilərə yiyələnəcəksiniz, gələcəkdə işlə təmin olunmaq üçün partnyorlarımız olan işəgötürənlərlə görüşlərə qatılacaq, işgüzar əlaqələr qurmaq imkanları qazanacaqsınız”.
Abituriyentlərə imtahanlarda uğurlar diləyib, düzgün seçim etmələrini arzulayan rektor onları maraqlandıran sualları cavablandırıb. Sonra abituriyentlər və onların valideynləri AzMİU ilə yaxından tanış olublar, geniş və işıqlı auditoriyaları, müasir avadanlıqlarla təchiz olunmuş laboratoriyaları gəzib, böyük kitab fondu, dünyanın aparıcı elektron kitabxanalarına və resurslarına qoşulan kitabxana, nadir eksponatları olan muzey, tələbə və müəllimlərin əl işlərindən ibarət olan sərgi salonlarına baş çəkiblər. Görüşün sonunda qonaqlar universitetin müəllim və tələbə heyətiylə bərabər çay süfrəsi arxasında səmimi söhbətlər edib, təəssüratlarını paylaşıblar.

Paylaş:

Baxılıb: 728 dəfə