Bakı Dövlət Universiteti Milli Nüvə Tədqiqatları Mərkəzi ilə əməkdaşlıq edəcək

Bakı:

29 °C

55 %

9 m/s

Əlaqə

AZ RU EN

Ana səhifə / Sosial / Bakı Dövlət Universiteti Milli Nüvə Tədqiqatları Mərkəzi ilə əməkdaşlıq edəcək

Bakı Dövlət Universiteti Milli Nüvə Tədqiqatları Mərkəzi ilə əməkdaşlıq edəcək

10.01.2018 [10:14]

Yanvarın 9-da Bakı Dövlət Universitetində (BDU) bu ali məktəb ilə Nəqliyyat, Rabitə və Yüksək Texnologiyalar Nazirliyinin tabeliyində olan “Milli Nüvə Tədqiqatları Mərkəzi” Qapalı Səhmdar Cəmiyyəti (MNTM QSC) arasında əməkdaşlığa dair niyyət protokolu imzalanıb.
Sənəddə elmi əməkdaşlıq, mərkəzdə BDU-nun “Maddə quruluşu” kafedrasının filialının və ya baza kafedrasının yaradılması, gələcəkdə digər bəzi baza kafedralarının da təşkili, universitetin tələbə, magistr və doktorantlarının nüvə ölkələrində, eləcə də mərkəzin əməkdaşlıq etdiyi beynəlxalq təşkilatlarda tədris və təlim kurslarına cəlb olunması üçün tədbirlərin görülməsi və s. məsələlər əksini tapıb.
Niyyət protokolunu BDU-nun rektoru, akademik Abel Məhərrəmov və MNTM QSC-nin sədri, akademik Adil Qəribov imzalayıblar.
AZƏRTAC xəbər verir ki, Almaniyanın Nüvə Tədqiqat Mərkəzinin ağır ionların elmi tədqiqatları mərkəzində institut direktoru Piter Braun-Munzingerin rəhbərlik etdiyi nümayəndə heyətinin də qatıldığı imzalanma mərasimində akademik A.Məhərrəmov Azərbaycan Prezidenti İlham Əliyevin elmə, təhsilə daim böyük önəm verdiyini bildirib.
Rəhbərlik etdiyi ali məktəbin fəaliyyəti, beynəlxalq əlaqələrindən danışan rektor BDU-nun fizika fakültəsində nüvə fizikası və nüvə texnologiyası sahəsində, yüksək enerjilər fizikası, radiasiya materialşünaslığı, atom və nüvə fizikası istiqamətində kadr hazırlığı barədə ətraflı məlumat verib.
A.Məhərrəmov, eyni zamanda, Almaniya universitetləri ilə nüvə fizikası sahəsində əməkdaşlığın, bu sahə üzrə beynəlxalq elmi mərkəzlər tərəfindən həyata keçirilən qlobal elmi və elmi-texniki proqramlarda, təcrübə və tədqiqatlarda iştirakın vacibliyini vurğulayıb.
Akademik A.Qəribov rəhbərlik etdiyi qurumun fəaliyyəti və gələcəkdə həyata keçirilməsi planlaşdırılan layihələrdən söz açıb.
Almaniyalı alim P.Braun-Munzinger BDU ilə Avropa Nüvə Tədqiqatları Təşkilatı (CERN) və Almaniyanın nüvə tədqiqat mərkəzləri arasında əməkdaşlığın inkişaf etdirilməsinin əhəmiyyətindən danışıb.
Görüşdə CERN və Almaniyadan alınmış məlumatlar toplusunun BDU-da analizi və nüvə fizikasının müasir problemlərinin tədqiqi və s. müzakirə edilib.
Qeyd edək ki, tədbirdə yaxın gələcəkdə Almaniyanın Nüvə Tədqiqat Mərkəzi ilə də əməkdaşlıqla bağlı niyyət protokolunun imzalanmasının nəzərdə tutulduğu diqqətə çatdırılıb.

Paylaş:

Baxılıb: 577 dəfə